Mar. 4 - Yus Papí: Shuarja̱i̱ Yus Yamaram Chicham Najanamu

Atsaamin atsaampramu

¹ Nuyá̱ jiinkí̱ antumiaṉka yantamén Jesus ataksha unuiniartinian juárkimiayi. Tura untsurí shuar iruntrarmatai kanunam eṉkempramiayi. Shuarsha antumiaṉka kaanmatkari̱n pujuarmiayi.

² Jesuska métektaku chichamja̱i̱ ti jintintiármiayi. Jintintiuk ju̱na tímiayi

³ “Antuktarum. Atsaamin atsaamprataj tusa jiinkimiai.

⁴ Atsaamkui ni arakri̱ jintiá iniararmai. Chiṉki yakiya̱ káutkar yúawarmai.

⁵ Chikicha kaya írunmanum iniararmai, nuṉka ishichik ámanum. Tura nuṉka ishichik asamtai wárik tsapainiarmai.

⁶ Tura etsa̱ etsantar sukuam kaṉkape̱ atsá asamtai káararmai.

⁷ Chikicha jaṉkí nupa̱nam iniararmai. Jaṉkisha tsapainiar kaṉkar ajakrarmai túram nerekcharmai.

⁸ Chikicha péṉker nuṉkanam iniararmai. Tura tsapainiar nerekarmai, chíkich traintia tura chíkich sasaintia nuyá̱ chíkich sian nerekarmai.

⁹ Kuíshim ákuiṉkia antuktarum” tímiayi.

¹⁰ Untsurí wéarmatai ishichik Niji̱a̱i̱ juákarmia nu ni tuse unuiniamuri̱ji̱a̱i̱ aniasarmiayi “¿Ame jintintiamna nusha warimpiait?” tiármiayi.

¹¹ Tutai Jesus chichaak “Yuska ni akupeamuri̱n yáunchusha nekaachma nuna atumín paant nekamtikramattsa wakerutmarme. Antsu chikichnaka aya métektaku chichamja̱i̱ jintintiáwartatui.

¹² Íimiataṉ wáinkiacharat tusa, antukarsha nekaacharat tusa, umirtsuk ni yajauch túrutairi̱ tsaṉkurnarcharat tusa túrattawai.” Isa. 6:9-10; Jrm. 5:21

¹³ Tuke chichaak “Wi jintintiajrumna nú métektaku chicham nekaachurmek. Nu nékachkurmeka ¿itiurak chíkich métektaku chichamsha nekaatarum?

¹⁴ Atsaamniua nuka Yus Chichaman étserna nuna nakumui.

¹⁵ Jiṉkiái jintiá iniaarua nuna chíkich shuar ántuiniamun nakumui. Nu shuar chichaman ántuiniawai. Tura antukarmatai Satanás wárik tarí ni enentái̱n araamun jurawai.

¹⁶ Chíkich shuar ántuiniamu kayanam atsaampramua núniskete. Nisha chichaman antukar wárik warainiak umiktasa wakeruiniawai.

¹⁷ Tura nisha kaṉkaprurcha ásar aya ishichik katsuiniawai. Tura ukunam Yus Chichaman wakeruk umirainiayat shuar kajeram tura chíkichkia itiurchatan wáinkiar Yusai̱ya̱ kanainiawai.

¹⁸ Chíkich ántuiniamuka jaṉkí nupa̱nam atsaampramua núniskete. Nu shuar Yus Chichaman ántuiniawai.

¹⁹ Ántuiniayat ju̱ nuṉkanam ana nuna tí pachiniawai. Tuma ásar kuítian tura shíirmachin ti takustinian wakeruiniawai. Nú wakeramu ni enentái̱n Yus Chicham ana nuna kaṉkar emeṉkátui. Tuma asamtai nerektinian tujintiainiawai.

²⁰ Tura chíkich ántuiniamusha péṉker nuṉkanam atsaampramua núniskete. Nú shuarsha Yus Chichaman antukar umiiniawai. Tura nerenawai, chíkich shuar traintia tura chíkich shuar sasaintia nuyá̱ chíkich shuar siancha nerenawai” tímiayi.

U̱kma nu paant nekanattawai

²¹ Ataksha Jesus chichaak “¿Shuar shiripkin ekeemak pitiaknum eṉkeattawak. Peaknum wá̱mtak ikiustatuak? Atsá. Antsu shirikip paant awajaishtinkiait.

²² Núnisaṉ ashí u̱kma nu ukunam paant nekanattawai. Tura núnisaṉ ishishmasa chichasmasha ukunam paant nekanattawai.

²³ Kuíshim ákuiṉkia antuktarum.”

²⁴ Tura ju̱nasha chichaak “Ántarmena nu esetrarum enentáimtustarum. Átum nekapmarmena nu nekapkaja̱i̱ṉᵏⁱ atumniaka íniaṉkasaṉ nekapmatmattarme.

²⁵ Tuma asamtai shuar núkap takakuka nú nukap patatnástatui. Antsu chíkich shuarka ishichik takakuk jurunkíttiawai.”

Yusa akupeamuri̱ jú̱nisaiti

²⁶ Nuyá̱ Jesus chichaak “Yusa akupeamuri̱ jú̱nisaiti. Shuar araka araana núnisaiti.

²⁷ Arakmak núkap tsawantcha káshisha urukanpiai tusa nákawai. Tura itiura tsapainia núnaka nékatsui.

²⁸ Kame jiṉkiái nuṉkanam init aku niṉki tsapatsuk. Emka nukareawai nuyá̱ kuku̱jruk nerek katsua̱wai.

²⁹ Túruna katsunmatai júuktin tsawant jeayi tusar juíniawai.”

³⁰ Ataksha Jesus chichaak “¿Kame Yusa akupeamuri̱ itiurtinjiak. Wariji̱a̱i̱ṉᵏⁱ métektakuit?

³¹ Mustasa jiṉkiái araamua nuja̱i̱ métektakuiti. Nu jiṉkiaisha ashí naṉkaamas ishitiúpchiti.

³² Túmaitiat araam tsapái̱ ashí árak naṉkaamas uunt numi tseṉker tseṉker ajasmatai chiṉkisha mikintrari̱n pasuṉmainiawai” tímiayi.

³³ Núnisaṉ Jesus untsurí métektaku chichamja̱i̱ Yus Chichaman ujaamiayi. Ni nekaatniun jearmia nunak ujaamiayi.

³⁴ Chíkich shuaran aya métektaku chichamja̱i̱ ujaamiayi. Antsu ni unuiniamuri̱ji̱a̱i̱ Niṉki pujus ashí paant jintintrarmiayi.

Jesus nasencha entsancha imijiánma

³⁵ Nu tsawantai̱ etsa̱ akaikímtai Jesus ni unuiniamuri̱n chicharainiak “Amaini̱ katiṉtai” tímiayi.

³⁶ Tutai kanunam eṉkemprarmiayi. Chíkich shuarnaka kaanmatkanam ikiuiniak Jesusan kanunam eṉker júkiarmiayi. Chíkich kanunmaya̱sha atampriarmiayi.

³⁷ Nui̱ wenai̱ nasesha ti násenmiayi. Túmak chíchimi kanunam yaráná piáktajtsa ajamiayi.

³⁸ Túmai̱ṉ Jesuska kanú seṉkari̱n atamprus kanúu tepemiayi. Tura ni unuiniamuri̱ Jesusan ishintiak “Uuntá ii waya̱jnia ju̱ka pachikratsumek” tiármiayi.

³⁹ Tutai Jesus nantaki̱ nasen kakanteak “Takamatsata” tura entsanka chicharuk “Miyaaku ajasta” tímiayi. Tutai nasesha meṉkakamiayi, entsasha miyaaku ajasmiayi.

⁴⁰ Túrunamtai Jesus ni unuiniamuri̱n chicharainiak “¿Urukamtai ashamarum? Túkek Yuska nekas enentáimtatsrum” tímiayi.

⁴¹ Tura imiá ashamainiak “¿Maa ju̱sha yait? Nasesha entsasha nin umirainiatsuk” tunaiyarmiayi.