Juup 14 - Yus Papí: Shuarja̱i̱ Yus Yamaram Chicham Najanamu

¹ “Áishmaṉsha nuwa̱nmaya̱ akiinia asa ni iwiaakmari̱ṉkia ishichkitiat ni itiurchatri̱sha náṉkatkachuiti.

² Tura kuku̱j kuku̱jrukiat urumka wárik káatsuk. Núnis asa kiritia áintsaṉ aya méṉkawai.

³ ¿Ju̱ áishmaṉ wáinmek tura ame péṉkeraitme turutminkiaitiam?

⁴ Yajauchia nuyá̱ péṉker awajsámniasha ya aa, chikichkiksha peṉké atsawai.

⁵ Amek ashí aentsu tsawantri̱sha súsaitme tuma asam ni iwiaakmari̱sha nu arant ékekchamniaiti.

⁶ Ni íistiṉkia aṉkant iniaisata, iwiaakna nuiṉkia takakmawa áintsaṉ warasat.

⁷ Warí, numi tsupikiam ataksha nuke̱ je̱a̱tsuk. Tuma asa tsupikmaitiat jé̱e̱tskeka iniaisashtatui.

⁸ Kame ni kaṉkapé̱nka nuṉká kaawai tura nantujé̱ṉka mamúawai.

⁹ Túrasha entsaja̱i̱ṉkia samek ajastatui tura áraka núnisaṉ kanawentrattawai.

¹⁰ Antsu íksaṉ aentska jaawai tura jakasha ¿tuí̱ṉkish pujá?

¹¹ Entsá yuraṉmiri̱ nayantsanmaya̱ takunniuiti túmak entsasha ku̱yu̱witi.

¹² Kame nayaimpikia ai̱ṉ aents iwiarsamunmaya̱ nantakchartatui tura kanarmanumia̱sha shintiarchartatui” tímiayi Juup.