Mat. 11 - Yus Papí: Shuarja̱i̱ Yus Yamaram Chicham Najanamu

Imiakratin Juaṉ Jesusai̱ aentsun akupkámu

¹ Tura tuse unuiniamuri̱n Jesus tinia akupkar Nisha nú nuṉka péprunam we Yus Chichaman jintíak etserkamiayi.

² Tura Juaṉ sepunam eṉkemas Kristu túramun antukmiayi. Antuk ni unuiniamuri̱n jímiaran Jesusai̱ akupkámiayi.

³ Tura Jesusan aniasar chicharainiak “¿Nekas ame Kristu Yus akupkámu tátinia núkaitiam. Kame chikichak nákastatajⁱ?” tiármiayi.

⁴ Tutai Jesus chichaak “Waketkirum ashí ántarmena nusha wáintrumna nusha Juaṉ ujaktarum.

⁵ Kusurúsha wáinmainiawai.YKan. 146:8; Isa. 29:18 Shutuapsha wekainiawai. Tunamárusha péṉker ajainiawai. Empekárusha ántuiniawai. Jákarusha nantainiawai. Tura kuítrinchanmasha uwempratin chicham ujakmaiti.YKan. 68:10 Nu ujaktarum.

⁶ Túrasha yawe̱tsuk Winia tuke shiir enentáimturna nú shuar shiir átatui.” Jesus nuna tutai waketkiarmiayi.

⁷ Waketkiarmatai shuar káunkarun Jesus Juáṉkan pachis áujmatmiayi. “Shuar atsamunmasha ¿warí werimiarum? Pintiu nase umpuam atúu we ju̱ní̱ we ajana nuka ¿iistai tusarumek wémarum? Kame Juaṉka nú shuarchaiti.

⁸ Nuikia ¿warí werimiarum. Shuar péṉker iwiarmampra iistai tusarmek wémarum? Warí, péṉker iwiarmampraka uunta je̱e̱n pujuiniatsuk.

⁹ Nuikia ¿warí werimiarum. Yúsnan etserniuk werimiarum? Maa, túrachmashirum. Túrasha Juaṉka yaunchu etserniu naṉkaamas enentáimtustiniaiti.

¹⁰ Yaunchu Yus Papinium áarmaiti ‘Ame jintimín iwiarat tusan Winia akatrámurun amiin emka akupeajai.’ Mks. 3:1

¹¹ Nekasan tájarme, shuar imiakratin Juaṉja̱i̱ naṉkaamas uunt atsuwiti. Tuma ai̱ṉ Yus akupeamunam pachinia nu shuarnaka, nekasmianchancha, Juaṉja̱i̱ naṉkaamas shiir enentáimtustiniaiti. Tuma asamtai nui̱ pachinkiatin enentáimpratarum.

¹² Kakaram shuarka imiakratin Juaṉ tamia nú tsawantnumia̱ Yus akupeamunam ti pachinkiatniun wakeruiniak kakarmaja̱i̱ pachinkiatniun enentáimiainiawai.

¹³ Juaṉ pujumia nú yaunchu ashí Yúsnan etserin armia nusha tura Muisais akupkámusha Yus akupin ajastinian etserkarmiayi.

¹⁴ Yaunchu Yúsnan etserin ‘Kristu táatsa̱i̱ṉ Irías tátiniaiti’ tímiayi. Tura nekaatin wakerakrumka Juaṉ nu Iríasaiti.

¹⁵ Antuktin jeakrumka nekaatarum.

¹⁶ Ju̱ aentsnasha ¿wariji̱a̱i̱ métek nakumkataj? Uchiji̱a̱i̱ métek áiniawai. Ni ai̱ji̱a̱i̱ iruntrar nakurústaj táyataṉ chichainiak

¹⁷ ‘Námpera áinis nakurústaitsar peem umpuarji túrasha jantsemáchurme. Nuyá̱ iwiarsatniua áinis nakurústaitsar íwiareakur kantamtai̱ kantamáji túrasha átum útcharme’ tuíniawai.

¹⁸ Atumsha núnisaitrume. Kame Juaṉ núkapka yurumtsuk úmutsuk wekaimiayi. Túmakui̱ átumka ‘Yajauch wakantrukuiti’ tímiarme.

¹⁹ Nuyá̱ Wisha Aents Ajasan támajai. Tura yurumeakui tura úmakui ‘Ti yuruminiuiti tura ti nampenaiti. Ashí yajauch shuaran amikri̱nti’ túrutrume. Wátsek, wi túramuja̱i̱ Yus nekas nékamu nekanattawai” tímiayi.

Yajauch péprunmaya̱ shuaran chicharkamu

²⁰ Nuyá̱ tujintiamun túramiania nú peprunmaya̱ shuaran pachis Jesus chicharkamiayi. Tuma ai̱ṉ nuyá̱ shuar ni enentái̱n yapaji̱ácharu asamtai chicharkamiayi.

²¹ “Kurasínnumia̱tiram tura Petsaitianmaya̱tirmesha aneartarum. Nui̱ aents tujintiamun ti túraitjiai. Tírunam Setunnumsha nu tujintiamu túramuitkiuiṉkia yaunchu ni enentái̱n yapaji̱áwara̱a̱yi. Túrawar kúntuts pujutai̱ pushin entsarar yuṉkunim ajakiara̱a̱yi.

²² Tura Wisha tájarme, nekapsatin tsawant jeamtai Yus atumín tí asuttiámattarme. Tírunmaya̱ shuaran naṉkaamas tura Setunnumia̱ shuaran naṉkaamas asuttiámattarme.

²³ Tura atumsha Kapernáumnumia̱tirmesha ashí naṉkaamas naṉkamantu ajastin enentáimtumarme. Antsu jaka wait ajá matsamtai̱niam wétatme. Atumíin aents tujintiamun ti túraitjiai. Sutumanam nu tujintiamu túramuitkiuiṉkia nu pepru yamaisha tuke a̱a̱yi.

²⁴ Tura Wisha tájarme, nekapsatin tsawant jeamtai Yus Sutumanmaya̱ aents naṉkaamas atumín asuttiámattarme.”

“Wini̱i̱n ayampratarum” timia

²⁵ Nuyá̱ Jesus chichaak “Shiir enentáimtajme, Aparu, ashí nayaimpisha nuṉkasha úuntrinme. Tuma asam Ame túram nu tí unuimiaru enentáimtumainia nuyá̱ ú̱kuitme antsu uchichia áinis naṉkamantu enentáimtumainiatsna nú shuar paant awajtúsuitme.

²⁶ Ame Aparu, núnis wakera asam túraitme.

²⁷ Winia Apar ashí surusuiti. Wisha ni Uchirí̱ asamtai Winia nékarui. Tura chíkich Winia nekas nekarainiatsui. Yus Apancha Wiki nékajai. Tura Wi wakeraj nú shuaran winia Aparun paant awajtajai. Nu shuarsha winia Aparun nékainiawai.

²⁸ Ashí pimpikniutirmesha itiurchat pujarmena nusha Winí̱ winitiárum. Túrakrumni̱ṉkia ayamtikrattajrume.

²⁹ Wi kajechu asan tura péejchach enentáimin asamtai Winí̱ winirum unuimiártarum. Kame kijinian Wi súajrumna nu achikrum jukitiarum. Winia chichamur ántakrum umirtakrumniṉkia átum enentáimin ayamprattarme.Jrm. 6:16

³⁰ Waakaja̱i̱ nuṉká pukuak kuntujnum numi awantai̱ kijin áiniatsuk. Antsu Winia numi awantái̱ya núnis akuptajrumna nú túratniuka kijincha tura itiurchatcha asamtai yawe̱tkishtiniaiti. Kame kijinian Wi súajrumna nu wampuchiti” 1 Jṉ. 5:3-4 tímiayi Jesus.