Mar. 1 - Yus Papí: Shuarja̱i̱ Yus Yamaram Chicham Najanamu

Imiakratin Juaṉka etserkamu

¹ Ju̱i̱ Jesukrístunu shiir chicham náṉkameawai. Jesukrístu Yusa Uchirí̱nti.

² Yúsnan etserin Isayas ni Papirí̱i̱n jú̱nis áarchamukait “Iisiana, ame wéamurmin emka wetí tusan winia akatrámurun akupeajai. Nisha ame jintimín iwiarattawai. Mks. 3:1

³ Nisha aents atsamunam untsumuk ju̱na títiatui ‘Uuntá jinti̱ iwiarturtarum, naka awajsatarum.’” Isa. 40:3

⁴ Wats, aents atsamunam imiakratin Juaṉ imiaittsa pujus étseruk “Yajauch túrutairun Yus asakátrurat tusarum nekas enentáiji̱a̱i̱ enentáimsarum iniaisarum iwiarnartarum. Nuyá̱ imiantiarum” tímiayi.

⁵ Anturkatai tusar ashí Jutanmaya̱ shuar tura Jerusaréṉnumia̱ shuarsha Nin tariarmiayi. Taar ni yajauch túramun etsertumakarmatai Juaṉ Jurtannum imiainiarmiayi.

⁶ Juaṉsha kamiyu ure̱ najantramun entsauyayi. Emenmamkesha nuapeyayi. Tura chiniji̱a̱i̱ yutai̱ titikriátsnasha yúuyayi.

⁷ Nisha aentsun ujaak chicharainiak “Wíji̱a̱i̱ṉkia naṉkaamas ana nu winia ukurui̱ winittiawai. Nisha nekas ii Uuntri̱ asamtai wikia tsuntsumpruán ni sapatri̱ jiṉkiamuri̱nkisha atitrachminiaitjiai.

⁸ Wikia entsaja̱i̱ṉ aya aya̱shmin imiaajrume antsu Niṉkia imiantinia ánis Yusa Wakaní̱ atumí enentái̱n eṉketramprattarme” tímiayi.

Juaṉ Jesusan imiaimiu

⁹ Juaṉ aentsun imiak pujurainiai̱ Jesuska Nasarét pepru Kariréanam ana nuyá̱ jiinkí̱ Juáṉkan tarimiayi. Tura Juaṉ Jurtannum Jesusan imiaimiayi.

¹⁰ Nuiṉ Jesus entsaya̱ jíiniuk nayaimp uranniun wainkiamiayi. Tura Yusa Wakaní̱n yámpitsa núnin najanar Nin táarun wainkiamiayi.

¹¹ Tura nayaimpinmaya̱ chichaamun ju̱na antukmiayi “Ámeka winia aneamu Uchiruitme. Ámin shiir enentáimtajme.”

Íwianch Jesusan nekapsamu

¹² Nuyá̱ wárik Yusa Wakaní̱ Jesusan atsá nuṉkanam jukimiayi.

¹³ Tura nui̱ yajasma yujamunam kuaraintia tsawant pujumiayi. Nui̱ pujái̱ iwianchi uuntri̱ Satanás náartin Jesusan nekapsataj tusa pujurmiayi. Túramtai Jesusan wáinkiatai tusar nayaimpinmaya̱ suntar tariarmiayi.

Jesus ni takatrí̱n Kariréanam náṉkamma

¹⁴ Ukunam Juáṉkan sepunam eṉkeawarmatai Jesuska Kariréanam Yusa akupeamuri̱n pachis shiir chichaman etserki̱ támiayi.

¹⁵ Tura chichaak “Tsawant jeayi. Shuarnum Yusa akupeamuri̱ jeatémai. Tuma asamtai nekas enentáiji̱a̱i̱ enentáimtumasrum yajauch túrutairam iniaisarum uwempratin chicham nekas enentáiji̱a̱i̱ enentáimtustarum” tu etserkamiayi.

Jesusa unuiniamuri̱n kuatru achikma

¹⁶ Jesus Kariréa antumiaṉka kaanmatkari̱n wekas namakan achinian Semuṉnasha ni yachi̱ Antresnasha nekan aju̱ntuk pujuinian wainkiamiayi.

¹⁷ Wainiak “Nemartustarum. Namak achia̱rmena nútiksanak aentsun Yusna árat tusan e̱a̱un awajsattajrume” tímiayi.

¹⁸ Tura nuya̱ṉka ni nekari̱n ajapa ikiuiniak Jesusan nemarsarmiayi.

¹⁹ Nuya̱sha Jesus ishichik arantach wesa Sepetéu uchirí̱n Jakupun ni yachi̱n Juáṉnasha kanunam ni nekari̱n apáa pujuinian wáinkiarmiayi.

²⁰ Wainiak nemartusta tusa untsukarmiayi. Tutai ni aparí̱ncha ni aparí̱ takarniúri̱ncha kanunam ikiuiniak Jesusan nemarsarmiayi.

Iwianchrukun Jesus tsuarma

²¹ Kame Kapernáumnum jeawarmiayi. Tura Israer shuar Iruntai̱ Je̱e̱n Jesus wayá̱ ayampratin tsawantinkia Yus Chichaman unuiniamiayi.

²² Tura Israer shuara jintinniuri̱ jintintiármia núna iniaṉkas akupniua núnis Jesus jintíakui ni chichame̱n anturkar ti enentáimprarmiayi.Mat. 7:24-29

²³ Nu tumai̱ iruntai̱niam áishmaṉ iwianchruku pujá untsumuk

²⁴ “Nasarétnumia̱ Jesusá íiji̱a̱i̱sha ¿warí wakeram? ¿Iin emeskarturtaj tusamchak taum? Ame yáitiam nunasha wikia nékajme. Ámeka Tunaarincha Yusai̱ya̱itme” tímiayi.

²⁵ Tutai Jesus kakantar chicharuk “Takamáttsata. Ni enentái̱ya̱ jiinkitia tájame”

²⁶ tutai íwianch áishmaṉkan ukurak ajakniṉkiar untsumak kaka̱a̱r jiinkimiayi.

²⁷ Nuna wáinkiar ashamkar nuamtak aniniaisar “¿Ausha warinkit. Yamaram chicham warí chichamait? Ju̱ Jesuska timiá kakaram asa ímia iwianchin akupeatsuk. Iisiana umirainiatsuk” tiármiayi.

²⁸ Tura ti wárik nu túrunamu ashí Kariréanam antunkamiayi.

Semuṉka tsatsarí̱n Jesus tsuarma

²⁹ Nuyá̱ Israer shuar iruntai̱ je̱e̱ya̱ jiinkí̱ Jesuska Jakupuja̱i̱ Juáṉja̱i̱sha we Semuṉ ni yachi̱ Antresja̱i̱ pujuarmia nui̱ jeawarmiayi.

³⁰ Semuṉka tsatsarí̱ tsue̱r peaknum tepemiayi. Túmakui̱ Jesusan wárik ujakármiayi.

³¹ Nuyá̱ Jesus werí uwejnum achik iniantkímiayi. Túram nu chichamaik michatramiayi. Michatar péṉker ajas Jesusan ni nemarniuri̱ji̱a̱i̱ ayurawarmiayi.

Untsurí jaan Jesus péṉker awajsamu

³² Nu tsawant ki̱arai̱ ashí jáinian iwianchrukuncha Jesusan itiariármiayi.

³³ Tura ashí nú péprunmaya̱ shuar taar wáitiniam Jesusan káutkarmiayi.

³⁴ Untsurí aentsun náṉkamas suṉkurja̱i̱ jáinian Jesus tsuararmiayi. Tura iwianchruku armia nuna enentái̱ya̱n iwianchin jí̱i̱rkiarmiayi. Jesuska íwianch nékamu asa winia náarun ántar pachisara̱i̱ṉ tusa suritkiarmiayi.

Kariréanam Jesus Yus Chichaman étserma

³⁵ Nuyá̱ kashin káshik tsawa̱tsa̱i̱ṉ Jesus nantaki̱ Yusan áujsataj tusa jiinkí̱ kampuntin atsunum wémiayi.

³⁶ Tura Semuṉ ni amikrí̱ji̱a̱i̱ Jesus wemanumaani̱ wéarmiayi.

³⁷ Nin wáinkiar “Ashí shuar ámin e̱a̱tmainiawai” tiármiayi.

³⁸ Tutai Jesus chichaak “Chíkich péprunmasha arantach wetái. Nui̱ Yusa Chichame̱ etserkatai. Nuna túrattsan táwitjiai” tímiayi.

³⁹ Nuna ti ashí Kariréanam Israer shuar iruntai̱ je̱a̱nam etseras wekaimiayi tura núnisaṉ iwianchniasha ji̱i̱ki̱ akupkiní̱ wekaimiayi.

Jesus tunamáru tsuarma

⁴⁰ Túramtai tunamáru Jesusan seatajtsa tarimiayi. Taa tikishmátar chicharuk “Wakerutakmeka tsuáratin tujintratsme” tímiayi.

⁴¹ Tutai Jesus nin waitnentak uwejé̱ja̱i̱ antiṉmiayi. Antiṉ chicharuk “Wakerajme. Péṉker ajasta” tímiayi.

⁴² Nu chichamaik Jesus chichakmatai ni suṉkuri̱ meṉkakamiayi. Tura péṉker ajasmiayi.

⁴³ Túrunamtai Jesus kakantar chicharak

⁴⁴ akupeak “Wáinkiata, náṉkamsam etseraip. Antsu weme Yúsnan pujurniu úuntrum iniakmamsata. Túram ashí aents ame péṉker ajasmarumin nekaawarat tusam Muisais aar akupkámiania nu umikiam súsatin ana nu susata” tímiayi.

⁴⁵ Tura etserkaip támaitiat jiinkí̱ ni túrunamuri̱n mash etseramiayi. Tura nuna etserka asamtai péprunam aents írunmanum wétinian Jesus nakitrámiayi antsu a̱a̱ atsamunam pujumiayi. Tura ashí nuṉkanmaya̱ Jesusan tariarmiayi.