Mar. 14 - Yus Papí: Shuarja̱i̱ Yus Yamaram Chicham Najanamu

Jesus chícham jurusma

¹ Jímiarchik tsawant ajasmiayi Paskua tutai námper jeatin. Paskua nampertincha karin eṉketáchma páṉkan yúatin nampernasha métek najanin ármiayi. Yúsnan pujurniu úuntri̱sha tura Israer shuara jintinniuri̱sha Jesusan anaṉka achikiar maatai tusar wakeriarmiayi.

² Túrasha “Námper tsawantin túrachmi aents charaatum ajara̱i̱ṉ tusar” tiármiayi.

Nuwa̱ Jesusan kuṉkuinian ukatramu

³ Jesussha Petanianam tunamáru Semuṉka je̱e̱n ekentsa yurumtainiam pujan nuwa̱ tarimiayi. Nartu kuṉkuinian arapástru tutai kaya najanamunam piákun itiamiayi. Nu kuṉkuin tí kuitiaiti. Mutí chuchuke̱ kupik Jesusa muuke̱n kuṉkuinian ukatramiayi.

⁴ Tura nui̱ pujuarmia nu, kajerar tunaiyarmiayi “¿Urukamtai ju̱ kuṉkuinian ántar wasurea?

⁵ Ju̱nasha súrakka menaintiú sian kuítnium surukminiuyi. Nu kuitcha kuítrinchan súsaṉka maak” tiármiayi tusa nuwa̱n kajerkarmiayi.

⁶ Antsu Jesus chicharainiak “Iniaisatarum. ¿Urukamtai au kajerarum? Winia shiir túrutayi.

⁷ Kuítrincha atumji̱a̱i̱ tuke íruntsuk. Wakerakrumka tuke péṉker awajsatniuitrume. Antsu Wikia atumji̱a̱i̱ tuke pujushtatjai.

⁸ Ju̱ nuwa̱ ashí ni túramnia núnaka umikiai. Wi jákatin jeatsa̱i̱ṉ iwiarsatin kuṉkuinian shiir ukatrurai.

⁹ Nekas tájarme, ashí nuṉkanam Yus Chicham etsernaktatna nui̱ ju̱ nuwa̱ túramuri̱sha etsernaktatui, nin kajinmatkiara̱i̱ṉ tusa” tímiayi.

Jútas Jesusan suruktaj timia

¹⁰ Nuyá̱ Jútas Iskariúti, Jesusa unuiniamuri̱ntiat Yúsnan pujurniu úuntri̱n werimiayi Jesusan suruktaj tusa.

¹¹ Nisha nuna antukar warasar “Kuit amastatji” tiármiayi. Jútassha Jesusan itiurak yúpichuch tsaṉkamkattaj tusa enentáimias wekaimiayi.

Jesusja̱i̱ iruntrar yurumáwarma

¹² Karinji̱a̱i̱ pachimprachma páṉ yutai̱ námper náṉkamma tsawant tsawa̱rmatai Paskua nampertin yúatin murik mátin jeamtai Jesusa unuiniamuri̱ iniasarmiayi “Páskuatin murik yúatin iwiaratai tusar ¿tui̱ wétatajⁱ. Tui̱ yurumáttam?” tiármiayi.

¹³ Tutai Nisha jimiará unuiniamuri̱n akatar akupeak “Péprunam wetarum. Nui̱ áishmaṉ yumin jukí̱ wea wainkiattarme. Nu áishmaṉ nemarsatarum.

¹⁴ Waya̱na nui̱ je̱á̱ nérenniuri̱ chicharkuram ‘¿Wisha unuiniamurja̱i̱ tui̱ yurumáttaj? Uunt túramui’ titiarum.

¹⁵ Nu nérentin yakí̱ uunt tesamunam ashí iwiaramun iniakturmastatrume. Nui̱ námper ii najanatin iwiaratarum” tímiayi.

¹⁶ Ni unuiniamuri̱ wéar péprunam jeawar Jesus timia núnisaṉ wáinkiarmiayi. Tuma ásar Paskua namperan iwiararmiayi.

¹⁷ Nuyá̱ kí̱akui̱ Jesus ni tuse unuiniamuri̱ji̱a̱i̱ waya̱warmiayi.

¹⁸ Nisha ekentsa yurumtainiam pekamak yurumáiniak pujusár Jesus chicharainiak “Nekas tájarme, chikichík shuar Wiji̱a̱i̱ yurumna nu surutkattawai” tímiayi.

¹⁹ Nuja̱i̱ kúntuts enentáimprarmiayi. Chíkich chíkich Jesusan aniasar “wíashitiaj” tiármiayi.

²⁰ Jesus chichaak “Túsenmaya̱ chikichik nu piniṉnumaṉ jimiartukan yuajna nu Winia surutkattawai.

²¹ Nekas Wi Aents Ajasuitjiana ju̱ jákatniunam wéajai áarturma áintsanak. Tura áishmaṉ súrutna nu ti wáitsattawai. Nisha akiinmainchu ajakuiti” tímiayi.

²² Yurumáiniak Jesus Yusan yumiṉkias yurumkan achik puuk chicharainiak “Achiktarum, ju̱sha winia aya̱shruiti” tímiayi.

²³ Piniṉnasha achik Yusan yumiṉkias ni unuiniamuri̱n súsarmiayi. Ashí umararmiayi.

²⁴ Umararmatai Jesus chicharainiak “Ju̱i̱ti winia numpar untsurí aentsun yáiṉkiartinian puártatna nu. Nuja̱i̱ Yamaram Chichaman Yus najanaiti.

²⁵ Nekasan tájarme, yamaikia ju̱ya̱ṉka uwa yumiri̱nkia atakka peṉké umarchattajai. Antsu tsawant jeattana nui̱ Yus akupeamunam yamarman umartatjai” tímiayi.

Pítiur Jesusan natsantratin ujakma

²⁶ Yus kantan kantamáwar jíinkiar Uriwiu nainnium wéarmiayi.

²⁷ Nuiṉkia Jesus nin chicharuk “Ju̱ kashi átum natsantrurtatrume. ‘Murikiu wáinniun máattajai túramtai murik tsakiṉmakartatui’ tu áarchamukait.Sak. 13:7

²⁸ Tura ukunam Wi nantakin atumín Kariréanam émtuktiajrume” tímiayi.

²⁹ Tutai Pítiur chicharuk “Ámin ashí natsantramainiakuisha, wikia natsantrashtatjame” tímiayi.

³⁰ Tutai Jesus chichaak “Nekas tájame, ju̱ kashi atash jimiará shiniatsa̱i̱ṉ natsantrurtatme. ‘Núnaka nékatsjai’ menaintiú turuttiatme” tímiayi.

³¹ Tutai Pítiur kakaram chichaak “Ámiji̱a̱i̱ métek mántuiniakuisha núnaka peṉké tíchattajai” tímiayi. Ashí ni unuiniamuri̱ núnisaṉ tiármiayi.

Jesus ajanam Yusan áujsamu

³² Nuyá̱ Jitsemaní ajanam jeawar ni unuiniamuri̱n chicharainiak “Wikia Yusan áujsataj tusa pujái̱ átumka ju̱i̱ pujustarum” tímiayi.

³³ Nuyá̱ Pítrun, Jakupuncha, Juáṉnasha jukimiayi. Tura Jesuska tí kuntuts enentáimiar wake mesetan juármiayi.

³⁴ Tura nin chicharuk “Wi tí kuntuts enentáimjiai tura jakamnia nekapeajai. Ju̱i̱ imia pujutarum” tímiayi.

³⁵ Jesussha ishichik arantach we nuṉká piniakumar tepes Yusan áujmiayi. “Ju̱ wáitsatin átatna nu túrutatniuitkiuiṉkia iniaitiusta” tu seamiayi.

³⁶ Tuke áujuk chichaak “Apawá, ashí tujinchaitme. Piniṉnumia̱ ashí umartinia ántsaṉ ti nekapsatajna nú waitsatin jurutkitia. Antsu Wi wakeraj nucha, ame wakeramuram túrunati” tímiayi.

³⁷ Tura ni unuiniamuri̱n tarí kanúu tepenan wainkiamiayi. Pítrun chicharuk “¿Semuṉka kánamek. Kanutsuk ishichkisha imia pujustin tujintkiamek?

³⁸ Anearum Yus áujsatarum, tunaanum iniaara̱i̱j tusarum. Atumí wakaní̱i̱n kakarmaitrume antsu atumí aya̱shí̱i̱n kakarmachuitrume” tímiayi.

³⁹ Ataksha we, nuik Yusan áujsama núnisaṉ áujsamiayi.

⁴⁰ Ataksha waketruki̱ ni unuiniamuri̱n kanúu tepenan tarimiayi. Kari̱ ti pujá asamtai Jesusan áujsatniun tujintkiarmiayi.

⁴¹ Jesus ataksha we tarí chicharainiak “Kanarum ayampratarum. Máakete. Jeayi. Wi, Aents Ajasuitjiana ju̱, tunáa shuarnum surukmaitjiai.

⁴² Nantaktiarum, wemí. Iis, Winia súrutna nu nuntumsai” tímiayi Jesus.

Jesus achikma

⁴³ Jesus nuna chicháa pujá unuiniamuri̱ Jútas tarimiayi. Niji̱a̱i̱ untsurí aents puyá̱ takaku tura numincha takaku káutkarmiayi. Yúsnan pujurniu uuntri̱ nuyá̱ Israer shuara jintinniuri̱ tura Israer shuara uuntri̱ akupkarma asa káutkarmiayi.

⁴⁴ Káuntsa̱i̱ṉ Jútas chicharainiak “Wi áujkin mukunataj núiti Jesus. Achikrum péṉker emetarum jukitiarum” tímiayi.

⁴⁵ Tura Jesusan tarí mukunuk áujas “Uuntá, Uuntá” tímiayi.

⁴⁶ Túramtai aentssha Jesusan achikiar emetawarmiayi.

⁴⁷ Túruiniakui nui̱ wajatusha puya̱ri̱ úkuitsaṉ Yúsnan pujurniu uuntri̱ takarniúri̱n awati ni kuishi̱n tsupirkamiayi.

⁴⁸ Túram Jesus aentsun chicharuk “Kasakaitiaj. Puya̱ja̱i̱ numiji̱a̱i̱ kasá nútiksarmek achirkatai tusarum tarutniurme.

⁴⁹ Ashí tsawant atumji̱a̱i̱ Yusa Uunt Je̱e̱n waya̱n unuiniakun pujuchmakaj. Tumai̱ nui̱ achirkachmarme. Tura Yus timia nu uminkiat tusa ju̱ túrunayi” tímiayi.

⁵⁰ Nuiṉkia ashí ni unuiniamuri̱ Níniak ikiuiniak pisararmiayi.

Natsa pisarma

⁵¹ Tura áishmaṉ natsach aya tarachin penumas Jesusan atamprimiayi. Tura natsachin suntar achikiam

⁵² tarachrí̱n ajapa ikiuak misú tsékeṉkimiayi.

Jesus Yúsnan pujurniu úuntri̱i̱n jukimiu

⁵³ Yúsnan pujurniu úuntri̱i̱ṉ Jesusan ejeniarmiayi. Nui̱ Yúsnan pujurniu úuntri̱sha, Israer shuara jintinniuri̱sha, Israer shuara úuntri̱sha irunturarmiayi.

⁵⁴ Tura Pítiur íikiaṉ nemarki̱ Yúsnan pujurniu je̱e̱n a̱a̱ch jeá Yúsnan pujurniu suntari̱ji̱a̱i̱ jinia anamuk pujumiayi.

⁵⁵ Yúsnan pujurniu uuntri̱ ashí naamka uunt armia nuja̱i̱ iruntrar maatai tusar wakeruiniak shuar Jesusan tsanumprurat tusar e̱a̱tkarmiayi. Nu chichamja̱i̱ mantamnati, tiármiayi. Túrasha wáinkiacharmiayi.

⁵⁶ Túrasha untsurí shuar Jesusan tsanumpruiniayataṉ yapaji̱á yapaji̱á chichainia ásarmatai wáinkiacharmiayi.

⁵⁷ Nuyá̱ chíkich wajakiar wáitruiniak ju̱na tiármiayi

⁵⁸ “‘Yusa Uunt Je̱e̱n, aents je̱a̱marmia nuna yumpuṉtiatjai. Túran menaintiú tsawantai̱ chikichan aents je̱a̱mchamun je̱a̱mtatjai’ tau antukmaji” tiármiayi.

⁵⁹ Tura tuke yapaji̱áwar tiármiayi.

⁶⁰ Nui̱sha Yúsnan pujurniu uuntri̱ ajapén wajaki̱ Jesusan chicharuk “¿Áimsatin peṉké tujintiamek. Warinia turamainia?” tímiayi.

⁶¹ Tura Jesus tákamtak áimtsuk pujumiayi. Yúsnan pujurniu uuntri̱ atak chicharuk “¿Ame nekas Yusa Anaikiamuri̱nkaitiam. Ii Yusri̱ Uunt tájinia nuna Uchirí̱nkaitiam?”

⁶² Tutai Jesus chichaak “Ee, núitjiai. Winia, Aents Ajasu tutaintiajna nu Kakaram Yusa untsuurí̱ni̱ pujái̱ waitkiattarme.YKan. 110:1 Tura nayaimpinmaya̱ yuraṉminiam winiái̱ waitkiattarme” tímiayi.Tan. 7:13

⁶³ Tutai Yúsnan pujurniu uuntri̱ kajek ni pushiri̱n ja̱a̱k chichaak “¿Chíkich títincha warí atsumajⁱ?

⁶⁴ Ni tana nuja̱i̱ Yusan kátsekeamu antukurme. ¿Warintia enentáimprum?” Takui̱ “jakamniaiti” ashí tiármiayi.

⁶⁵ Chíkich chíkich Jesusan usukiáwarmiayi. Ji̱n epetkar awatiar “¿Ya áitkiarma? etserkata” tiármiayi. Yúsnan pujurniu suntarí̱sha yapiniam awatiármiayi.

Pítiur Jesusan natsantramu

⁶⁶ Núnaka túruiniai̱ Pítruka je̱a̱ á̱a̱ri̱n nuṉká pujái̱ Yúsnan pujurniu uuntri̱ takarniúri̱ nuwa̱ támiayi.

⁶⁷ Nisha Pítiur jinia anamu pujan wainiak iis chicharuk “Amesha Nasarétnumia̱ Jesusja̱i̱ wekaichmakum” tímiayi.

⁶⁸ Tutai Pítiur chicharuk “Nékatsjai. Ame támena nuna nékatsjai” tímiayi. Tura a̱a̱ wá̱i̱ti̱a̱i̱niam jiinkimiayi. Tumai̱ atash shiniukmiayi.

⁶⁹ Nu nuwa̱sha Pítrun ataksha wainiak shuar nui̱ pujuinian chicharuk “Ju̱i̱ti ni shuari̱.”

⁷⁰ Tura ataksha “atsá” tímiayi. Ishichik árusaṉ shuar nui̱ pujuarmia nu ataksha Pítrun chicharuk “Nekas ní shuari̱nme. Kariréanmaya̱ shuarchakaitiam. Auya̱ shuara nuní̱ chichaame” tiármiayi.

⁷¹ Tutai Pítrusha kakantar chichaak “Ju̱ áishmaṉnaka átum tárumna núnaka nékatsjai. Wáitrakuiṉkia Yus íirsati” tímiayi.

⁷² Nuyá̱ ataksha atash shiniukmiayi. Pítrusha Jesus nuik timian enentáimmiayi. Iis, Jesus nuik tíchamka “Atash jímiar shiniatsa̱i̱ṉ, ame, núnaka nékatsjai, menaintiú turuttiatme” tíchamka. Pítiur nuna enentáimias tí utmiayi.