Mar. 9 - Yus Papí: Shuarja̱i̱ Yus Yamaram Chicham Najanamu

¹ Ataksha Jesus nin chicharuk “Nekas tájarme, shuar játsuk Yus ni kakarmari̱ji̱a̱i̱ aentsu enentái̱n akupkáttana nú tsawantan wáinkiartatna nu ju̱i̱ iiji̱a̱i̱ pujuiniawai” tímiayi.

Jesus nusháa iira ajasma

² Nuyá̱ sais tsawant naṉkaamasmatai Jesus Pítruncha Jakupuncha Juáṉnasha uunt nainnium júkiarmiayi. Nui̱sha Jesus nusháa iira ajasmiayi.

³ Ni pushirísha ti puju jíitsumir ajattsarmiayi. Nuja̱i̱ métek puju awajsatin ju̱ nuṉkanam atsawai.

⁴ Túruna nui̱ Irías, Muisaisja̱i̱ wantinkiar Jesusja̱i̱ chichainian wáinkiarmiayi.

⁵ Nuya̱sha Pítiur Jesusan chicharuk “Uuntá, ii ju̱i̱ pujustin ti péṉkeraiti. Menaintiú aak áminiu tura Muisaisna nuyá̱ Iríasnasha najanatai” tímiayi.

⁶ Jesusa unuiniamuri̱ sapijmainiak Pítiur wariniak titi nekaachmiayi. Nékachu asa nuna tímiayi.

⁷ Tura yuraṉkim káunar mikintiu awajsámiayi. Yuraṉminmaya̱ chichaak “Winia aneamu Uchir ju̱i̱ti. Ni anturkatarum” tímiayi.

⁸ Nuya̱ṉka ni unuiniamuri̱ ayantmar iyaj tukamar aya Jesusnak wáinkiarmiayi. Chíkichkia atsuarmiayi.

⁹ Nuyá̱ náinniumia̱ akainiak Jesus nin chicharuk “Wáinkiarumna nu etserkairap. Wi, Aents Ajasuitjiana ju̱ jakamunmaya̱ nantaatsa̱i̱ṉ nu etserkairap” tímiayi.

¹⁰ Tutai ni tímian ímiatrusaṉ ú̱karmiayi. Tura “jakamunmaya̱ nantaatsa̱i̱ṉ tana nu, ¿wariniak taa?” nuamtak tunainiarmiayi.

¹¹ Tura Jesusan chicharainiak “¿Urukamtai Israerti ii jintinniuri̱sha Irías emka tátiniaiti tuinia?” tiármiayi.

¹² Tutai Jesus chichaak “Nekas Irías ashí iwiarattsa emka tátiniaiti. ¿Tura Aents Ajasunun Yus Papinium warintiua? ‘Ti wáitsattawai. Nin nakitrartatui.’ Isa. 53:3

¹³ Wi tájarme Irías nekas táwiti. Támatai shuar ashí ni wakeriarmia nuna nin túrawarmiayi. Yusa Papiri̱i̱n Iríasa túrunatniuri̱ aarma amia tímiatrusaṉ túrawarmiayi” tímiayi Jesus.

Jesus iwianchin ji̱i̱ki̱ akupkámu

¹⁴ Tura ni unuiniamuri̱ matsatmanum atak wáketuk ti untsurí aents káutkar Israer shuara jintinniuri̱sha niji̱a̱i̱ tunái̱ pujuinian wainkiamiayi.

¹⁵ Tura aentsush Jesusan wáinkiar warainiak tsékeṉki̱ weriar áujsarmiayi.

¹⁶ Túrunawarmatai Jesus chicharainiak “¿Warí tunaiyarum?” tímiayi.

¹⁷ Tutai chikichik aya̱k “Uuntá, winia uchirun ámin itiarjiame. Iwianchruku asa chichachuiti.

¹⁸ Túmakui̱ íwianch eṉkemtakuṉ paat aji̱a̱r áepeawai túram uchisha saun káput apak nai̱n kátetete awajeawai. Túram kaka̱a̱kcha ajakui ame unuiniamurmin jí̱i̱rtukti tusan seamjai túrasha tujintrutkarai” tímiayi.

¹⁹ Tutai Jesus chichaak “¡Yusan enentáimtichutirmincha urutmá tsawantak atumji̱a̱i̱ pujustaj tura urutmá katsuntrataj! Uchi itiatárum” tímiayi.

²⁰ Takui̱ uchin Jesusai̱ itiariármiayi. Tura íwianch uchin eṉkemta Jesusan wainiak uchin ajakramiayi. Uchisha chichiptur nuṉká iniaan péper péper ajakí̱ wenunam saun apakmiayi.

²¹ Túrunamtai Jesus uchi aparí̱n chichaak “¿Urutá yaunchu áinkiait?” Tutai ni aparí̱ chichaak “Úchichik áinkiaiti.

²² Tuma asa tuke ju̱tikiú pujurniuiti. Jiniumsha apemawai tura mátaj tusa entsá aju̱a̱wai. Yaintrukminiaitkiumka waitneasam yáintrukta” tímiayi.

²³ Tutai Jesus chicharuk “¿Urukamtai yaintrukminiaitkiumka túrutam? Nekaata, shuar Winia nekas enentáimturna nu ashí túramniaiti” tímiayi.

²⁴ Tutai uchi aparí̱ kakantar chichaak “Uuntá, nekas enentáimtajme. Nekas enentáimtustinian táasjana nu yáintkiata” tímiayi.

²⁵ Tura shuar untsurí kaunainian Jesus wainiak kakantuk “Empeku chichachu awajin iwianchi jiinkitia, tájame. Jiinkim ataksha waya̱waip” tímiayi.

²⁶ Tura íwianch jíiniuk untsumak uchin we wérkasá ajakar chichichiptú aepkimiayi. Túram uchi jakaa ímianis tepemiayi. Túrunamtai untsurí shuar “jakayi” tiármiayi.

²⁷ Támanak Jesus uwejnum achik awajkimiayi tura uchi nantaki̱ wajakmiayi.

²⁸ Tura Jesus je̱á̱ waya̱mtai niṉki pujusár ni unuiniamuri̱ aniasar “¿Urukamtai iisha jí̱i̱ktin tujintkiamaji?” tiármiayi.

²⁹ Tutai Jesus chicharainiak “Íwianch jú̱nikkia náṉkamtsuk jí̱i̱kchamniaiti antsu aya Yus áujkur jí̱i̱kminiaiti” tímiayi.

Jesus ataksha ni jákatniuri̱n ujakma

³⁰ Nuyá̱ jíinkiar Kariréanmaani̱ naṉkaamakiarmiayi. Ni unuiniamuri̱n unuinia asa nu naṉkaamamun nekaawara̱i̱ṉ tusa Jesus nakitmiayi.

³¹ Unuiniak ju̱na chichaak “Wi Aents Ajasuitiaj ju̱na mantamnati tusar achirkar surutkartatui. Tura máamuitiatnak iwiarsamunmaya̱n menaintiú tsawant nantaktiatjai” tímiayi.

³² Tura nu chichaman nekaacharmiayi. Nékainiachiat anintrústinian arantúkarmiayi.

¿Yaki imiá naṉkamantuit?

³³ Nuyá̱ Kapernáumnum jeawarmiayi. Tura Jesus je̱á̱ pujus ni unuiniamuri̱n anintruiniak “¿Atumsha jintiá winisrum warí áujmatmiarum?” tímiayi.

³⁴ Tura natsa̱a̱rar pachischarmiayi. Kame jintiá wésar “iiji̱a̱i̱ ¿yaki imiá naṉkamantu ajasat?” tunainiarmiayi.

³⁵ Ni unuiniamuri̱ pachischarmatai Jesus pujus ashí tuse unuiniamuri̱n irur chichaak “Shuar nekas naṉkamantu ajastajtsa wakerakka péejchachia nuke enentáimtumar shuara yaintri̱ atí” tímiayi.

³⁶ Tura uchin itiá miniakas chichaak

³⁷ “Shuar uchin winia naarui̱ shiir awajeakka Winia shiir awajtawai. Tura Winia akuptúkua nunasha shiir awajeawai” tímiayi.

Shuar nakitramachkuṉka iin páchitkiawai

³⁸ Nuyá̱ Juaṉ Jesusan chicharuk “Uuntá, shuar ame náarmin pachis iwianchin akupea wainkiamji. Tura iiji̱a̱i̱ írutkachu asamtai nu túratin suritkiamji” tímiayi.

³⁹ Tutai Jesus chicharuk “Antsu suritkiairap. Shuar winia náarun pachis tujintkiamun túrakka, nu shuar wari tsanumprutratniun tujintkiattawai.

⁴⁰ Shuar iin nakitramachkuṉka iin páchitkiawai.

⁴¹ Winia nemartaku asakrumin shuar entsaachinkisha ajampramkuṉka ántar túratsui antsu nekasan tájarme, nuka akikma átatui.

⁴² Tura shuar ju̱ uchin Winia enentáimturas umirtuinia nuna yajauchin túrumtikiamtaiṉkia ti asutniáttawai. Tuma asamtai uchin yajauchin túrumtiktsa̱i̱ṉ kuntujnum kayaja̱i̱ jiṉkiar nayantsanam aju̱ṉmaka maak ainti.

⁴³ Ame uwejmek yajauchin túrumtikramamniaitkiuiṉkia tsupikta. Mai̱ uwejtuk wáitsatniunam jeatniuja̱i̱ṉkia chikichík uwejja̱i̱ ju̱ nuṉkanam pujusár tuke iwiaaku pujustinnium jeatin tí shiiraiti. Warí, wáitsatniunmaṉka ji kajinkiashtin awai,

⁴⁴ jákaru akarí̱sha jáiniatsui tura jisha tuke kapa̱a̱wai.Isa. 66:24

⁴⁵ Nawemsha yajauchin túrumtikramamniaitkiuiṉkia nusha tsupikta. Mái̱ nawe̱ntuk wáitsatniunam jeatniuja̱i̱ṉkia chikichík nawe̱ja̱i̱ ju̱ nuṉkanam pujusár tuke iwiaaku pujustinnium jeatin tí shiiraiti. Wáitsatniunmaṉka ji kajinkiashtin awai,

⁴⁶ jákaru akarí̱sha jáiniatsui tura jisha tuke kapa̱a̱wai.

⁴⁷ Ji̱misha yajauchin túrumtikramamniaitkiuiṉkia ukuinkiata. Mai̱ jí̱ntiuk wáitsatniunam jeatniuja̱i̱ṉkia chikichík ji̱ji̱a̱i̱ ju̱ nuṉkanam pujusár Yus akupeana nui̱ jeatin tí shiiraiti,

⁴⁸ wáitsatniunmaṉka jákaru akarí̱sha jáiniatsui tura jisha tuke kapa̱a̱wai.

⁴⁹ Namaṉ Yus susamu weaktinia áintsaṉ aentstirmesha jiji̱a̱i̱ nekapnastatrume.

⁵⁰ Weesha tí peṉkeraitiat michumárka ¿itiurak jeá jeat átiṉᵏⁱ? Wats, wee jeakua áintsarmek atumek shiir enentáimtunaistarum” tímiayi Jesus.Mat. 5:13-16