Mar. 16 - Yus Papí: Shuarja̱i̱ Yus Yamaram Chicham Najanamu

Jesus nantakmia

¹ Tura ayampratin tsawant naṉkaamasmatai Máktaranmaya̱ Marisha, Sántiaku nukurí̱ Marisha, Sarumáisha, kuṉkuinian Jesusa aya̱shi̱n kuertai tusar sumakarmiayi.

² Tura kashin Tumiṉtin ti káshik nantu yama jiiniai̱ iwiarsamunam jeariármiayi.

³ Wésar chichainiak “Iwiarsamu wáitiri̱ kayancha ¿yaki akaṉkétramkattajⁱ?” tiármiayi.

⁴ Jear uunt kaya akaṉkékman wáinkiarmiayi.

⁵ Iwiarsamunam waya̱war natsa puju nuntuarun entsaru untsuurnumaani̱ pujan wáinkiar ti ashamkarmiayi.

⁶ Túmainiakui natsa chichaak “Ashamkairap. Nasarétnumia̱ Jesus krúsnum jakama nu e̱a̱rme. Iniantkímiuiti. Ju̱i̱ pujatsui. Wátsek ikiusmanum iistarum.

⁷ Túrarum werum Pítrusha, chíkich unuiniamuri̱sha ju̱ ujaktarum. Kariréanam atumín émkiyi. Turammarumna núnisaṉ túruna wainkiattarme” tímiayi.

⁸ Nisha ti ashamainiak purushniarar iwiarsamunmaya̱ tseke wéarmiayi. Ti ashamainia ásar chikichkinkesha ujakcharmiayi.

Máktaranmaya̱ Marin Jesus wantintiukma

⁹ Émkaka Tumiṉtin ti káshik Jesus nantaki̱ Máktaranmaya̱ Marin wantintiukmiayi. Nu Marinmaya̱n siati iwianchin Jesus yaunchu ji̱i̱ki̱ akuptúkuyayi.

^10-11 Marisha Jesusa nemari̱ kúntuts uutu matsatainian werí “Jesus iwiaakui imia wi wainkiajai” tímiayi. Támaitiat anturkacharmiayi.

Jesus jimiará shuaran wantintiukma

¹² Tura urum jimiará shuar Jerusaréṉnumia̱ tsaniṉ wénan Jesus nusháa iira ajas tarimiayi.

¹³ Nisha Jesusan wáinkiar waketkiar unuiniamuri̱n ujakármiayi tura ni chichame̱ncha anturkacharmiayi.

Jesus ni unuiniamuri̱n akupkarma

¹⁴ Nuya̱sha Jesusa aunse unuiniamuri̱ apatuk ekentrar yutai̱niam pekamkar pujuinian Jesus tarí chicharainiak “¿Atumí enentái̱ urukamtai kátsuram ainia, urukamtai Winia nekas enentáimtursachuram?” tímiayi. Ni nantakmiari̱n wáinkiaru chichame̱n anturkacharu ásarmatai kakantramiayi.

¹⁵ Nuyá̱ chichaak “Ashí nuṉkanam wetarum. Túrarum ashí shuarnum Yusa shiir chichame̱ etserkatarum.

¹⁶ Shuar Kristu nekas Yusa uchirí̱nti tiar tú enentáimtuiniana nu imiani̱ uwemprartatui. Shuar antukcharka tuke sumamawartatui.

¹⁷ Shuar winia náarun pachis Yusan nekas enentáimtakka Yusa kakarmari̱n iniakmastaj tusa ju̱na túrawartatui, iwianchin ji̱i̱ki̱ akupkartatui, chíkich chichamja̱i̱ chichasártatui,

¹⁸ napin achiksha, tseasan úmaksha, jaa ajaschartatui. Jaa shuaran ni uwejé̱ja̱i̱ antiṉ, nu shuaran péṉker awajsártatui” tímiayi.

Jesus nayaimpiniam wakamu

¹⁹ Jesus chichas amukmatai Yus nayaimpiniam jukimiayi. Túruna Yusa untsuurí̱ni̱ pujusmiayi.

²⁰ Ni unuiniamuri̱sha jíinkiar ashí nuṉkanam Yus Chichaman etserkarmiayi. Tura Uunt Yus nin yáiṉmiayi. Tura etserainiakui ashí aents ni kakarmari̱n nekaawarat tusa aentsti tujintiamun túratniun susamiayi. Nuke atí.