Kar. 4 - Yus Papí: Shuarja̱i̱ Yus Yamaram Chicham Najanamu

¹ Kuítrinniu uchirí̱ ashí ni aparí̱ takakna nuna niniu áchattawak ukunam. Tura uchichitkiuṉka ni aparí̱ takarniúri̱ya núkete.

² Tuke uunt ajatsuk ni wainnia nuna umirkatniuiti. Tura uunt ajasmatai tura ni aparí̱ “Ayu” takui̱ nuyá̱ ni antsu ni aparí̱niu ashí wáinkiatniuiti.

³ Núnisrik iisha úchichik asarkia ashí aentsu akupkámuri̱ umirkatniuji.

⁴ Tura tsawant jeamtai Yus ni Uchirí̱n akupkámiayi ju̱ nuṉkanam. Nisha Yúsaitiat nuwa̱nam akiiniamiayi. Tura aents ajasmiayi. Tura aents ajas yaunchu akupkámuncha umirkatniuyayi.

⁵ Nuja̱i̱ ashí aents akupkámun umirkatin armia nuna uwemtikrataj tusa támiayi. Tura iisha yamaikia nuja̱i̱ ni uchirí̱ uunt ajasminiaitji.

⁶ Atumsha nekas ni uchirí̱ ajasákrumin Yus ni Uchirí̱ Wakaní̱n atumí enentái̱n akuptúrmakuiti. Tura nu Wakan atumí enentái̱ya̱ Yusan “Aparu” tawai.

⁷ Tuma asamtai yamaikia aya takarniuchuitme antsu Yus ámin ni uchirí̱n najatmaiti. Tura ni uchirí̱ asakmin ashí Yus takakna nuna Krístui̱ya̱n amastatui.

Papru Krístunun yaiṉma

⁸ Yaunchu átum nekas Yus nékachkuram najankamu yus írunna nu umirkamarme nekascha yusak.

⁹ Tura yamaikia nekas Yus nékarme kame Yus atumín nekarmarme. Núnis asamtai itiurtsuk atak aentsu akupkámuri̱ umirkatin enentáimprum. Nuja̱i̱ kakaram ajaschamniaitme tura umikmesha yaintmakchattawai uwempratin.

¹⁰ Átumka námper ti najanearme. Yaunchu námper najanatin amia nú tsawantcha, nantusha, uwisha, námper tuke najanearme Yus shiir enentáimtursati tusarum.

¹¹ Ashamajai, atumíin ántrantkeash takasmaj tusan.

¹² Yatsuru, wi átumea áintsanak ajaschamkaj. Atumsha yamaikia wi wekaajna áintsarmek wekasatarum. Wi nui̱ pujakui ishichkisha yajauch awajtúschamarme.

¹³ Antsu nekamarme aya̱shrui̱ itiurchat pujayatan Yusa shiir chichame̱n emka ujakmajrume.

¹⁴ Tura winia suṉkur ti yajauch awajtai̱ṉ átum winia nakitrurum muí̱jrukchamarme, antsu Yusa suntarí̱a áintsarmek itiaramarme. Jesukrístu anturkatniua áintsarum anturtukmarme.

¹⁵ Maa, wi nékajai, nuik atumí ji̱mi ukuinkiarum surusa̱a̱rme túramniaitkiurmeka. Tura shiir enentáimpramarmena nusha itiurtsukait yamaisha.

¹⁶ Yamaikia nekas chichaman étserkun ¿atumí nemasri̱ ajasjak?

¹⁷ Chíkich yajaya̱ taaru ti shiir awajtámainiawai tura atumín yaintmaktasa áitkiarmainiatsui. Antsu winia shiir enentáimtursat tusar aya wini̱ya̱ akantámkitiai tusa wakerutmainiawai.

¹⁸ Nisha nekas yaintmaktinian wakerutmainiakka wi atumji̱a̱i̱ pujai̱ṉsha tura pujatsa̱i̱ṉsha atumín shiir awajtámsatin tuke péṉker ainti.

¹⁹ Uchiru, nuwa̱ uchin takustaj tana núnisnak ataksha wáitiajai Kristu atumíin paant atí tusan.

²⁰ Atumji̱a̱i̱ pujaknaka maak aintjiai. Yamái pujaknaka nekas nusháa chichasaintjiarme. Itiurkatjarmetsuk nékatsjai.

Jimiará chicham nakumma

²¹ Ayu, “akupkámu umirkatniuiti” támena nu nekaata. Akupkámuka jú̱nisaiti.

^22-23 Aarma awai, Aprajám jimiará uchirtiniuyayi. Emka ni takarniúri̱ Ismaeran takusmiayi. Nuyá̱ Aprajáma nuwe̱ Isakan takusmiayi. Ismaera nukurí̱ Aprajáma takarniúri̱yayi. Tura Aprajám Yusan enentáimtutsuk niji̱a̱i̱ kanarmatai ni takarniúri̱ takusmiayi. Tura antsu Isaka nukurí̱ṉkia takarniúri̱nchuyayi antsu nekas ni nuwe̱ áuyayi. Nisha ti úuntchiniak Yus “takustatme” tímiayi. Tuma asamtai Yus timiaja̱i̱ Isakan takusmiayi.

²⁴ Ayu. Yamái tájana nuka Yusa Chichame̱n jímiaran nakumui. Ismaera nukurí̱ Akaar chikichik chichaman nakumui. Yaunchu Senái nainnium Yus ni akupkámuri̱n áarmiayi Israer shuar, takarniua áintsaṉ, umirkarti tusa.

²⁵ Senái naintcha Akaara nuṉke̱ Arapianam wajaawai. Akaarsha Senái naintian nakumak ashí Israer shuaran “Akupkámuja̱i̱ uwempramniaiti” tuinia nuna nakumui. Yamaisha Israer shuara uuntri̱ Jerusaréṉnum pujuinia nuka tu chichainiawai. Tuma asamtai Akaarsha ashí nu shuarsha núnisar akupkámu umirkatin ásar ti takarniu áintsaṉ wáitsar takainiawai.

²⁶ Antsu ashí Yus shuarti uwempra asar imiankas aṉkant pujaji. Nayaimpinmaya̱ Jerusaréṉnumia̱ áentsuitji. Nuyá̱ aentsti tuke aṉkant pujuiniaji. Nuyá̱ aents asakrin nu yakiya̱ Jerusaréṉka ii nukurí̱ya áintsaṉ enentáimpramniaiti.

²⁷ Jú̱nis áarmaiti “Warasta misuram nuwá̱, uchi takakchiatmek. Ti shiir warasta, uchí najawe̱ nékachiatmek. Nuwa̱ ajapamu uchin takustatui. Nuwa̱ áishri̱nniuja̱i̱ naṉkaamas uchirtin átatui.” Isa. 54:1

²⁸ Iisha, yatsuru, Isaka áintsarⁱ Yus timiaja̱i̱ akiiniaitji.

²⁹ Yaunchu Ismaer Isakan kajerak itiurchat awajsámiayi. Núnisaṉ yamaisha Ismaera áintsaṉ aya aya̱shniumia̱ ainia nú aents Yusa Wakaní̱ya̱ akiinia nuna yajauch awajénawai.

³⁰ Tura Yus Papinium áarmaiti “Takarniusha ni uchirí̱ji̱a̱i̱ ajapam awemata. Nekas péṉker nuwa̱ uchirí̱ji̱a̱i̱ tsaniṉ pujuschamniaiti. Aparí̱ kuítri̱ncha achikchamniaiti.” Naṉ. 21:10,12

³¹ Ayu yatsuru, nekaatarum. Takarniu uchirí̱nchuitji antsu aṉkant pujaji nekas péṉker nuwa̱ uchirí̱ asarⁱ.