Mat. 14 - Yus Papí: Shuarja̱i̱ Yus Yamaram Chicham Najanamu

Imiakratin Juaṉ jakamu

¹ Kariréanam Irutis akupniuyayi. Tura Jesus túramuncha antukmiayi.

² Tura ni írutramuri̱n chichaak “Nuka imiakratin Juaṉ jakamunmaya̱ nantaki̱ túrawai. Tuma asa aents tujintiamun túraiti” tímiayi. Kame Irutis Juáṉkan maa asa tímiayi.

^3-4 Akupin Irutis ni yachí̱ Jirip nuwe̱n Jirutíasan akintrukmatai Juaṉ Irutisan chichaak “Ame yatsumi nuwé̱ akintrukchatniuitme” tímiayi. Tutai Irutis Juáṉkan achik jiruja̱i̱ jiṉkiá sepunam eṉkeatarum tusa akupkámiayi.

⁵ Nisha Juáṉkan mátaj tukamá aentsun ashamiarmiayi. Ashí aents “Juaṉ Yúsnan etserniuiti” enentáimtuiniakui ashammiayi.

⁶ Tura akupin Irutis akiiniamu tsawantri̱ jeamtai nú nampertin Jirutíasa nawantri̱ ashí ipiaamu pujuiniamunam jantsemámiayi. Túramtai Irutis shiir enentáimtak

⁷ “Ame ashí wakeram nu seattiá. Nekasan amastatjai, Yussha iirui” tímiayi.

⁸ Tutai nu nuwa̱ch emka ni nukurí̱ akatrámu asa Irutisan chicharuk “Imiakratin Juaṉka muuké̱ tsupikiam amamkunam eṉkeram surusta” tímiayi.

⁹ Tutai Irutis wake mesekmiayi. Túrasha “nekas Yus iirui” tiniu asa tura ni amikrí̱sha antukaru asamtai umikmiayi.

¹⁰ Ni suntari̱n sepunmaya̱n Juaṉka muuke̱n tsupik itiarti tusa akupkámiayi.

¹¹ Tura amamkunam itiar nuwa̱chin súsarmiayi. Tura nisha ni nukurí̱n susamiayi.

¹² Nuyá̱ Juaṉka írutramuri̱ tariar aya̱shí̱ jukiar iwiarsarmiayi. Túrawar Jesusan ujaktaj tusar wéarmiayi.

Jesus seṉku mir áishmaṉnasha tura nuwa̱ncha uchincha ayurkamu

¹³ Jesus nuna antuk Niṉki kanunam eṉkemár arant aents atsamunam wémiayi. Túrasha nuna aents nekaawar Jesusan kúkarak weriarmiayi.

¹⁴ Kanunmaya̱ jíiniaj tukamá untsurí aentsun wainkiamiayi. Tura wainiak waitnentrarmiayi. Tura jáiniancha tsuararmiayi.

¹⁵ Kí̱akui̱ ni unuiniamuri̱ Nin tariar chichainiak “Uuntá kí̱awai. Tura shuar tíjiu̱ch pujaaka atsawai. Ju̱ aents akupkarta. Péprunam wéar sumak yurumáwarti” tiármiayi.

¹⁶ Tutai Jesus chichaak “¿Urukamtaik wéarat? Antsu atumek ayuratarum” tímiayi.

¹⁷ Tutai “Iikia takaktsuji. Antsu seṉku páṉchik nuyá̱ jimiará namakchik takakji” tiármiayi.

¹⁸ Tuíniakui Jesus “Wats, nu itiartitiarum” tímiayi.

¹⁹ Tinia aents chírichriniam pujusárti tusa akupkámiayi. Nuyá̱ seṉku páṉchin tura jimiará namakchin achik nayaimpiniam íimias Yusan yumiṉsamiayi. Tura puur ni unuiniamuri̱n aents ayuratarum tusa súsarmiayi.

²⁰ Ashí yurumáwar ejemararmiayi. Tura nuya̱sha puunaruka tuse chaṉkin tiármiayi.

²¹ Nui̱ yurumáwarmia nuka nuwa̱sha uchisha nekapmatsuk aya áishmaṉkak seṉku mir ármiayi.

Jesus entsá pátatek wekasamu

²² Nuyá̱ Jesus ni unuiniamuri̱n kanunam eṉkemprarum amain émaa ajatarum tusa akupkarmiayi. Nisha aentsun akupkarmiayi.

²³ Akupkársha naint waka Yusan áujumiayi. Káshisha nui̱ Niṉki tuke pujumiayi.

²⁴ Tura antumiaṉ tí waṉkaram asamtai kanu ajapén ajasmatai nase tukumam entsa tamparukmiayi.

²⁵ Tsawa̱a̱na ai̱ tuke wenai̱ Jesus entsá pátatek wekaikí̱ pujuiniamunam jeamiayi.

²⁶ Tura ni unuiniamuri̱ entsá pátatek wekaan wáinkiar ti sapijmiakarmiayi. Tura ashamainiak “wakanchashit” tiármiayi.

²⁷ Tuíniakui Jesus chicharuk “Kakaram ajastarum. Witjiai. Ashamprukairap.”

²⁸ Takui̱ Pítiur chicharuk “Uuntá, nekas Ámetkumka Ame wajamna nui̱ entsá pátatek wekaiki̱n jeataj untsurkata.”

²⁹ Takui̱ Jesus chichaak “Winitiá” tutai Pítiur kanunmaya̱ akaikí̱ Jesus wajana nui̱ jeataj tusa entsá pátatek wekaikí̱ wémiayi.

³⁰ Tura tí nasentun nekáa ashamkamiayi. Ashama asa entsá wá̱i̱miayi. Túmak “Uuntá, achirkata” tusa untsumkamai.

³¹ Nu chichamtaik Jesus uwejnum achik júak “Maa, ¿urukamtai Yus imiá ishichkichiksha enentáimtusumea?” tímiayi.

³² Tura kanunam eṉkemáwarmatai nasesha meṉkakamiayi.

³³ Túramtai kanunam eṉkemármia nusha Jesusan tikishmátrar chicharuk “Nekas Ámeka Yusa Uchirí̱nme” tiármiayi.

Jesus Jinisarítniumia̱ shuaran tsuarma

³⁴ Tura amaini̱ katia̱rar Jinisarítnium jearmiayi.

³⁵ Tura nuyá̱ aents Jesusan nekaawar nu nuṉkanam ashí ujanairarmiayi. Túrawar jáiniancha ni pujamunam itiariármiayi.

³⁶ Ni pushiri̱nkisha antiṉtai tusar seawarmiayi. Tura antiṉkiaruka péṉker ajasármiayi.