Mat. 10 - Yus Papí: Shuarja̱i̱ Yus Yamaram Chicham Najanamu

Jesus tuse unuiniamuri̱n nemarsatniun anaikiamu

¹ Nuyá̱ Jesus tuse unuiniamuri̱n achik Yusa kakarmari̱n súsarmiayi yajauch wakaní̱n shuara enentái̱ya̱ ji̱i̱ki̱ akupkatniun. Núnisaṉ ashí suṉkurja̱i̱ jáinian tsuárartinian susamiayi.

² Ju̱ áiniawai Jesus tuse unuiniamuri̱n achikiármia nu emka Semuṉ núnisaṉ Pítiur náartiniuyayi. Nuyá̱ ni yachi̱ Antres. Nuyá̱ nuamtak yáchintin Jakupusha Juaṉsha, Sepetéu uchirí̱ armia nu.

³ Nuyá̱ Jirip, Parturumí, Tumas, Matéu. Mateusha kuítian achiniuyayi. Arpeu uchirí̱ Jakupusha. Ripíu núnisaṉ Tateu náartiniuyayi.

⁴ Ásumpⁱ Semuṉsha nuyá̱ Jútas Iskariúti Jesusan ukunam surukmia nu. Nu tuse achikma ármiayi.

Jesus etserkarat tusa akupkarma

⁵ Nu tuse unuiniamuri̱n Jesus jú̱nis chicharak akupkarmiayi. “Israer shuarcha matsatmanum weerap. Samarianam weerap.

⁶ Antsu Israer shuar murikiua áinis Yusai̱ya̱ waakaru ainia nu weritiarum.

⁷ ‘Tsawant ishichik ajasái Yus jú̱ nuṉkanam akupin ajastin’ tu etserki̱ wetarum.

⁸ Tunamárusha chíkich suṉkurja̱i̱ jainia nusha tsuartarum. Jakasha iniantkitiarum. Yajauch wakancha shuara enentái̱ya̱ ji̱i̱ki̱ awematarum. Nu túratin kuítchaja̱i̱ kakaram susamuitrume tuma asamtai atumsha ashí ántrarmek túratarum.

⁹ Kurisha ashí kuitcha jukiirap.

¹⁰ U̱yuncha jukiirap. Sapatcha tura ushukrustincha jukiirap. Antsu chikichik pushí jukitiarum. Takáu asakrumin yurumkan ajampramsartin áiniawai.

¹¹ Péprunam jearmesha péṉker shuar wainkiarum nui̱ waya̱rum tuke nui̱ṉ pujustarum.

¹² Nu je̱a̱nam waya̱msha ‘Ju̱ je̱a̱ shiir atí’ titiá.

¹³ Nekas péṉker shuaraitkiuṉka shiir ajasárti. Antsu nu shuar péṉker itiarmachkuṉka shiir ajascharti.

¹⁴ Tura náṉkamsaṉ atumín awa̱intiámainiachkuiṉkia anturtamainiachkuiṉkia nuyá̱ jíinkitiarum. Nu shuar yajauch ásarmatai jiinkirum atumí nawe̱ya̱ nuṉka japimiarum ikiuktiarum. Ni tunaarí̱ aents nekaawarat tusarum túratarum.

¹⁵ Nu shuaran nekapsatin tsawant jeamtai Yus asutiáshtatuak. Sutumanmaya̱ tura Kumuranmaya̱ aentsnasha naṉkaamas Yus asutiáttawai nu shuaran” tímiayi.

Yajauch awajsatniun ujakma

¹⁶ “Aneartarum. Wisha murik ya̱wa̱num akupkátniua áintsanak akupeajrume. Tuma asamtai shiir nawamkartin áyatrum napi ti enentáimkia áintsarum anearum wetarum.

¹⁷ Yajauch shuarja̱i̱ aneartarum. Akupniúnam juramkiartatui. Israer shuar iruntai̱niam asutiámawartatui.

¹⁸ Winia ajasu asakrumin úuntnumsha tura nuyá̱ akupniúnmasha juramkiartatui. Núnisrum akupniúncha tura Israer shuarchancha winia chichamur ujaktatrume.

¹⁹ Tura akupniúnam surutmakakrumnisha wariniak títiaj tu enentáimprairap. Nui̱ uuntja̱i̱ chichaakrumin Yus títinian jintintrámattarme.

²⁰ Nuiṉkia átum enentáimmiaja̱i̱ chichaschattarme antsu atumí Aparí̱ Yusa Wakaní̱ atumín chichamtikramsattarme.

²¹ Shuar ni yachi̱ncha máwarti tusa suruktatui. Apasha ni uchirí̱n surukartatui. Uchisha ni aparí̱n máwarti tusa surukartatui.

²² Tura Winia ajasu asakrumin mash muí̱jramkartatui. Tura tuke katsuntea nu uwemprattawai.

²³ Kame tu péprunmaṉsha apapétmainiakuiṉkia chíkich péprunam pisartarum. Wi Aents Ajasuitjiai. Tuma asan nekasan tájarme, átum Israer shuar mashⁱ ujatsrumni̱ṉ wantinkiattajai.

²⁴ Unuiniamuka nin unuiniana nuna naṉkaamaschaiti. Takarniusha ni uuntri̱ naṉkaamaschaiti.

²⁵ Unuiniamuka nin unuinia nuja̱i̱ métek ajaska maak. Takarniusha ni úuntri̱ji̱a̱i̱ métek ajaska maak. Wátsek, Winia atumí úuntri̱n ‘Iwianchi uuntri̱ Pirsepú’ turutainiakui ¡atumniasha nuna naṉkaamas yajauch turamtatui!

Yusak ashamkatniuiti

²⁶ Tuma asamtai aentska ashamkairap. Ashí u̱kma nu paant nekanattawai.

²⁷ Ishishmasan kiritniunam ujajrumna nu, tsawái̱ kakantrarum etserkatarum.

²⁸ Aya aya̱shniak main ainia nu ashamkairap. Wakanin máchmin áiniawai. Antsu wakanmincha aya̱shmíncha mái̱mtek jinium emesramnia asamtai Yus nekas ashamkatarum.

²⁹ Jimiará chiṉki peṉké ishichik kuitji̱a̱i̱ surukmin áiniawai. Túmaitiat Yus tsaṉkateachkuiṉkia nuṉká jaka iniainiatsui.

³⁰ Ame intiashmisha mash nekapmarmaiti.

³¹ Nu asamtai ashamkairap. Warí átumka ti untsurí chiṉkiji̱a̱i̱ naṉkaamas péṉkerchakaitrum.

Jesus natsantrashtiniaiti

³² Ashí shuar ashí ímiainiai̱ṉ Winia natsantruiniatsna núnaka Winia Apar yakí̱ nayaimpiniam pujana nui̱ natsantrashtatjai.

³³ Antsu shuar iimiainiamunam Winia natsantra núnaka Wisha yakí̱ nayaimpiniam winia Apar pujana nui̱ natsantrattajai.

Shuar Jesusa chichame̱ja̱i̱ shuar akannartatui

³⁴ Ashí shuar nawamnairar shiir matsamsarat tusan ju̱ nuṉkanam táwiti tu enentáimtursairap. Antsu wi támaj nuka shuar péṉker ajasármatai yajauch shuar nin nakitrartatui.

³⁵ Tuma asamtai shuar ní apari̱niak nakitrattawai. Nawantri̱sha nekas ní nukuri̱niak nakitrattawai. Núnisaṉ najatí̱sha tsatsarí̱ ának nakitrattawai.

³⁶ Tuma ásar shuarka ní shuari̱ji̱a̱i̱ṉᵏⁱ nemasrintin ártatui.Mik. 7:6

³⁷ Shuar ni aparí̱n tura nukurí̱ncha Wiji̱a̱i̱ naṉkatus aneakka Wí shuar áchamniaiti. Núnisaṉ ni uchirí̱ncha tura nawantri̱ncha Wiji̱a̱i̱ naṉkaamas aneakka Winia unuiniamur ajastinniaka táasuiti.

³⁸ Tura ashí wáitsatniun surimiatsuk ni krúsri̱n yanakí̱ jukí̱ nemartachkuṉka Winia unuiniamur ajastinniaka táasuiti.

³⁹ Kame aya jú̱ nuṉkanam péṉker pujustaj tana nu ni iwiaakmari̱n emeṉkáktatui. Antsu Winia enentáimturuka ni iwiaakmari̱ji̱a̱i̱ itit nekapmamtsuna nu ni iwiaakmari̱n wainkiattawai.

Akinkiatin

⁴⁰ Atumín itiarma nuka Winia itiarui. Tura itiarea nusha Winia akuptúkmia nunasha itiaawai.

⁴¹ Yúsnan etserin asamtai Yúsnan etserin itiaakka etserin akinkiáttana nuja̱i̱ métek akiktatui. Péṉker shuaran aya péṉker asamtai itiaakka péṉker shuarja̱i̱ métek akinkiáttawai.

⁴² Uchincha Wí shuar asamtai entsa michan shikirak susaṉka imiá nekas nusha akinkiáttawai” tímiayi Jesus.