Mar. 2 - Yus Papí: Shuarja̱i̱ Yus Yamaram Chicham Najanamu

Jesus emearun péṉker awajsamu

¹ Kapernáumnum Jesus ukunam ataksha wémiayi. Jeamtai ni je̱e̱n pujan nekaawarmiayi.

² Tuma asamtai shuar nu chichamaik ti untsurí káutkarmiayi. Ti untsurí asa je̱a̱ piákmiayi, wáitinmasha aṉkant atsumiayi. Jesuska Yus Chichaman aentsun ujaak pujuiniai̱

³ ni amikri̱n emearun kuatru shuar tampumpruawar júkiar Jesusan itiarmiayi.

⁴ Tura jeawar untsurí aents írunu asamtai je̱á̱ waya̱tniun tujintkiarmiayi. Tuma ásar yakiini̱ wakar je̱a̱ áaṉkawar tampunam ni amikri̱n Jesus pujamunam itiararmiayi.

⁵ Tura nisha Jesus nekas tsuarattawai tu enentáimmiari̱n Jesus nekáa emearun chicharuk “Uchiru, ame yajauch túrutairmeka tsaṉkuramuiti” tímiayi.

⁶ Israer shuara jintinniuri̱sha nuna antúu pujuarmiayi. Tura ni enentái̱ji̱a̱i̱ enentáimsar

⁷ “¿Ju̱sha urukamtai emearun tu chichara? Yusan imiá yajauch chicharui. Warí, yaki yajauch túramun asakárminiait. Aya Yusak tunaan asakárchamniakait” tu enentáimsarmiayi.

⁸ Jesuska ni enentáimmiari̱n nekarawar “¿Urukamtia átum tu enentáimprum? tímiayi.

⁹ Emearu, yajauch túrutairam tsaṉkuramuiti títinji̱a̱i̱ emearu, wajakím tampuram entsakim wekasata títinji̱a̱i̱ ¿túa imiá yúpichuchit?

¹⁰ Wats wi Aents Ajasu asan Yusa kakarmari̱ji̱a̱i̱ shuara tunaarí̱ tsaṉkuramniaitjiana nuna paant iwiaintiuktatjarme” tímiayi. Nuna tinia emearun chicharuk

¹¹ “Wajaktia tájame túram tampuram jukim je̱e̱miin wetá” tímiayi.

¹² Nu chichamaik emearu wajaki̱ tampuri̱n jukí̱ ashí iimiainiamunmaṉ jiinkimiayi. Nuna túrunamtai ashí iit iit ajarmiayi. Tura “jútikiamu peṉké wáinchaitji” tiar Yusa náari̱n uunt awajsarmiayi.

Jesus Riwin untsukma

¹³ Nuyá̱ ukunam Jesus antumiaṉnum waketkimiayi. Tura ashí shuar káunkarmatai jintintiáwarmiayi.

¹⁴ Tura jintintiawar amuk akupin akitiai̱ je̱a̱nam naṉkaamak Arpeu uchirí̱n Riwin pujan wainkiamiayi. Wainiak “Nemartusta” tímiayi. Tutai Riwí wajaki̱ Jesusan nemarsamiayi.

¹⁵ Chíkich tsawant Riwisha Jesusan ni je̱e̱n itiaamiayi. Tura untsurí kuítian juu shuarsha yajauch shuarsha Jesusja̱i̱ ni unuiniamuri̱ji̱a̱i̱sha ashí nui̱m apatuk ekentsar yútai̱niam pujuarmai.

¹⁶ Tura kuítian juu shuar tura yajauch shuar armia nu Jesusja̱i̱ irunar yurumáinian wáinkiar Pariséu jintinniuri̱sha Israer shuara jintinniuri̱sha Jesusa unuiniamuri̱n aniasarmiayi. “¿Urukamtai ame úuntrum Jesus kuítian juu shuarja̱i̱ tura yajauch shuarja̱i̱sha yuruma?” tiármiayi.

¹⁷ Jesus nuna antuk chichaak “Jaatsna nuka tsuákratniun atsumainiatsui. Antsu jaana nuka tsuákratniun atsumainiawai. Warí ‘péṉkeraitjiai’ tuinia nú shuaran untsuktajtsan táchaitjiai. Antsu ‘tunaitjiai’ tuinia nú shuaran Winia ajasat tusan untsuktajtsan táwitjiai” tímiayi.

Ijiarmár Yus áujsatniun Jesusan aniasma

¹⁸ Juaṉka unuiniamuri̱sha Pariséu unuiniamuri̱sha yurumtsuk Yusan áujiarmiayi. Túmainiakui Jesusan tariar chicharainiak “Juaṉka unuiniamuri̱sha tura Pariséu unuiniamuri̱sha yurumtsuk Yusan áujainiatsuk ¿ame unuiniamurmeka urukamtai yurumtsuk áujainiatsu?” tiármiayi.

¹⁹ Tutai Jesus chichaak “¿Nuatma nampernum ipiaamu ainia nu ijiarmáwartiniak ainia? Yama nuatu pujái̱ ni amikri̱ warainiak ijiarmáchartin áiniawai. Núnisaṉ winia unuiniamur Wi pujakui warainiak yurumtsuk pujuschartin áiniawai.

²⁰ Tura Wi junaktin tsawant jeattawai. Nuiṉkia winia unuiniamur nu tsawant ijiarmáwartatui.

²¹ Kame tarach mamur ja̱a̱nakmatai yamaram tarach anujtúkchatniuiti. Túramka nijiam yamaram tarachia nu anujtúkma nuna naṉkaamas mamushan já̱a̱kchattuak.

²² Núnisaṉ nijiamanch yamái nawamu muits arutnum yarachminiaiti. Túramka karíak muítsan ijiakar ukarámniaiti. Antsu nijiamanch yamái nawamu yamaram muítsnum yaratniuiti” tímiayi Jesus.

Trikiu nere̱ yuamu

²³ Chíkich ayampratin tsawantai̱ Jesus ajanmaṉ ajapén naṉkaamarmiayi. Tura ni unuiniamuri̱ trikiu nere̱n maju̱kiar wéarmiayi.

²⁴ Nuna wáinkiar Pariséu Jesusan chicharainiak “¿Warí, urukamtai ame unuiniamuram ayampratin tsawant takastin surimkiamu ai̱sha takainia?” tiármiayi.

²⁵ Tutai Jesus chicharainiak “Ii uuntri̱ Tawitia túramuri̱ Yus Papinium áujsachukaitrum. Nisha ni nemarniuri̱sha tsukamainiak ni yurumkari̱ atsakui túrawarmia nu áujsachukaitrum.

²⁶ Awiatár Yúsnan pujurniu uuntri̱ pujái̱ Uunt Tawit Yusa Je̱e̱n waya̱miayi. Tura Tawitkia, Yúsnan pujurin naṉkaamas uunt asa, Yúsnan pujurniuchuitiat iniaktusma páṉkan aya pujurin yútainiak yuámiayi. Tura ni nemarniuri̱ncha ajamsamiayi. Nu áujsachukaitrum.

²⁷ Ayampratin tsawantai̱ túrashtinian umirkashtimpiash tusa Yuska aentsun najanachmiayi. Antsu aents ayamprarat tusa Yus ayampratin tsawantan tesamiayi.

²⁸ Wisha, Aents Ajasu asan imia ayampratin tsawantan Nérenniuri̱ntjiai” tímiayi.