Mar. 3 - Yus Papí: Shuarja̱i̱ Yus Yamaram Chicham Najanamu

Uweje̱ jakaan Jesus tsuarma

¹ Ataksha chíkich tsawantai̱ Israer shuar iruntai̱niam Jesus waya̱miayi. Nui̱ aents ámiayi, ni uweje̱ jaka.

² Tura tunaan túrayi titiai tusar wakeruiniak “ayampratin tsawantai̱ tsuártimpiash” tusar Pariséu shuarsha Jesusan ii pujuriarmiayi.

³ Nuiṉkia Jesus uweje̱ jaka shuaran chicharuk “Ajapén wajasta” tímiayi.

⁴ Nuiṉkia mamikmaun chicharuk “¿Ayampratin tsawantai̱ péṉker túratin yajauch túratniuja̱i̱ túa imiá péṉkerait. Shuar uwemtikratin mátniuja̱i̱ túa imiá péṉkerait?” tímiayi. Nuna takui̱ nisha pachischarmiayi.

⁵ Tura Jesus kajek nin iyarmiayi tura ni enentái̱n kátsuram ásarmatai kúntuts enentáimsamiayi. Tura shuaran chicharuk “Uwejé̱m iniakmasta” tímiayi. Iniakmasmatai ni uweje̱ jákauya nu ataksha péṉker ajatsamiayi.

⁶ Nuyá̱ Pariséu shuar jíinkiar Jesus maami tusar Irutis shuarja̱i̱ áujmatsarmiayi.

Untsurí shuar Jesusan káutkarma

⁷ Nuyá̱ Jesus ni unuiniamuri̱ji̱a̱i̱ antumiaṉnum wémiayi. Kariréanmaya̱ tura Jutanmaya̱sha untsurí shuarsha Jesusan nemariarmiayi.

⁸ Untsurí nuṉkanmaya̱sha káunkarmiayi. Jutanmaya̱sha Jerusaréṉnumia̱sha Itiumíanmaya̱sha Jurtan amainia̱sha Tiru tura Setun pepru pujuinia nú nuṉkanmaya̱sha untsurí shuar ni túramuri̱n nekaawar Jesusan káutkarmiayi.

⁹ Untsurí káunkar chanuntawara̱i̱ṉ tusa Jesus ni unuiniamuri̱n kanuram inianástarum tusa seamiayi.

¹⁰ Kame untsurí shuaran Jesus nuik tsuaru asamtai jaa shuar nui̱ káunkarmia nu Jesusan antiṉtaj tusar shitianainiakui nuna seamiayi.

¹¹ Tura iwianchrukusha Jesusan wáinkiar tikishmátrarmiayi. Untsumainiak “Ame nekas Yusa Uchirí̱nme” tiármiayi.

¹² Tura nuna etserkairap tusa Jesuska kakantramiayi.

Jesus tuse shuaran anaikiarma

¹³ Nuyá̱ Jesus nainnium wakamiayi. Tura anaikiatniun wakerimia nú shuaran untsukmiayi. Tura nisha Jesusan weriarmiayi.

¹⁴ Tura Niji̱a̱i̱ wekasar Yus Chichaman unuiniartinian tuse shuaran anaikiarmiayi.

¹⁵ Nuyá̱ suṉkur tsuártinian tura íwianch ji̱i̱ki̱ akupkatniun nu shuaran ni kakarmari̱n súsarmiayi.

¹⁶ Ju̱ shuar anaikiarma ármiayi, Semuṉ, Jesus chíkich náarin Pítiur apujtusmiania nu

¹⁷ tura Sepetéu uchirí̱ Jakupu, ni patái̱ Juaṉsha, ipiamtaja̱i̱ métek kakaram ásarmatai nuna mai̱ “Puanérjis” naari̱ susamiayi. Nusha shuar chichamja̱i̱ṉkia “ipiamat” tawai.

¹⁸ Nuyá̱ Antressha, Jirip, Parturumí, Matéu, Tumas, Arpeu uchirí̱ Jakupu, Tateu, Ásump Semuṉ,

¹⁹ Jútas Iskariúti. Jesusan ukunam surukmia nú Jútasauyayi. Anaik amukmatai je̱á̱ waketrarmiayi.

Yusa Wakaní̱n yajauch chicharma

²⁰ Waketkiarmatai ti untsurí shuar táarmatai takatri̱ ti akui yurumátniun jeacharmiayi.

²¹ Jesusa shuari̱sha nuna nekaawar Jesus ti itiurchat pujus wáurtsuash tu enentáimsar jukitiai tusar nu je̱a̱nam jeariármiayi.

²² Nuyá̱ Israer shuara jintinniuri̱ Jerusaréṉnumia̱ taarmia nu Jesusan áujmatainiak “Pirsepú eṉkea asa iwianchrukuiti. Tuma asa iwianchi uuntri̱ kakarmari̱ji̱a̱i̱ iwianchin ji̱i̱ki̱ akupeawai” tiármiayi.

²³ Tutai Jesus winitiárum tusa nin untsukmiayi. Tura enentáimtikrataj tusa ju̱na tímiayi “¿Íwianch Satanáskesha itiur ajapmamatiṉᵏⁱ?

²⁴ Chikichik nú nuṉkanmaya̱ shuar nuamtak kajernaiyakuiṉkia, nu nuṉka wari meserchattawak.

²⁵ Nuamtak shuar ni shuari̱ji̱a̱i̱ kajernaiyakuiṉkia nu shuarsha amunaikchartatuak.

²⁶ Núnisaṉ ¿Satanáskesha ni suntari̱ji̱a̱i̱ mániakka itiurak tuke pujusárat? Amunaikiartatui.

²⁷ Kakaram shuara nuna je̱e̱n náṉkamas aents wayá̱ nérenniun jiṉkiatsuk ni kuítri̱n kasarkachminiaiti. Antsu emka nérenniun jiṉkiá ni kuítri̱nkia kasarkamniaiti.

²⁸ Nekas tájarme, shuar tunáa ashí túruinia nuka tsaṉkuramniaiti. Winiasha winia Aparnasha yajauch áujmatusha tsaṉkuramniaiti.

²⁹ Antsu Yusa Wakaní̱n yajauch áujmatna nuka tsaṉkurachminiaiti antsu nu shuar niṉki tuke sumamattawai” tímiayi.

³⁰ “Jesuska iwianchrukuiti” tuíniakui Jesus nuní̱ tímiayi.

Jesusa yachi̱ tura nukurí̱

³¹ Nuyá̱ ni yachi̱ ni nukurí̱ji̱a̱i̱ taar a̱a̱ wajasar Jesusan untsukat tusa akupkarmiayi.

³² Shuar Jesusan téntak pujuarmia nu chicharainiak “Iis, nukusha, yatsumsha a̱a̱ wajasar untsurmainiawai.”

³³ Tutai Jesus chichaak “Winia nukursha yatsursha ya ainia” tímiayi.

³⁴ Nin téntakar pujuarmia nuna iis “Ju̱i̱ti winia nukurka tura yatsurka.

³⁵ Shuar Yusa wakeramuri̱n umirainia nu winia yatsuruiti, winia umaruiti, winia nukuruiti” tímiayi.