Juup 11 - Yus Papí: Shuarja̱i̱ Yus Yamaram Chicham Najanamu

Supaar Júupan yajauch chicharma

¹ Naam nuṉkanmaya̱ Supaar Júupan chicharuk

² “Tímianu chicháa nu ái̱kchamusha áwak. Kame aents ti chicháa núja̱i̱ṉ nekasapi tawa tutaint.

³ Timia chichamna nuja̱i̱ ámeka aents ái̱rkacharat tamek, yanaksha iniatsá̱ran wishikrartaj tuuk enentáimiam.

⁴ Ámeka wi jintíajna nu nekasaiti tau asam, áme íimiasmeka tunaari̱ncha enentáimtumame.

⁵ Chaaj, Yus ámin itiurak chichartamka.

⁶ Tura kuítriniatniuja̱i̱sha naṉkaamas asa nekatai̱ nekaachminia nuna paant awajtúrmasmatai antsu nuiṉkia tunaarumji̱a̱i̱ métek Yus asutiámachainia nu nekaamawaintme.

⁷ ¿Yus nekaachminji̱a̱i̱ itiurchat túrutma nu nékamek tura Ashí Tujintkiachu Yusa timianú nékakuk ámeka ajastatam?

⁸ ¿Nekatai̱ nayaim ti yakiya̱ ímianaitkiuisha amesha itiurkaintmek? Tura náṉkatkachu jaka matsamtaiya̱ ímianaitkiuisha amesha ¿itiur nekaawaintmek?

⁹ Nekatai̱ esantí̱sha nuṉkaja̱i̱ naṉkaamasaiti, tura nayantsaja̱i̱ naṉkaamas waṉkarmaiti.

¹⁰ Tura Yus winiak emettama nekasa nuja̱i̱ irutmar súmamtikramkuisha ¿yaki suritkiaint?

¹¹ Yuska ántar ainiancha nékawai núnisaṉ tunáa túruiniancha wainiui ¿nú aentsnaka pachischattuak?

¹² Aents umpurunmaya̱ akiiniamtai ántar aents ainia nu neka áminiaiti.

¹³ Yus naka enentáimtusam tura niní̱ weankam,

¹⁴ ame tunaaruminia̱ kanakim amiin yajauch itiaachkumka,

¹⁵ shiir enentáiji̱a̱i̱ sapijmiatsuk kakaram ajasam paṉkaim íimiakum,

¹⁶ ame wáitsamurmesha entsa naṉkaamasua núnis enentáimtustatme.

¹⁷ Ame iwiaakmarmeka etsa̱ tutupin ajas tsáapniana nú naṉkaamasaiti, kiritiaitiataṉ tsawa̱a̱na núniktatui.

¹⁸ Wats, enentáimtakum nákasta, ashí nupetmakam péṉker kanartatme.

¹⁹ Tura ayamprattame nuiṉkia atakka yaaksha aitkia awaktámkamnia atsuttawai. Núnisaṉ untsurí aents ámin yáintmainia táartatui.

²⁰ Tura yajauchin túrinkia amukártatui. Núnisaṉ ú̱mkatniuncha tujintkiartatui, niṉkia aya jákatniuk áiniawai” tú timiayi Supaar.