Mat. 18 - Yus Papí: Shuarja̱i̱ Yus Yamaram Chicham Najanamu

“¿Ya imiá naṉkamantuit?” tunaimiu

¹ Nu tsawantai̱ ni unuiniamuri̱ tariar Jesusan chicharainiak “Yus akupeamunam pachinia nu ¿ya imiá naṉkamantu áminiait?” aniasarmiayi.

² Nuna tuíniakui Jesus uchin untsuk ajapén awajás

³ chichaak “Tí nekasan tájarme, atumí enentáimtairi̱ yapaji̱árum uchia áinis ajachkurmeka Yus akupeamunam pachinkiachminiaitrume.

⁴ Nu asamtai ju̱ uchia áinis péejchach enentáimtumana nuka Yus akupeana nui̱ nekas naṉkamantu ajasminiaiti.

⁵ Nú arantcha Winia anentuk uchin itiaana nú shuar Winiasha itiaareawai” tímiayi.

⁶ “Shuar ju̱ uchin Winia enentáimturas umirtana nuna yajauchiniam aju̱a̱rmataiṉkia nuna túratsa̱i̱ṉ nisha kuntujnum kayaja̱i̱ jiṉkiar nayantsanam ajapén aju̱ṉmaitkiuṉka maak ainti.

Yajauch túratniun aju̱nmakuiṉkia tsuumainti

⁷ Ju̱ nuṉkanam tunaanum iniaatai írunna nuja̱i̱ aneartarum. Antsu shuar chikichan tunaanum aju̱a̱rka enentáimprati” tímiayi.

⁸ “Nu asamtai ame uwejém tura náwem yajauch túratniunam aju̱nmakuiṉkia tsupikiam ajapata. Kame muntuch pujustin tura ukunam nayaimpiniam wétin péṉkeraiti. Antsu kajinkiashtin jinium takamtsuk jeatniuka imiá yajauchiti.

⁹ Núnisaṉ ame ji̱mi yajauch túratniunam aju̱nmakuiṉkia ukuinkiam ajapata. Kame chikichik ji̱ji̱a̱i̱ pujusam nayaimpiniam wétin péṉkeraiti. Antsu jinium mai̱ jí̱ntiuk wétin imiá yajauchiti” tímiayi.

Murik meṉkaaka áujmatsamu

¹⁰ “Uchi ainia nu nakitrairap. Yusa suntari̱ nin wáinkiatniua nu winia Aparuí̱ tíjiu̱ch pujuiniawai.

¹¹ Kame wi Aents Ajasu asan meṉkakarun e̱a̱ktajtsan táwitjiai.

¹² Enentáimpratarum. Shuar sian murikiun takakuitiat chikichik meṉkakamtai untsurí meṉkakacharun nainnium matsaakᵘ meṉkakan e̱a̱ushtatuak.

¹³ Wáinkiasha untsurí meṉkakacharua nuja̱i̱ naṉkaamas waraschattawak.

¹⁴ Núnisaṉ atumí Aparí̱ nayaimpiniam pujana nu, nu uchi chikichkisha meṉkakacharti tawai” tímiayi.

Yus shuarti tsaṉkurnáiratin

¹⁵ “Tuma asamtai chíkich Yus shuar ámin yajauchin túrutmakuiṉkia ni werim áujsata. Tura ámechik werim yatsumji̱a̱i̱ chichasta. Anturtamkuiṉkia ame yátsum yáiṉkiume.

¹⁶ Tura anturtamchakuiṉkia chikichik shuar nuíchuka jimiará shuar jukim ataksha weritia. Túram ataksha áujsata nisha paant nekaawarat tusam.Muis. 19:15; Isr. 10:28

¹⁷ Túrasha yátsum tuke ántachkuiṉkia Yus shuar iruntai̱niam iwiainiakta. Túrasha yátsum peṉké ántachkuiṉkia Yus shuarcha núnisam nu shuar enentáimtusta.

¹⁸ Nekasan tájarme ju̱ nuṉkanam suritiam nu nayaimpinmasha suritniáktatui. Tura ju̱ nuṉkanam tsaṉkateam nu nayaimpinmasha tsaṉkatnaktatui.

¹⁹ Núnisnak tájarme, ju̱ nuṉkanam pujusrum jímiar Yus shuartiram métek enentáimprarum winia Apar nayaimpiniam pujana nu seakrumni̱ṉkia wakerarmena nuna suramsattarme.

²⁰ Jímiarchiksha nuíchuka menaintiuksha Yus shuar Winia enentáimturuk iruntrarmatai Wisha nui̱ niji̱a̱i̱ pujajai” tímiayi Jesus.

²¹ Takui̱ Pítiur werí Jesusan aniasmiayi “Uuntá, winia yatsur yajauch awajtakui ¿urutmá tsaṉkuratniuitiaj. Siátikik tsaṉkuratniuitiaj?”

²² Takui̱ Jesus aya̱k “Siátik tátsujme antsu iniaṉnatsuk tsaṉkuratniuitme” tímiayi.

Takakmau tsaṉkurachma áujmatsamu

²³ Tuma asa Jesus Yus akupeamunam pachinkiaru tsaṉkurnáirartiniaiti tusa ju̱ métektaku chichaman áujmatuk tímiayi “Uunt akupin takarin tumashin akirkarat tusa untsukarmai.

²⁴ Yama náṉkamuk tí nukap tumashmakua nuna untsukmai. Akikmakchamnia ti tumashmakuyi.

²⁵ Tura nu takakmau kuitri̱ atsakui úunt akupin ‘Yajasma áitkiasrum nua̱rtiuk uchirtiuk ashí wariri̱ntiuk suruktarum. Nu kuitji̱a̱i̱ akirkati’ timiai.

²⁶ Tutai nu takakmau úunt akupniun tikishmátar seak ‘Uuntá, waitneasam nákarsata. Auka, mashⁱ akiktatjame’ tímiayi.

²⁷ Uunt akupin waitnentar tsaṉkur aṉkant akupkámai.

²⁸ Tura nú chichamaik nú takakmau jiinkí̱ ni ai̱n iṉkiuṉmai. Nú ai̱sha nin ishichik tumashiyi. Tura tsékeṉtki̱ sué̱nam achik chicharuk ‘Tumashitmena nu wari akirkata’ timiai.

²⁹ Tura ni ai̱ nin tikishmátar chicharuk ‘Waitneasam nákarsata. Wikia mash akiktatjame’ timiai.

³⁰ Túrasha nakitramai. Antsu tsaṉkurtsuk sepunam eṉkeamai ashí akirkat tusa.

³¹ Chíkich takakmau nuna wáinkiar ti kúntuts enentáimtuiniak úunt akupniun ashí etsertukarmai.

³² Nuna antuk úunt akupin untsuk itiá timiai ‘Yajauchitme. ¿Winia “waitnentrurta” túrutkumin ashí tsaṉkurachmakjam?

³³ Amesha núnismek ame ai̱m tsaṉkuratniuitme’ timiai.

³⁴ Tinia úunt akupin kajekmai. Tura ashí tumashin akikmatsuk asutniáti tusa suntarnum surukmai.”

³⁵ Jesus nuna áujmatas amúak chichaak “Núnisaṉ winia Apar nayaimpiniam pujana nu atumín túrutmattarme atumí yachi̱ nekas enentáiji̱a̱i̱ tsaṉkureachkurminkia” tímiayi.