Juup 40 - Yus Papí: Shuarja̱i̱ Yus Yamaram Chicham Najanamu

Uunt Yus nú arant Júupan chicharma

¹ Nu arantcha Uunt Yus Júupan aya̱k

² “Uunt Yusja̱i̱ jianaiya nusha, Ni enentáimna nuyá̱ ¿aṉkant ajasminkiait? Wats Yusja̱i̱ tunaiya nuka ju̱na ai̱ktí” tímiayi.

³ Nuiṉkia Juup Uunt Yusan aya̱k

⁴ “¿Wikia peṉké ántraitiatnasha warintiak ai̱kiainjiam?

⁵ Emka chichakaj nuya̱ṉka, atakka peṉké ai̱kchamniaitjiame” tímiayi.

⁶ Uunt Yus nasenam páchitkia Júupan chicharuk,

⁷ “Yamaikia kakaram ajasam Wi iniastatjamna nu ujatkata.

⁸ ¿Wi métek túrajna nu antra nútikiamniakaitiam? ¿Winia sumamtikruam péṉker túrinia núnikmiṉkiaitiam?

⁹ ¿Amesha Yusa kakarmari̱ji̱a̱i̱ métekaitiam? ¿Tura ame chichammesha Yusa chichame̱ ipiamta tímiankait?

¹⁰ Nuiṉkia úunt akupniua tímiatrusam iwiarmamprata. Túrunam ame kakarmarmiji̱a̱i̱ṉ wincha ajasta.

¹¹ Aents kajemtin ainia nu íisarta. Túram ame kajetáirmiji̱a̱i̱ péejchach awajsarta.

¹² Naṉkamantu enentáimtumainia nu peejcha awajsarta tura Yusan enentáimtichu ainia nusha pujuinia nuiṉ naja̱warta.

¹³ Túram ashí nuṉkanam pujuinia nuka init iwiarsata, túrakum jakaa pujuinia áitkiasmek init yutuawarta.

¹⁴ Antsu nuiṉkia Wisha ame kakarmarmiji̱a̱i̱ nupetmaktatmena nuna nekaan shiir awajsattajme.

¹⁵ Iisiana entsaya̱ yajasma pemut náartinia waakaya núnisaṉ nupá̱ yuun najanamiajai. Kame Wisha amincha najanamiajme.

¹⁶ Wats iistá, suntunmasha tura tantannumsha ya̱pé̱ írunna nuja̱i̱ kaka̱i̱niaiti.

¹⁷ Tura ujuké̱ja̱i̱ wáikmaksha sétrua tímianuja̱i̱ wáikmawiti nuyá̱ ni namaṉke̱ṉka yá̱a̱pkete.

¹⁸ Ni ukunchi̱sha yaṉkú jírua imianú katsurmaiti tuma asa kátsuram jírua núnisaiti.

¹⁹ Nunasha Yus ni nekatairi̱ji̱a̱i̱ tímiatrus najanaiti. Tuma asa Niṉki nupetkamniaiti.

²⁰ Tura ni yurumkari̱sha nupa̱ naint tsapainiawai. Nuna ashí yajasma nakurukmaikia yurumáiniawai.

²¹ Nuyá̱ kuchá kucharmatniunam rutu kuku̱jrí̱n paantcha tepenaiti.

²² Nu numi entsá yantam mátsatkana nuna mikintrari̱ nu yajasman ejawiti.

²³ Núnisaṉ entsa ama̱a̱rkuisha ashamchaiti tura Jurtan entsa amuamsha tee ajas wajawiti.

²⁴ Tura ímiatrus íimiuncha ¿yaki achik nuji̱ ji̱i̱ri̱ jiṉkiawaint?