Mar. 11 - Yus Papí: Shuarja̱i̱ Yus Yamaram Chicham Najanamu

Jesus Jerusaréṉnum waya̱mu

¹ Jerusaréṉnum wésar tura Petpajáisha Petaniasha Uriwiu naint íṉkiuasmak ámanum jeawar Jesus jimiará unuiniamuri̱n émtikiamiayi.

² Tura émtikiuk chicharuk “Aatunini̱ pépruchiniam werum nuiṉ umpuru uchich jiṉkiamu wainkiattarme. Nu umpuruka tuke entsamprukchamuiti. Nu atíarum utitiarum.

³ Tura ‘¿Urukamtia áitkiarum?’ turamainiakuisha ‘ii Uuntri̱ wakerawai’ titiarum” tímiayi.

⁴ Tutai wéarmiayi. Tura umpurun wáitiniam a̱a̱ni̱ jiṉkiamun jintiá yantamnum wajan wáinkiar atíawarmiayi.

⁵ Nui̱ pujuarmia nu “¿Warí áitkiarum. Urukamtai umpuru atíarum?” tiármiayi.

⁶ Takui̱ nisha Jesus timia nu ujakam suritkiacharmiayi.

⁷ Tura umpurun Jesusan itiariar pushiri̱n umpurunam awantkarmiayi. Túram Jesus entsamkamiayi.

⁸ Tura untsurí shuarsha pushiri̱n jintianam ayapá̱r áintkiarmiayi. Chíkitcha jintiá yantamnumia̱n nukan juuk jintianam áintrarmiayi.

⁹ Eem wéarmia nusha uku winiarmia nusha warainiak “Jusanna” untsumkarmiayi. “Yusa náari̱i̱n winiana nu imiá péṉkeraiti. YKan. 118:25-26

¹⁰ Ii uuntri̱ Tawitia akupeamuri̱ tátatna nu imiá peṉker atí. Ii Yusri̱ naari̱ shiir atí.” Tu untsumki̱ wéarmiayi.

¹¹ Tura Jesus Jerusaréṉnum jeamiayi. Jeá, Yusa Uunt Je̱e̱n waya̱miayi. Tura ashí iyasua amik kintiampra̱i̱j tusa ni tuse unuiniamuri̱ji̱a̱i̱ tíjiu̱ch Petanianam wéarmiayi.

Jesus íkiun yumiṉkramu

¹² Kashin tsawa̱r Petanianmaya̱ jintia wesa Jesus tsukammiayi.

¹³ Tura arant wajan ikiu numiri̱n núkenniun wainiak nereatsuash tusa iyumiayi. Tura nereshtai̱ri̱n asamtai neren peṉké wainkiachmiayi.

¹⁴ Nuyá̱ ikiu numin yumiṉkiak “Ame nerem peṉké yunashti” tímiayi. Ni unuiniamuri̱sha nuna táman antukarmiayi.

Yusa Uunt Je̱e̱n wariṉsha suruktinian Jesus surimkiamu

¹⁵ Nuyá̱ atak Jerusaréṉnum jeawarmiayi. Nui̱ Jesus Yusa Uunt Je̱e̱n wayá̱ suruktai tusar pujuarmia nuna ji̱i̱ki̱ akupkatasa naṉkammiayi. Kuítian yapaji̱n armia nuna ekentsa yurumtain tura yampitsan súrin armia nuna kutaṉkri̱ncha ayanturmiayi.

¹⁶ Tura kijin entsakí̱ Yusa Uunt Je̱e̱n naṉkaamaktinian suritkiarmiayi.

¹⁷ Nuyá̱ “‘Yus áujsatai tusar ashí shuar Yusa je̱e̱n waya̱mnia átatui’ tú aarchamukait Yusa Papiri̱i̱n. Antsu átumka Yusa je̱e̱ kasa matsamtaiya nútikiarme” tímiayi.Isa. 56:7; Jrm. 7:11

¹⁸ Aents nui̱ matsamármia nu Jesusa chichame̱n antukar ti enentáimprarmiayi. Tuma asamtai Yúsnan pujurniu úuntri̱sha Israer shuara jintinniuri̱sha nuna nekaawar Jesusan ashamainiak mantamnati tusar chichaman jurusármiayi.

¹⁹ Nuyá̱ kí̱akui̱ Jesus Jerusaréṉnumia̱ jiinkimiayi.

Ikiu káarun wainkiamu

²⁰ Kashin káshik naṉkaamainiak ikiu numin kaṉkaptuk jaka wajan wáinkiarmiayi.

²¹ Tura Pítiur enentáimias Jesusan chichaak “Uuntá, iistá, ikiu Ame yumiṉkramam nu kaṉkaptuk káarchaik”

²² tutai Jesus chichaak “Yus nekas enentáimtustarum.

²³ Iis, nekas tátsujrumek shuar ‘Yus nekas túratpiash’ tútsuk tura ‘wi tájana nuna Yus nekas túrattawai’ tu enentáimsar ju̱ náintian ‘jiinkí̱ nayantsanam iniaṉti’ tákuiṉkia páchitsuk iniaṉtatui.

²⁴ Tuma asamtai tájarme ashí Yus áujkuram searmena nuna suramsattarme. ‘Wi seajna nuna yamái takakjai’ tu enentáimkiurmeka wainkiattarme.

²⁵ Tura Yus áujkuram pujarmena nu, kajernaiyamuram ákuiṉkia tsaṉkurnáiratarum. Atumí Aparí̱ nayaimpiniam pujana nu atumí tunaari̱n tsaṉkurturti tusarum túratarum.

²⁶ Atumsha tsaṉkurnáiyachkurminkia núnisaṉ atumí Aparí̱ nayaimpiniam pujana nu atumí tunaari̱n tsaṉkurtámprashtatrume” tímiayi Jesus.

Yusa kakarmari̱ji̱a̱i̱ Jesus takasma

²⁷ Ataksha Jerusaréṉnum waketkiarmiayi. Jesus Yusa Uunt Je̱e̱n wekái̱ Yúsnan pujurniu úuntri̱sha Israer shuara jintinniuri̱sha Israer shuara iruntai̱ je̱e̱ úuntri̱sha Nin káutkarmiayi.

²⁸ Káutkar Jesusan chicharainiak “¿Yana kakarmari̱ji̱a̱i̱ ju̱ túram. Ame túramna nuna ya tsaṉkatrama?” tiármiayi.

²⁹ Tuíniakui Jesus chichaak “Chikichkiniak aniastatjarme. Ái̱rkatarum. Túrakrumni̱ṉkia Wisha winia takastinian tsaṉkatrukmia nuna ujaktatjarme.

³⁰ Wats, turutiarum, ¿ya Juaṉ imiaitniun tsaṉkatkama? ¿Shuar tsaṉkatkamka? ¿Yus tsaṉkatkamka? ái̱rkatarum” tímiayi.

³¹ Tura nisha enentáimprar “‘Yus akupkaiti’ tákurni̱ṉkia ‘¿urukamtia umirkachuram?’ turamchattajik.

³² Antsu ‘shuar tsaṉkatkaiti’ tákurkia ashí shuar ashamaji” tunainiarmiayi. Ashí aents Juaṉ nekas Yúsnan etserniuiti, tu enentáimainiakui ashammiarmiayi.

³³ Nuyá̱ Jesusan chichaak “Iikia nékatsji.” Tutai Jesus chichaak “Wisha núnisnak yana kakarmari̱ji̱a̱i̱ takaaj nuna ujakchattajrume” tímiayi.