Juup 41 - Yus Papí: Shuarja̱i̱ Yus Yamaram Chicham Najanamu

Uunt Yus Júupan chicharma

¹ Riwiatán, entsaya̱ uunt yajasma, kaníatsa ániua nu tsauja̱i̱ ¿japikminkiaitiam túram ni iniai̱n naekja̱i̱ jiṉkiam emetamniakaitiam?

² ¿Núnismek nuji̱niam jiim chapikji̱a̱i̱ jiṉkiamniakaitiam tura jaṉke̱nam weakminkiaitiam?

³ ¿Nuní̱ túram ámin untsurí seamun seatmamniakait tura shiir chichamja̱i̱ áujtamsattawak?

⁴ ‘Wi iwiaakajna ju̱ya̱ṉka ámiji̱a̱i̱ chichaman najanan ame takarniúram atajai’ ¿títinian jeawak?

⁵ ¿Tura chiṉkichia nútiksam niji̱a̱i̱ nakurúsminkiaitiam tura ame nawantrumi wasurtairi̱ awajsámniakaitiam?

⁶ Núnisaṉ ni namaṉké̱ncha namakan achin súruinia ¿áitkiamniakait? ¿Surincha ni namaṉke̱n ajamnaisamniak ainia?

⁷ ¿Tura kátsuram jiru ajaṉkémprar najanamuja̱i̱ nuapnum ijium uyu̱amniakaitiam, nuyá̱ ni muuke̱ncha naṉkiji̱a̱i̱ ijiumniakaitiam?

⁸ Núnismek uwejmiji̱a̱i̱ takasa iyakmeka mesetnum pujá aan enentáimpram atakka peṉké túrashtatme.

⁹ Nui̱ṉkia túrataj tu enentáimsamuka ántraiti. Warí, Riwiatán entsaya̱ yajasma aents wáinkiarka aya íisaraṉ maiyái ashiniak inianmin áiniawai.

¹⁰ Náṉkamas aents nuna weantichuitkiuṉka ¿yaki Winiasha naka wajatrusaint?

¹¹ Wi nin awaṉtitin ¿ya emka Winia surusuit? ¿Warí, ashí nayaimpinmasha nuṉká irunainia nusha Wíniachuk ainia?

¹² Riwiatán urukuit nuna kakarmari̱ncha, shíirmachin najanamajna nunasha ámin ujaktatjame.

¹³ ¿Yaki nuapé̱ jiruja̱i̱ méteknasha pakakaint tura yaki nuapé̱ jiru tuupa ímianuncha weantúkaint?

¹⁴ ¿Yaki iwiaṉᵏⁱ íisaint, nai̱ imiá tsuumainniasha?

¹⁵ Tuntupnumsha ni saepe̱ ti pipis akujnaira ásarmatai nuja̱i̱ ti naṉkamantu enentáimtumawiti.

¹⁶ Ni saepe̱sha kú̱jaru ásarmatai nasesha waya̱chminiaiti.

¹⁷ Núnisaṉ saepe̱sha chíkich saepe̱ja̱i̱ achimpra asa peṉké kanakchamnia áiniawai.

¹⁸ Ni jachitkiuṉka peetua áitkiawiti. Ji̱ṉkia etsa̱ jíiniuk kapan awajna ániuiti.

¹⁹ Tura wene̱ya̱ ji keak tsákir awajniuiti.

²⁰ Ni nuji̱ya̱ mukuint jíiniuk ichiṉnanam páinkiamu kuá ímianu mukuintiniaiti.

²¹ Ni mayatmari̱sha ji keek kaí̱rmamtikniuiti. Tuma asa ni wene̱nkia ji kéenaiti.

²² Ni kakarmari̱sha kuntuje̱n awai. Tuma asamtai íisrik mayai̱ ashiṉkiamniaiti.

²³ Namaṉke̱sha ti katsurmaiti. Warinkísh waintiúachminiaiti. Ímiatrusar najanamu asa muchitkiusha namaṉke̱n umutchaiti.

²⁴ Enentáimtairi̱ṉkia kaya núnisaiti, nekaska neketai̱ kaya wakenmari̱ katsurma ímianuiti.

²⁵ Ashí kakaram ainia nu achiktaj tuíniayat ni nantaakuiṉkia sapijmiainiak páchim enentáimiainiawai.

²⁶ Tura puya̱ja̱i̱sha, naṉkisha, tsentsaṉkaja̱i̱sha peṉké máchminiaiti.

²⁷ Níji̱a̱i̱ṉkia jirusha tsuata áintsaiti núnisaṉ yaṉkú jirusha numi mamurua núnisaiti.

²⁸ Naṉkisha niṉkia ipiseatsui tura kaya naṉkíamsha tsuat naṉkíatniua áintsaiti.

²⁹ Níji̱a̱i̱nkia ajintrutai̱ji̱a̱i̱ awatmiasha pintiuja̱i̱ awatmia núnis nekapeawai tura tantar tantan ajakmataisha wishikiawai.

³⁰ Tura netsepnumia̱ saepe̱nka atsakamua ímiatrus asar japinki̱ wéakka kuchanka urar ikiuawai.

³¹ Entsá kunarí̱ṉkia ichiṉnanam kuá tímiatikiak téter awajeak wainchi péper awajeawai.

³² Tura wéakka ukunmaani̱ṉkia entsaṉka sauur awajeak tsáapin awajeawai. Nuyá̱ entsá kunarí̱ṉkia jeempée pujua nútikiawai.

³³ Nuṉkaṉka niji̱a̱i̱ métek jú̱nis sapijtichu najanamuka peṉké atsawai.

³⁴ Yajasma ti kajen ainia núnasha wajatui, tuma asa ashí yajasman úuntri̱nti” Uunt Yus Júupan tímiayi.