Juup 10 - Yus Papí: Shuarja̱i̱ Yus Yamaram Chicham Najanamu

Juup niṉki tumammia

¹ Winia enentái̱rsha iwiaakmarnaka nakitkíyi. Timiá waitia asan chichamprumaktatjai. Tí kuntuts enentáimkiur wáitsatin yapá nupa̱ nuní̱ nekapra asan chichastatjai.

² Yusan chicharkun ‘Súmamtikruawaip, nekamtikruata ¿urukamtai wíji̱a̱i̱sha mániam?’ titiatjai.

³ Ame najataitiatam ajapa iniaitiusam wáitkiaramna nu ¿péṉkerkait? Tura Yusan enentáimtichu ainia nu ni túratniuri̱n túruiniakuisha ¿wait enentáimtuiniatsmek?

⁴ Antsu ¿ji̱misha aentsu ji̱ya̱ ániukait? Amesha ¿aents wáinmana núnismek wáinmam?

⁵ ¿Ame tsawantrumsha aentsu tsawantrí̱ya núniskait? ¿Nuíchuka aentsu iwiaakmari̱ji̱a̱i̱ méteketiam?

⁶ ¿Winia tunaar e̱a̱rtitnia tura yajauchirsha íirtitnia?

⁷ Amek nékarme ámin enentáimtichu aentsua núnischaitjiai. Tura chíkichkia amiya̱ uwemtikrurtiṉkia peṉké atsawai.

⁸ Ame uwejmiji̱a̱i̱n najatamiame túrutayatmek ¿ataksha emesturtaj tusam wakerutam?

⁹ Waitneasam, enentáimprata, nuwe̱ja̱i̱ nájanua áitkiaram najatamame, túrutayatmek nuṉka ju̱yú̱ ju̱yu̱n awajtústatme.

¹⁰ ¿Winia aya̱shruka muntsu yaraktinia áitkiame kantemtikiachmakam?

¹¹ Túram namaṉkruka nuapja̱i̱ nukurtukmame, túrutam ukunchtin tura yá̱a̱ptin najatamame.

¹² Núnismek iwiaakmasha, waitnenkartutaisha surusmame, tura Amek winia péṉker waitkiamame.

¹³ Ame enentáimsamek jú̱tikruamna ju̱sha aminí̱ṉ awai, nuka wíji̱a̱i̱ṉkia áminiukete.

¹⁴ Wi tunáa túramashij nuka Amek wáitkiaitme. Winí̱ tunáa akui ‘péṉkeraitme’ turutchamniaitme.

¹⁵ Yajauchitkiuṉka ¿wi urukuk aaj? Péṉkeraitkiuṉka paṉkaicha̱a̱jai, umiktinian nakitiakui pimpiki̱ wáitias pujá núnis iiraiyi.

¹⁶ Nantakuiṉkia, úunt ya̱wa̱ áitkiarsam e̱a̱meame, tura emesturtaj tusam aents túrachminia nu iniakmame.

¹⁷ Tura ámin winia nuna nekas tajai turamainia nuka táamainiatsui. Nuja̱i̱ ame kajertukim wéakum untsurí suntarja̱i̱ núnis kajertame.

¹⁸ ¿Urukamtaitsuk akiiniati tusam iniaitiusiam? Jákaitkiuiṉkia yaaksha wáitkiacha̱a̱yi.

¹⁹ Winia nukuru nukuruí̱ jákaitkiunka ju̱ni̱kia pujuchajapi.

²⁰ ¿Winia jákatniursha ishichik ajaschaik? Ishichik aṉkant iniaitiusta warastaj.

²¹ Tura jakar, waketki̱ táchatai tee nuṉkanam kiritniunam wéatsa̱i̱ṉ

²² Kirit nuṉkanam, kirit tee jatainium, tura tsáapnin tamasha kirit teeya nui̱ wéatsa̱i̱ṉ iniaitiusta” tímiayi Juup.