Mar. 6 - Yus Papí: Shuarja̱i̱ Yus Yamaram Chicham Najanamu

Jesus Nasarétnum pujusma

¹ Jesus nuyá̱ jiinkí̱ ni nuṉke̱n waketkimiayi. Ni unuiniamuri̱sha nemariarmiayi.

² Nui̱sha ayampratin tsawant jeamtai Israer shuar iruntai̱niam wayá̱ unuiniamiayi. Tura Jesusan anturkarmiania nu ti enentáimsarmiayi. “¿Ju̱sha tui̱ unuimiáruit. Ni nekaatniuri̱ncha yaki súsait. Tura aentsti tujintiajnia nuna Nisha itiurak tura?

³ Ju̱sha numiji̱a̱i̱ takachukait. Marí uchirí̱nchukait. Ni yachi̱sha Sántiaksha, Jusesha, Jútassha, Semuṉsha nékatsjik. Tura ni umai̱sha ju̱i̱ iiji̱a̱i̱ pujuiniatsuk” tiármiayi. Túrawar Nin nekas enentáimtustinian tujintkiarmiayi.

⁴ Túrasha Jesus nin chicharuk “Yúsnan etserniun chíkich nuṉkanmaya̱ṉka shiir anturainiawai. Antsu ní nuṉke̱ya̱ṉka ní shuarsha anturainiatsui” tímiayi.

⁵ Tura nui̱sha ni nuṉke̱nkikia aentsti tujintiamun túratniun tujintkiamiayi. Antsu jaancha aya ishichik ni uwejé̱ja̱i̱ antiṉ tsuármiayi.

⁶ Tura nekas enentáimtacham “¿urukamtai nusha?” tu enentáimsamiayi. Nuya̱sha chíkich péprunam wayá̱ chíkich péprunam wayá̱ Yus Chichaman unuiniakní̱ wekaimiayi.

Jesus etserkarat tusa akuprámu

⁷ Tuse unuiniamuri̱n untsuk jímiar jímiar werum Yus Chicham etserkatarum tusa akupkarmiayi. Tura iwianchin nupetkarat tusa ni kakarmari̱n súsarmiayi.

⁸ Tura chicharuk “Jintiá yurumátniusha jukiirap, u̱yuntrumiincha kuitcha eṉkearum jukirap. Antsu aya ánik wai̱ jukirum wetarum.

⁹ Sapat awekatarum tura entsartincha jímiar jukirap.

¹⁰ Tura je̱a̱ waya̱rmena nui̱ṉ pujustarum, pujá pujakuarum nuyá̱ chíkich peprunmasha wetarum.

¹¹ Tura náṉkamas aents atumín awa̱intiámainiachkuisha, anturtamainiachkuisha nuyá̱ jiinkirum nu shuar yajauch áiniawai tusarum atumí nawe̱ya̱ nuṉka akakekrum ikiuktiarum. Kame Yus aentsun nekapsattana nú tsawant jeamtai nu shuarnaka asutiáttawai. Sutumanmaya̱ aentsja̱i̱ tura Kumuranmaya̱ aentsja̱i̱sha naṉkaamas nin asutiáwartatui” tímiayi Jesus.

¹² Nuyá̱ Jesusa unuiniamuri̱ jíinkiar aentsun ujakar ené enentáimiá ajasár Yusai̱ enentáimtumarat tusar etserkarmiayi.

¹³ Tura iwianchruku enentái̱ya̱ iwianchin ji̱i̱rki̱ akupkarmiayi tura asuitiji̱a̱i̱ yakarar untsurí jáinian tsuararmiayi.

Juaṉ jakamu

¹⁴ Jesusa náari̱n tura ni túramuri̱n ashí aents áujmatin ásarmatai úunt akupin Irutis nuna antukmiayi. Irutiska “Imiakratin Juaṉ jakamunmaya̱ nantakní̱. Tuma asa ti kakaram takaawai” tímiayi.

¹⁵ Tura chíkich shuar “Iríasaiti” tiármiayi. Chikicha “Yúsnan etserniuiti, yaunchu etserniuya núkete” tiármiayi.

¹⁶ Irutis nuna antuk “Nekas Juáṉkaiti. Ni muuke̱n tsupiktinian akupkámiaj nu, jakamunmaya̱ nantakniuiti” tímiayi.

^17-19 Kame úunt akupin Irutis ni yachi̱ Jirip nua̱ri̱n nuatkamiayi. Nu nuwa̱ naari̱ Jirutíasaiti. Juaṉsha úunt akupniun Irutisan chicharuk “Yatsumi nua̱rí̱ akintrukchatniuitme” tímiayi. Tutai nuwa̱ Jirutías Juáṉkan ti kajerkámiayi. Tura Juáṉkan mátaj tusa wakerimiayi. Túrasha úunt akupin Irutis nuna surimkiamiayi. Antsu Juaṉ achikrum sepunam eṉkeatarum tusa akupkámiayi.

²⁰ Juaṉsha tuke enentáiji̱a̱i̱ Yusa jinti̱n wekainiuyayi. Irutis, ni esetar enentáimniun neka asa Juáṉkan ashamak Jirutías wakeramuri̱n túrawa̱i̱ṉ tusa suritkiamiayi. Kame Irutis Juaṉ étserman nékachuitiat antuktinian wakerimiayi.

²¹ Jirutías itiurak máwaj tu pujái̱ úunt akupin Irutis ni akiiniamu tsawantri̱ jeamtai ni suntari̱ncha Kariréanmaya̱ úuntri̱ncha kuítrintin armia nunasha untsukar namperan najanamiayi.

²² Nui̱sha Jirutíasa nawantri̱ wayá̱ jantsemámtai Irutis tura niji̱a̱i̱ nampernum matsamármia nusha shiir enentáimsarmiayi. Túramtai úunt akupin nuwa̱chin chicharuk “Ame wakeram nu seattiá. Wi amastatjai.

²³ Nekas tájame, ashí ame seatmena núnaka amastatjai. Wats, seatkumni̱ṉkia takakjana nuna jímiapetek nakakán amastatjai” tímiayi.

²⁴ Tutai nuwa̱ch jiinkí̱ ni nukurí̱n Jirutíasan chicharuk “¿Wariniak seattaj?” Tutai “Imiakratin Juaṉka muuke̱ seatá” tímiayi.

²⁵ Nu chichamaik nuwa̱ch wari wayá̱ Irutisan chicharuk “Yamaikia uunt amamkunam Imiakratin Juaṉka muuke̱n wakerajai” tímiayi.

²⁶ Nuna takui̱ úunt akupin tí kuntuts enentáimpramiayi. Tura ni tiniu asa ni amikri̱ matsatainia nu antukaru ásarmatai surimkiatniun tujintkiamiayi.

²⁷ Tuma asa úunt akupin Juaṉka muuke̱ itiata tusa ni suntari̱n wárikmas akupkámiayi.

²⁸ Túramtai suntar wari we sepunam Juaṉka muuke̱n tsupikmiayi. Tsupik amamkunam itiá nuwa̱n susamiayi. Túram achik ni nukurí̱n susamiayi.

²⁹ Juaṉ mámun antukar ni unuiniamuri̱ ni aya̱shi̱n iwiarsatai tusar júkiarmiayi.

Seṉku mir áishmaṉkan Jesus ayurawarma

³⁰ Tura Jesusa unuiniamuri̱ Ni akupkarma nu ataksha waketki̱ kaunak irunturarmiayi. Ashí ni túrawarmia nuna unuiniararmia nunasha ujakármiayi.

³¹ Tura untsurí shuar táiniakui nisha aṉkant ajastinniasha yurumátniuncha tujintkiarmiayi. Tuma asamtai Jesus chichaak “Iiji̱a̱i̱ wemí aents atsuiniamunam nui̱ ishichik ayamprarmi” tímiayi.

³² Nuyá̱ Jesus ni unuiniamuri̱ji̱a̱i̱ kanunam eṉkemprar aents atsuiniamunam jeatái tusar jíinkiarmiayi.

³³ Túrasha shuar ni wéenan wáinkiarmiayi. Tura “Jesusaiti” tiármiayi. Tuma ásar ashí péprunmaya̱ untsurí shuar tseke ashintiukar ni jeatniunam nákakarmiayi.

³⁴ Jesus kanunmaya̱ jiinkí̱ ti untsurí aents iruntrar matsatun wainkiamiayi. Murik péṉker wáinchatai̱ya núnisaṉ matsatu ásarmatai Jesus nin wáitnentrarmiayi. Tura núkap unuiniararmiayi.

³⁵ Nuyá̱ kí̱akui̱ ni unuiniamuri̱ Jesusan tariar chicharainiak “Atsamunam pujatsjik tura yamái kí̱atsuk.

³⁶ Shuar wari akupkarta. Tíjiu̱ch péprunam shuarnumsha wéarti, ni yurumkari̱ sumarmakaratⁱ” tiármiayi.

³⁷ Tutai Jesus chichaak “Atumek ayuratarum” tutai “Iisha ju̱ shuar ayuratai tusar ¿jimiará sian kuitji̱a̱i̱ yurumak sumaktai tusar wétinkiaitiajⁱ?” tiármiayi.

³⁸ Tura Jesus ni unuiniamuri̱n chicharainiak “Paṉ takakrum nu iistarum ¿urutmak aa?” tímiayi. Tutai nekapmarar chichainiak “Paṉka séṉkuchikiti tura namaksha jímiarchikiti” tiármiayi.

³⁹ Tutai Jesus chichaak “Ju̱ shuar chírichriniam pujusárti tusar akupkatarum” tímiayi.

⁴⁰ Aṉkant aṉkant sian siancha seṉkuintia seṉkuintia iruntrar matsamsarmiayi.

⁴¹ Jesuska seṉku páṉkan jímiar namaknasha jusa yakí̱ nayaimpinmaani̱ íimias Yusan yumiṉsamiayi. Tura yurumkan púurmiayi. Puur ni unuiniamuri̱n súsarmiayi. Namaknasha puur súsarmiayi ashí shuaran ajamsarat tusa.

⁴² Ashí yurumáwar ejemararmatai

⁴³ puunaruncha namak ampirmancha achikiar tuse chaṉkinian áimkiar júkiarmiayi.

⁴⁴ Nu yurumkan ti untsurí yurumáwarmiayi. Aya áishmaṉkak seṉku mir ármiayi.

Jesus entsá pátatek wekasamu

⁴⁵ Nuyá̱ Jesus ni unuiniamuri̱n chicharainiak “Kanunam eṉkemprarum katiṉkrum amain émaa ajatarum Petsaitianam Wisha ju̱ shuaran áujsan ikiukiartaj” tímiayi.

⁴⁶ Shuaran áujas ikiukí̱ Yusja̱i̱ chichastaj tusa nainnium wémiayi.

⁴⁷ Tura kirit ajasmanum kánuka antumiaṉnum ajapén nanamiayi. Jesuska niṉki juákmiayi.

⁴⁸ Jesusa unuiniamuri̱sha wiá wiantainiakua ti pimpikiarmiayi, nase tukumma ásar. Nuna Jesus wainiak tsawa̱rtin ishichik ajasmatai entsá pátatek wekas nin jeariármiayi. Tura naṉkaamaktiasa wea núnisaṉ wémiayi.

⁴⁹ Jesus entsá wekaan ni unuiniamuri̱ wáinkiar wakanchashit, tu enentáimprarmiayi. Túrawar ti untsumkarmiayi.

⁵⁰ Ashí wáinkiar ti ashamkarmiayi. Tura Jesus nú chichamaik nin chicharainiak “Kakaram ajastarum, Witjiai ashamprukairap” tímiayi.

^51-52 Nuiṉkia kanunam eṉkempramtai nasesha majaantmiayi. Ni unuiniamuri̱nkia enentái̱ kiritia áintsaṉ ásarmatai Jesus yurumkan núkap awajsámia núja̱i̱sha núnaka paant nekaatniun tujintkiarmiayi. Tuma ásar yamái túrunamu itiurak ankia tusar ti enentáimprar sapijmiakarmiayi.

Jesus Jinisarítniumia̱n tsuarma

⁵³ Nuya̱ṉka katiṉkiar Jinisarít nuṉkanam jeawarmiayi. Jeawar kanun aju̱i̱niarmiayi.

⁵⁴ Kanunmaya̱ jíintrarmatai nu nuṉkanmaya̱ shuar Jesusan nekaawarmiayi.

⁵⁵ Tura “Jesus pujawai” táman antukar ashí je̱a̱nmaya̱ jaan peakri̱ntiuk Jesus pujamunam itiaarmiayi.

⁵⁶ Tura Jesus wekaak wemia nui̱sha péprunmasha shuar matsatmanumsha ishichik mátsatkamunmasha jaan itiariar jintiá aeprusarmiayi. Túmainiak Jesusan pushirmin antiṉtaj tusar seawarmiayi. Tura ashí antiṉkiarmia nuka péṉker ajasármiayi.