Juup 9 - Yus Papí: Shuarja̱i̱ Yus Yamaram Chicham Najanamu

Juup Pirtatan ai̱kma

¹ Juup Pirtatan aya̱k

² “Wi íismaka nekas ántsaiti tajai, aents imiá yajauchisha Yusai̱sha ¿itiurak péṉker aint?

³ Aents Yusja̱i̱ tunaitniun wakeraksha, Yus mir inintramun chikichkiṉkisha ái̱kminkiait.

⁴ Yuska enentáin nékaiti, kakarmatnasha ti kakarmaiti. ¿Yaki Yusan nakitiar wáittsuk péṉker pujususha aa?

⁵ Yus kajekka náintian umuchir yúmpuiniaiti tura nu túramuncha peṉké nékainiatsui.

⁶ Yuska nuṉka ni tépakmari̱ya̱n umuchir pachimniuiti.

⁷ Núnisaṉ Yus etsa̱n tura yaancha etsantrairap tutaiṉkia etsantracharminiaiti.

⁸ Yuska aya Niṉki nayaimpincha iwiaṉkármiayi tura nayantsa tampari̱n wekainiaiti.

⁹ Ashí yaan, Musachin, Utunmin, Yáṉkuamniasha tura nuṉkaani̱ u̱kma irunainia nunasha Niṉki najankaiti.

¹⁰ Yuska aentstikia nekaachminian, irunainia nunasha tí uuntan tura nekapmarchamnia tí peṉkeran najankaiti.

¹¹ Tura wi pujamunam Yus pujakuisha wáinkiachaintjiai tura naṉkatakuisha nekapmamprachaintjiai.

¹² Yus nérentin asa warirí̱ṉkish jurukchatpiash nunasha ¿yaki suritiak awaṉtukin? ¿Yaki urukamtai áitkiam tiint?

¹³ Yus kajekka asuttsukka iniaichaiti. Tuma asa waantu enentáimin ainia nuna yáintri̱n kakarmaja̱i̱ péejchach awajniuiti.

¹⁴ Tura Wisha ¿itiurak Yusnasha ái̱kiaintiaj? Kame ¿warí chichamnak júuran Yúsja̱i̱sha tunaiwintiaj?

¹⁵ Maa, wi péṉkeran túriniaitiatnak ái̱ktinian jeatsjai antsu waitnentrurta tusan seawaintjiai.

¹⁶ Wi Nin untsúam ái̱rkuisha winia chichamprunapi anturtukia tíchamniaitjiai.

¹⁷ Naseja̱i̱ wáitkiaras ántsan peṉké antar nu arant winia akaṉkainti.

¹⁸ Nuna túruta wáitkiarak ishichiksha peṉké mayatkachmin awajtinti.

¹⁹ Ni kakarmari̱ áujmattsamsha nekas ti kakarmaiti. Tura sumamtiktairi̱ji̱a̱i̱sha yaki Niji̱a̱i̱ métek sumamtikiawaint.

²⁰ Wi péṉkeraitjiai túmamkuisha winia chichampruk makurinti tura tunaarinchaitjiai tákuisha Niṉki súmamtikruawainti.

²¹ Wi tunáa túrichuitjiai tákuncha ímia wíkikia nekamatsjai tura iwiaaku pujutnaka nakitkíjiai.

²² Ju̱ títin tátrusai ‘Yusan enentáimtichuncha tura péṉkeran túrinniasha ni iwiaakmari̱n juriniaiti.’

²³ Aents asutram aneachma jakamtaiṉkia umitmákcha wáitiainia nunasha iis Yuska wishikniuiti.

²⁴ Niin enentáimtuiniatsna nuna ju̱ nuṉkan íktusuiti. Tura sumamtikin ainia nuna ji̱ncha ukusturaruiti. Nuiṉkia ¿Níchuitkiuisha yaki aint nusha tui̱ pujá?