Juup 13 - Yus Papí: Shuarja̱i̱ Yus Yamaram Chicham Najanamu

Juup enentáimmian kajinmatkichma

¹ “Kame jú̱naka ashí winia jí̱ruja̱i̱sha wáinkiaitjiai tura antukan nékaitjiai.

² Wisha átum nékarmena núnisnak nékajai, átumka wíniaka nékachua núnisrumek enentáimturum.

³ Antsu Ashí Tujintkiachu Yusja̱i̱ chichasaintjiai túran anturnaikiatniun wakerajai.

⁴ Warí átumka atumí wáitrutai̱ri̱ji̱a̱i̱n nekasa núja̱i̱sha ú̱maitrume. Tuma asarum átumka ántar tsuákratniuitrume.

⁵ Tura átum títrumna nu mash initiusrumka neka núnis áintrume.

⁶ Wi enentáimiaj ju̱na takui̱ waitneasrum esetrarum anturtuktarum.

⁷ Atumí waitri̱ji̱a̱i̱ Yus ¿ayamprarmek? tura wait chichamja̱i̱ anaṉkamniaitji ¿tárumek?

⁸ Atumsha shuar akanearum nuja̱i̱ Yus yaya̱krum ¿ayamprarmek?

⁹ Yus nekarmawitkiurmiṉkia shiir túrakrum péṉker ainti. Tura shuar wishikratniua nútiksarum Yus ¿wishikramniakaitrum?

¹⁰ Átum ú̱krum aents ántrarum akantrármeka Yuska ashí iimiainiamunam iniakturmasartatui.

¹¹ Kame ti uunta nu ashamkam sapijmiaktatrume. Kame atumí úuntri̱ya̱ awakmaku ajatin enentáimsairap. Warí atumíṉkia tí tsuumai̱ awajnásrum nekaprattarme.

¹² Atumín chichakmari̱sha ántar ásar yuṉkunmiji̱a̱i̱ métek áiniawai. Tura ayamprumatairmesha nuweja̱i̱ wenuir ayamprumaktinia núnisaiti.

¹³ Yamaikia wi chichaktatjai aṉkant initiustarum túramtai warí naṉkatustata nu naṉkatusti.

¹⁴ Takamtsuk aya̱shtiuk tsaṉkamatkattajai tura winia iwiaakmarnasha wiki sumamattajai.

¹⁵ Mántakuisha Níniak nákastatjai. Tura wi túramurnasha nákak chichamprumaktatjai.

¹⁶ Ju̱sha núniskeash uwemtikrurat. Warí Yusan umircha ainia nuka Ni pujamunmaṉka waya̱chminiaiti.

¹⁷ Péṉker esetrarum antuktarum, wi enentáimmiarun paant awajtústatjarmena nu.

¹⁸ Tura atumín wi paant awajtúsmaka atumsha nekasaiti turuttiattrume.

¹⁹ Urukamtai chikitcha awajirum túrutkuiṉkia tákamtak jákaintjiai.

²⁰ Uunt Yusru jímiara ju̱ka tsaṉkatrukaip nuiṉkia amiiya̱ṉka ú̱mkashtatjai.

²¹ Asutiam nuka iniaitiusta nu arant asutiakmeka sapijmiamtikrukaim.

²² Ame untsurkata wi ái̱ktajme nuíchuka wi chichakmatai ame ái̱rkata.

²³ Winia tunaarusha tura yajauch túramur ¿urutmá ainia? Kame winia tunaarusha tura yajauchirsha túa ainia nu paant awajtúrsata.

²⁴ ¿Warí urukamtai ú̱mprutam túram ame nemasrumea áitkiaram?

²⁵ ¿Nuka kaaru nase umpuimiu yakí̱ nanatua nu tsáirtatmek tura tsuat kaarua nusha apapékaintmek?

²⁶ Wíniaka sumamtikruam yapá nupa̱ nuní̱ nekapran kúntuts tura wáitsatin chicham áatrurume. Túram wi natsa pujusan yajauch túrutai̱nium wáitkiarame.

²⁷ Ashí wekaamur wáinniuitme. Nu arant winia nawersha numiji̱a̱i̱ chanuntruitme. Tura winia naweru pakarí̱ṉkia téntatrukume.

²⁸ Tuma asa wikia entsa nuapnum uwamu amúana tura pushin ka̱ya̱ yúana núnisaitjiai” Juup tímiayi Uunt Yusan.