Juup 32 - Yus Papí: Shuarja̱i̱ Yus Yamaram Chicham Najanamu

Iríu Júupan péṉkeraitjiai túmamkui kajeramu

¹ Juupka “tunaarinchaitjiai” túmamu asamtai menaintiú amikri̱ armia nu chicharainiamunka iniaisarmiayi.

² Nuiṉkia Iríu Parakíra uchirí̱ Pus aents Ram weauya nu Juupa kajerkámiayi. Warí Juupka Yus iismasha tunaarinchaitjiai túmamkui ti kajerkámiayi.

³ Núnisaṉ amikri̱ menaint armia nunasha ái̱ktinian nékainiachiat Júupan sumamtikiawaru ásarmatai ti kajerkarmiayi.

⁴ Kame Iríuka chíkich armia núja̱i̱ṉkia úchipia asa Júupan chichas umikiarat tusa nákasmiayi.

⁵ Túrasha Iríuka menaintiú amikri̱ péṉker ái̱kcharmatai ti kajekmiayi.

⁶ Nuya̱ṉka Iríu aents Parakíra uchirí̱ chichaak “Wikia nátsaitjiai tura átumka úuntchitrume. Tuma asakrumin ashamkajrume túran wi enentáimsanak ashamkajrumna nuna paant awajtajrume.

⁷ Wikia ashí tsawant chichartukchanpiash tura núkap uwí surus nekatai̱n nekamtikruashtimpiash tu enentáimsamjai.

⁸ Ti nekas aentsu enentái̱ awai, Ashí Tujintkiachua nu umpuí nékamtikiaiti.

⁹ Yanaksha aya núkap uwí takakuka neka awajsachuiti. Núnisaṉ úuntchisha uunt asa niṉki nekasa nuna nekamin áiniatsui.

¹⁰ Tuma asamtai anturtukta wisha núnisnak enentáimmiarun takurkajrume.

¹¹ Nekaata. Wikia antú antut ajasan átum chichaamun antukjai. Núnisnak átum turuttiaj tusarum péṉker chicham júukrum turutniurmena nunasha antukjai.

¹² Kame iisjai túrasha atumíya̱ yaaksha Júupan nekasa nuna ímiatrus nekaracharai tura áitniasha ni tana nunasha ái̱kcharai.

¹³ Warí atumsha ti neka ímianu enentáimtumasa̱i̱rum tusa aentssha antsu Yus ái̱rmaktatrume.

¹⁴ Kame nisha wíniaka turutchayi. Tuma asamtai wikia átum ái̱kiurmena nuninkia ái̱kchattajai” Iríu tímiayi.