Kar. 5 - Yus Papí: Shuarja̱i̱ Yus Yamaram Chicham Najanamu

Yusja̱i̱ tuke aṉkant atarum

¹ Kristu uwemtikrampramiaji tuke aṉkant átinian. Tuma asamtai kakaram ajasam tuke aṉkant pujusta. Ataksha nu itiurchatnum waketkip.

² Wi Papru asan ujajrume. Átum Muisais timia núnisrumek tsupirnakrumni̱ṉkia Kristu nuikia atumniaka peṉké ántar awajtámsaiti.

³ Ataksha tájarme, ashí tsupirnakua nu shuar ashí Muisais timia nuna takamtsuk umirkatniuiti.

⁴ Átum “akupkámu umíakmin Yus shiir enentáimturmastatui” tárumna nu, nu shuartiram Krístui̱ya̱ tupa̱ṉniuitrume. Yusa aneṉkrattairi̱ya̱ kanakniurme.

⁵ Antsu iikia Yusa Wakaní̱ji̱a̱i̱ tura Yus enentáimtakrin Yus shiir enentáimturmastatji, tu enentáimji.

⁶ Nekas Krístunuitkiurkia tsupirnaktin atsumatsji. Antsu aya Yus nekas enentáimtakur ashí anenaitniuitji.

⁷ Atumsha Krístuja̱i̱ péṉker wekaimiarme. ¿Urukamtai nekas Yus timia nu iniaisatin enentáimprum ataksha akupkámunam waketkitin?

⁸ Nú enentai Yusai̱ya̱nchuiti. Niji̱a̱i̱ wekasatniunka Yus achirmákuitrume.

⁹ Ju̱ enentáimpratarum. Karía ishichik yuminnium eṉketam mashⁱ karimtiktsuk. Aneartarum atumsha.

¹⁰ Ayu, Yus yáintmakrumin wi tájana nu nusháa enentáimprashtatrume, nékajai. Tura atumín yajauch áujmatramainia nuna Yus asutiáttawai páchitsuk.

¹¹ Wikia yatsuru, yamaisha “tsupirnaktiniaiti” tuke tákuiṉkia Israer shuar yajauch awajtúscharainti. Antsu Kristu jakamun étseriatnak “tsupirnaktiniaiti” tákuiṉkia kajertukcharainti.

¹² Atumín yajauch awajtámsatin wakeruiniana nú shuar antsu niṉki tsupimiakar yajauch awajmámsarti.

¹³ Atumniasha yatsuru, Kristu tuke aṉkant awajtámsarme. Tura aṉkant ajasrum “Aya wi wakerajna nuna túramniaitjiai” tu enentáimprairap. Antsu nuamtak aneniakrum péṉker yáiniaiktarum.

¹⁴ Ju̱ chichamja̱i̱ ashí akupkámu mash uminkiattawai, ame aya̱shim aneamna áintsamek chíkich shuarsha aneeta.Riw. 19:18,34

¹⁵ Tura aneartarum. Aneniachkurmeka antsu esanairum mái̱ yunai ajakrumka nuamtak amunaiktatrume.

Aya̱sh wakeramu tura Yusa Wakaní̱ wakeramu

¹⁶ Ju̱na tájarme. Atumí aya̱shi̱ wakerana nu umiki̱a̱i̱j tusarum Yusa Wakaní̱ kakarmari̱ji̱a̱i̱ wekasatarum.

¹⁷ Yusa Wakaní̱ wakera nuna ame aya̱shim nakitiawai. Tura ame aya̱shim wakerana núnaka Yusa Wakaní̱ nakitiawai. Mái̱ maanai ajainiawai. Túmaitkiui péṉker wekasataj tukamám tujintiame. Páantchakait.

¹⁸ Tura Yusa Wakaní̱ jintintramkuiṉkia, aentsu akupkámuri̱ji̱a̱i̱ itit áchattame.

¹⁹ Wats, aya̱sh túramu ti paant áiniawai. Ju̱ áiniawai, tsanirmatin, wapik túratin, yajauch túratin,

²⁰ najankamu yus ainia nu tikishmátratin, wawekratatin, nemasnaikiatin, katsumnaikiatin, akasmaktin, wari kajektin, naṉkamantu enentáimtumastin, aya niisháa niisháa enentáimsartin, níniunak íistin,

²¹ yajauch enentáimtunaistin, maṉkartuatin, nampektin, nampernum aya tí yurumin tura tí nampen átin. Chíkich nuja̱i̱ métek áiniawai. Nuik ujakmajrumna núnisnak ataksha tájarme. Shuar nuna túrakka Yusai̱ pujustinian peṉké tujintkiattawai.

²² Ayu, yamaikia Yusa Wakaní̱ kakarmari̱ji̱a̱i̱ túratin enentáimsatai. Yusa Wakaní̱ ii enentái̱n pujak péṉker túratniun nerektinia áintsaṉ neremtikramji. Ju̱ áiniawai, aneatin, shiir enentáimsatin, Yusja̱i̱ tura shuarja̱i̱ nawamnaikiar wekasatin, shiir enentáiji̱a̱i̱ katsuntratin, chíkich shuar shiir awajsatin, wait aneaku átin, tana nuna tímiatrusaṉ umiktin,

²³ nekas nékaskea nuja̱i̱ métek enentáimtumastin, iik íimiasar tunáa túrashtin. ¿Ju̱ túratniuncha yaki surimia?

²⁴ Shuar Jesukrístunu ainia nu, ni aya̱shí̱ wakeramuri̱ncha tura núnisaṉ ni túramuri̱ncha surimiak wekaawai. Ni aya̱shi̱ krúsnum matniua áintsaṉ túraiti.

²⁵ Yusa Wakaní̱ kakarmari̱ji̱a̱i̱ Yus shuar ajasu asar núnisrik Yusa Wakaní̱ kakarmari̱ji̱a̱i̱ṉ wekasatai.

²⁶ “Wats, nekapnaisatai. Wi imiá péṉkeraitjiai” nuamtak tunaitsuk yajauch enentáimtunaischatniuiti.