Mar. 7 - Yus Papí: Shuarja̱i̱ Yus Yamaram Chicham Najanamu

Jesus Pariséun áujmatsarma

¹ Pariséusha, Israer shuara jintinniuri̱sha Jerusaréṉnumia̱ Jesusan tariarmiayi.

² Tura Jesusa unuiniamuri̱n ikijmiatsuk yurumun wáinkiar “Israer shuara túrutairi̱n túruiniatsui” tiármiayi.

³ (Kame Pariséusha tura ashí Israer shuarsha ni uuntri̱ jintintiámuri̱n umikiar ti núkap ikijmiárar yurumin ármiayi.

⁴ Péprunmaya̱ tarí “ikijmiatsuk yurumáshtiniaiti” tiniu ármiayi. Tura ti untsurí ni uuntri̱ túrutairi̱ núnisaṉ ármiayi. “Tsapancha, ichiṉnasha, jiruncha, peaknasha nijiakartiniaiti” tiniu ármiayi.)

⁵ Tuma asamtai Pariséusha Israer shuara jintinniuri̱sha Jesusan chicharainiak “¿Urukamtai ame unuiniamuram ii uuntri̱ jintintramniuitiaj nuna túruiniatsu? ¿Urukamtai ikijmiatskesha yurumáinia?” tiármiayi.

⁶ Tutai Jesus chicharainiak “Ántar chichamtiniaitrume. Isayas yaunchu atumín nekas ju̱na áartampramiayi. Ju̱ aents ni wene̱ja̱i̱ Winia ‘ti péṉkeraiti’ turutainiawai tura ni enentái̱nkia jeachat pujuiniawai.

⁷ Tura túkeneas Winia shiir awajtuiniawai. Aentsu chichame̱ jintintiáiniayat ‘Yus Chichamaiti’ tuíniawai. Isa. 29:13

⁸ Tura átum Yusa Chichame̱ iniaisarum aentsu jintintiámuri̱ umirkarum ichiṉnasha tsapancha nijiaktin tura chíkich túrutai̱sha áintsarmek untsurí túrarme.

⁹ Túrakrum Yus Chichamka tsukintiaani̱ ikiusurme atumí uuntri̱ chichame̱ umirkatai tusarum.

¹⁰ Kame Muisais yaunchu aar ju̱na tíchamka. Ame apa tura nuku shiir enentáimtusam umirkata.Jiin. 20:12; Muis. 5:16 Shuar ni aparí̱n, nukurí̱ncha yajauchiniam yumiṉkraka nu shuar ti nekas mántamnatniukete.Jiin. 21:17

^11-12 Túrasha átumka Pariséutirmeka, antsu ju̱ tárume ‘Shuar ni aparí̱n ni nukurí̱n chicharuk “Wi yáiṉtinian takakjana nu Kurpanaiti” tákuiṉkia, atumsha péṉkeraiti aparí̱ncha nukurí̱ncha yáiṉchati’ tárume. (Kurpan tana nuka, Yus susamu, tawai.)

¹³ Nekaatarum, Pariséutiram ‘Ii uuntri̱ yáunchuya túrutai̱ tuke umiki̱ wétiniaitji’ tákurum Yus Chicham peṉké ántar chichama núnin awajearme. Núnisrumek chikicha untsurí túrarme” tímiayi Jesus.

¹⁴ Nuyá̱ ataksha Jesus ashí shuaran untsukar “Mash anturtuktarum túrarum ashí nekaatarum.

¹⁵ A̱a̱ya̱ aya̱shnium waya̱a̱na nu, shuaran yajauch awajsachminiaiti antsu aentsu enentái̱nia̱ jiinia nu, yajauch awajsattawai.

¹⁶ Shuar nuna ántakka enentáimprati” tímiayi.

¹⁷ Nuyá̱ aentsun ikiuak je̱a̱ waya̱mtai ni unuiniamuri̱ aniasarmiayi “¿Nu métektaku chicham warintiua?” tiármiayi.

¹⁸ Tutai Jesus chicharainiak “Atumsha nékatsrumek. Páantchakait, yurumak yúajnia nu, enentáiniam waya̱chu asa shuaran yajauch awajsachminiaiti.

¹⁹ Antsu wakenam wayá̱ náṉkamas meṉkaatsuk” tímiayi. Nuna taku ashí yurumak páchitsuk yuámniaiti tímiayi.

²⁰ Nuyá̱ chichaak “Shuara enentái̱nia̱ jiinia nu, yajauch awajsámniaiti.

²¹ Shuara enentái̱ya̱, initia̱, yajauch enentáimsatniusha, tsanirmatniusha, natsa tsanirmatniusha, shuar mátniusha,

²² kasamkatniusha, chikichna wakeruktincha, péṉkercha túratniusha, anaṉkatniusha, natsantain átincha, yajauch enentáimtustincha, tsanumpratniusha, waantu enentáimtumastincha, netse túratniusha, ashí nuka initia̱ wininiatsuk.

²³ Ashí nu tunáa ainia nu, shuara enentái̱nia̱ jiiniu asa, shuaran yajauch awajainiawai” tímiayi.

Serupinísianmaya̱ nuwa̱ Jesusan nekas enentáimtusma

²⁴ Tírusha tura Setun péprusha Serupinísianam ármiayi. Nuka Israer shuara nuṉke̱chuyayi. Nu nuṉkanam Jesus wémiayi. Tura je̱á̱ wayá̱ pujusmiayi. Tura nui̱ pujamun nu nuṉkanmaya̱ shuar nekarawara̱i̱ṉ tusa nakitmiayi túrasha ú̱mkatniun tujintkiamiayi.

²⁵ Wárik nu nuṉkanmaya̱ nuwa̱ Jesus pujan nekaamiayi. Nu nuwa̱ nawantri̱ íwianch eṉkemtuamuyayi. Tuma asa Jesusan tarí ni nawe̱n piniakum tepersamiayi.

²⁶ Nu nuwa̱ Israer shuarcha, Serupinísianmaya̱uyayi. Túmaitiat nawantru enentái̱ya̱ íwianch ji̱i̱rturkitia tusa Jesusan seamiayi.

²⁷ Tutai Jesus nuwa̱n chicharuk “Uchi emka ejemararti. Uchi apatkuri̱ atankir ya̱wa̱ch súsatin péṉkerchaiti” tímiayi.

²⁸ Tutai nuwa̱ aya̱k “Nekas Uuntá tame. Tura ya̱wa̱chisha ekentsa yurumtai̱ wakenam pujuinia nu uchi apatkun yurumuk ju̱yu̱mak akakeamun yuíniatsuk” tímiayi.

²⁹ Tutai Jesus chichaak “Péṉker tame. Tuma asam shiir wetá. Ame nawantrumi enentái̱ya̱ íwianch jiinkiyi” tímiayi.

³⁰ Takui̱ nisha wémiayi. Tura ni je̱e̱n jeá ni nawantri̱n íwianch jiinkimtai péṉker ajas peaknum tepan wainkiamiayi.

Jesus empekun tsuarma

³¹ Jesus Tírunmaya̱ jiinkí̱ Setunnum naṉkaamarkutak Tekapurisnumaani̱ naṉkaamaki̱ Kariréa antumiaṉnum ataksha jeamiayi.

³² Nui̱ empeku péṉker chichachun itiariármiayi. Tura uwejmiji̱a̱i̱ antintrukta tusar Jesusan seawarmiayi.

³³ Shuar matsatmanumia̱ Jesus nin akaṉkí̱ jukí̱ kuishi̱n tsara uwejé̱ja̱i̱ tsutsukruamiayi. Tura usukiá nu shuara iniai̱n antintkiamiayi.

³⁴ Tura nayaimpinmaani̱ íimias kakaram mayati chichaak “Epata” tímiayi. Nuka shuar chichamnumka “uranti” tawai.

³⁵ Nu chichamaik ni kuishi̱sha chiṉkiamiayi tura iniai̱sha séermiayi. Tura paant chichasmiayi.

³⁶ Tura Jesus chicharainiak “Peṉké etserkairap” tímiayi. Jesuska surí suritiamaitiat nú naṉkaamas etseriarmiayi.

³⁷ Tura ti enentáimprarmiayi. Enentáimprar “Ju̱ Jesus aya péṉkeran túrawai. Empekuncha ántumtikniuiti tura chichachun chichamtikniuiti” tiármiayi.