Mat. 21 - Yus Papí: Shuarja̱i̱ Yus Yamaram Chicham Najanamu

Jesus Jerusaréṉnum waya̱mu

¹ Jerusaréṉnum nuntumsar Petpajáiniam jeawarmiayi. Nusha Uriwiunam ayamchiyayi. Nui̱ jeawar Jesus ni unuiniamuri̱n jímiaran akupeak chichaak

² “Tíjiu̱ch péprunam werum umpuru umpuruchiji̱a̱i̱ jiṉkiamu wainkiattarme. Nu atíarum itiartitiarum.

³ Tura aents urukamtai áitkiarum túramkurminkia Uunt wakerawai tura wárik awaiṉkittiawai titiarum” tímiayi.

⁴ Tura nusha yaunchu Yúsnan etserin aarmia nu uminkiati tusa tímiayi. Jú̱nis áarmiayi.

⁵ “Seuna Nawantri̱ ju̱ etserkatarum ‘Iistarum, atumí Úunt Akupniuri̱ péejchach asa umpuruchiniam ekemak tura kijin aentstai̱ umpuru uchirí̱n eketka winitrámprume’ titiarum.” Isa. 62:11; Sak. 9:9

⁶ Tutai nu jímiar unuiniamuri̱ wéar Jesus timia núnisaṉ túrawarmiayi.

⁷ Umpuruchin nukurtiuk itiarmiayi. Tura ni pushiri̱n áitkiaram Jesus entsamkamiayi.

⁸ Shuar untsurí ásar ni wéamunam pushiri̱n áitkiarmiayi. Chikitcha nuká jurukar ni wéamunam aeprurarmiayi.

⁹ Shuar untsurí eem wéarmia nusha tura uku winiarmia nusha kakantar untsumiarmiayi. “Ju̱na we̱a̱tri̱ úunt akupin Tawit asamtai naṉkamakuiti. Yusa náari̱i̱n winiana ju̱ ii Úuntri̱nti. Shiir atí. Nayaimpinmasha Yus shiir awajsatai.” Tu untsumiarmiayi.YKan. 118:25-26

¹⁰ Jesus Jerusaréṉnum waya̱mtai ashí shuar ti enentáimiainiak “¿Ju̱sha yait?” tiármiayi.

¹¹ Chikitcha “Yúsnan etserin Jesusaiti Nasarétnumia̱ tura Kariréa nuṉkanmaya̱iti” tiármiayi.

Yusa Uunt Je̱e̱n Jesus wariṉkish suruktinian surimkiamu

¹² Nuyá̱ Jesus Yusa Uunt Je̱e̱n wayá̱ kuítian súruiniak tura súmainiak pujan akuprámiayi. Kuítian yapají̱nia awa̱tairi̱ncha ayanturmiayi tura yampitsa súruinia kutaṉkri̱ncha núnisaṉ ayanturmiayi.

¹³ Nuyá̱ tímiayi “Yus Papinium áarchamukait ‘Winia Je̱a̱r Yus aujtai̱ jé̱a̱iti.’ Isa. 56:7 Antsu átumka kasa matsamtaiya nútikiarme” tímiayi.Jrm. 7:11

¹⁴ Nui̱ Yusa Uunt Je̱e̱n ji̱ kusurarusha shutuapsha Jesusan tariarmiayi. Túramtai tsuararmiayi.

¹⁵ Tura Yúsnan pujurniu úuntri̱sha tura Israer shuara jintinniuri̱sha aents tujintiamun Jesus túrakui iisar kajerkarmiayi. Nu arantcha uchi Yusa Je̱e̱n “Ju̱na we̱a̱tri̱ úunt akupin Tawit asamtai naṉkamakuiti” untsumainiakui Jesusan ti kajerkarmiayi.

¹⁶ Tura chichaak “¿Ju̱ uchi tuinia nu ántamek?” Tutai Jesus “Ee, ántajai” tímiayi. “Átumka Yus Papí ju̱na tana ju̱ka áujsachukaitrum. Jú̱nis tawai ‘Uchisha tura kuírchisha Yusa náari̱n imiá shiir awajtúsarat tusa Yus tsaṉkatkaiti.’” YKan. 8:2

¹⁷ Nuna tinia ikiuiniak Jerusaréṉnumia̱ jiinkí̱ Petanianam we nui̱ kanarmiayi.

Jesus ikiu numin yumiṉkramu

¹⁸ Kashin tsawa̱r Jerusaréṉnum waketas Jesus tsukarmiayi.

¹⁹ Ikiu ukat ukat jintiá yantam wajan wainiak akaktajtsa werimiayi. Túrasha werí aya núkenak wainkiamiayi. Tura numin chicharuk “Atakka peṉké nerekchattame” tutai nu chichamaik jakamiayi.

²⁰ Nuna wainiak ni unuiniamuri̱ ti enentáimprar aniasarmiayi “¿Urukaku imiá wárik jaka?”

²¹ Tuíniakui Jesus chicharainiak “Nekasan tájarme, Yus nekas enentáimtakrumka ‘nekaspash túrat’ táchakrum íkiun túrajna nusha túramniaitrume. Tura nu arantcha nu naint ‘ékemtam nayantsanam inianta’ tutai túrunattawai.

²² Ashí Yus áujeakum seamna nu, Yus nekas enentáimtakum seakmeka wainkiattame” tímiayi.

Yusa kakarmari̱ji̱a̱i̱ Jesus takasma

²³ Yusa Uunt Je̱e̱n Jesus wayá̱ unuiniamiayi. Tumai̱ Yúsnan pujurniu uuntri̱ tura Israer shuara úuntri̱sha Jesusan tariar aniasarmiayi “¿Yana chichame̱ja̱i̱ ju̱ túram. Ya ju̱ túratniuncha akuptámkait?” tiármiayi.

²⁴ Tutai Jesus chicharainiak “Wisha aniastaj tusan wakerajrume. Ju̱ ái̱rkakrumni̱ṉkia Wisha yana chichame̱ja̱i̱ túraj nuna ujaktatjarme.

²⁵ Wats ¿ya imiakratin Juáṉkan akupkámia. Yusak, aentsuk, ya akupkámia?” Tutai nuamtak tunainiarmiayi. “‘Yus akupkámiayi’ tákurni̱ṉkia ‘¿urukamtai enentáimtichuitrum?’ turamtatji.

²⁶ Kame ‘shuar akupkaiti’ tákurkia aents ashamainiaji. Warí Juaṉka Yúsnan etserniuiti tuíniatsuk ashí aentska” tiármiayi.

²⁷ Nuyá̱ Jesusan “Nékatsji” tutai Jesussha áiniak “Wátsek, Wisha núnisnak akuptúkua nuna ujakchattajrume” tímiayi.

Uchi aparí̱ umirkatniun áujmatma

²⁸ Jesus unuiniak chichaak “Enentáimpratarum. Shuar uchin jímiaran takakuyi. Nuna chikichkin chicharuk ‘Uchiru, árak júuktin yamái wetá’

²⁹ tutai uchi ‘Atsá, nakitiajai’ táyat urum enentáimiar takaumai.

³⁰ Chikichnasha werí núnisaṉ seamai. Tutai uchi ‘Apawá, páchitsuk wetajai’ táyat wéchamai.

³¹ Wats ¿túa ni aparí̱ wakeramun umirkama?” tímiayi Jesus. Tutai “Emkaa nu” tuíniakui Jesus chichaak “Nekasan tájarme, yajauch shuar ainia nu tura tsanirma ainia nusha átumka pachintsurmini̱ṉ ni emka Yus akupeamunam pachinkiartatui.

³² Iis, imiakratin Juaṉ péṉker wekasatniun etserkamiayi túrasha antukchamarme. Antsu yajauch shuar ainia nu tura tsanirma ainia nusha umirkarmiayi. Nusha wáinkiaitiatrum atumí yajauchiri̱ enentáimturchamarme” tímiayi.

Yajauch takaun áujmatsarma

³³ “Ju̱ chíkich áujmatmasha antuktarum. Nuṉká nérentin uwa arak wenuimiai. Uwa neketai̱ncha tura kumpinniasha najanamai. Tura mash péṉker iwiarak shuar waitrukarti tusa apujkiarmai. Tura ikiuak yajá nuṉkanam wemai. Isa. 5:1-2

³⁴ Nuyá̱ júuktin tsawant jeamtai juuk nakak akuptúrkarti tusa takarniúri̱n akupkarmai.

³⁵ Tura nui̱ pujuinia nu, akupkámun achikiar chikichnaka katsumkar chikichnasha máwar chikichnasha kayaja̱i̱ tukurar máwarmai.

³⁶ Túrawarmatai nérentin takarniun nuna naṉkaamas akuprámai. Ataksha nui̱ pujuarmia nu núnisaṉ túrawarmai.

³⁷ Amúamunam ni uchirí̱n akupeak ‘Winia uchir asamtai arantúkchartimpiash’ timiai.

³⁸ Túrasha takakmainiaka nérenniu uchirí̱n wáinkiar chichainiak ‘Aparí̱ jakamtai ju̱na mashⁱ júkishtatuak. Maatai túrar ii nérentin ajastai’ tiarmai.

³⁹ Tiar achikiar arant júkiar nui̱ máwarmai.

⁴⁰ Nuṉká nérenniuri̱ taa nu takakmainian ¿Warí itiurkartiṉ?” tímiayi.

⁴¹ Tutai aimiainiak “Nu shuar ti yajauch ásarmatai waitnentsuk amuukartatui. Tura nu ajan chíkich takakmasar neren akanák nin surusarat tusa apujsartatui” tiármiayi.

⁴² Tuíniakui Jesus chicharainiak “Átumka Yus papikia ¿peṉkek áujchaitrum? Jú̱nis áarmaiti ‘Je̱a̱ je̱a̱min utsaṉkarmia nú kaya ashí kayaja̱i̱ naṉkaamas apujsamuiti. Núnaka ii Uuntri̱ Yus túraiti. Iisha iisar ti enentáimtaji.’ YKan. 118:22-23

⁴³ Tuma asamtai tájarme Yusna írunna nu wáinkiatarum tusa suramsamuitiat atumíya̱ junas chíkich aents sunastatui. Nisha awaṉtukiartatui.

⁴⁴ Tura shuar nu kayan tukumainia nuka kupintrartatui. Tura nu kaya shuarnum iniaarka tsai̱ tsai̱ awajsattawai auka” tímiayi Jesus.

⁴⁵ Yúsnan pujurniu úuntri̱sha Pariséusha Jesus áujmatman antukar “iin túramji” tusar achiktaj tiármiayi.

⁴⁶ Tura ashí aents “Jesus Yúsnan étserui” tuinia ásarmatai nin ashamkarmiayi.