Jus. 6 - Yus Papí: Shuarja̱i̱ Yus Yamaram Chicham Najanamu

Jirikiúnam amukar akintkiamu

¹ Nuyá̱ Jirikiú aentssha Israer shuar amukratki̱ wininiawai táman ántuinia ásar ni pépruri̱ wáitiri̱ncha epentrar waya̱chmin tura jíinkichmin awajsar pujuarmiayi.

² Tura Jusuin Uunt Yus chicharuk “Yamaikia ame iistá. Jirikiú péprun ni akupniúri̱ji̱a̱i̱ suntari̱ntiuk ashí íktusjame

³ tura Israernumia̱ suntartirmeka pepru tenta téntakuarum sais tsawant ejetarum.

⁴ Nuyá̱ siati Yúsnan pujurin Yusna Eṉketáin jukí̱ wénak aṉkant aṉkant kachu umpuukiar wéarti. Tura siati tsawant jeamtai Yúsnan pujurin kachun umpuiniai̱ pepru á̱a̱ri̱ni̱ tenta téntakuarum siati ejetarum.

⁵ Tura kachu umpuamu antukrumka atumsha ti kakaram untsumkatarum. Nu túrawakrumin pepru wenuke̱ yumpunar utsanattawai. Túrunamtai péprunam nákak utsaṉtuatarum.” Uunt Yus Jusuin tu akatrámiayi.

⁶ Nuyá̱ Jusuí Yúsnan pujurniun chicharainiak “Pai, yamaikia wéartai. Tura Uunt Yusna Eṉketai̱ jukí̱ wéana nuyá̱ siátitiram kachu jukirum émkatarum.”

⁷ Tura ashí Israer shuaran chicharainiak “Pepru téntaktarum tura suntartiram iwiarnakutirmeka Uunt Yusna Eṉketái̱ya̱ eem wetarum” tímiayi.

⁸ Nui̱ṉkia Jusuí timia núnaka tímiatrusaṉ umikiarmiayi. Kame siati Yúsnan pujurin armia nuka kachun umpuukiar eem wéarmiayi. Nuyá̱ Yúsnan pujurin Uunt Yus Israer shuarja̱i̱ Chícham Najanamu Eṉketáin júkiar ukunmaani̱ wéarmiayi.

⁹ Tura jukí̱ wénak kachun miji̱atrutsuk umpuuki̱ wénakui mesetan iwiarnatkaru armia nu eem wenasha nuyá̱ Eṉketáinmaya̱ úkuri̱ni̱ wininiasha ármiayi.

¹⁰ Nuyá̱ Jusuí ni shuari̱n chicharainiak “Átumka tákamtak éstarum. Antsu wi ‘pai’ takui̱ nui̱ṉkia kakaram untsumkatarum” tímiayi.

Jirikiú nuṉka ata̱i̱miu

¹¹ Nuya̱ṉka Jusuí akupkámuja̱i̱ Israer shuar Yus Aentsja̱i̱ Chícham Najanamu Eṉketáin júkiar Jirikiú péprun chikichkí téntakar ataksha matsamkamunmaṉ waketkiar kanaararmiayi.

¹² Nuyá̱ kashin káshik Jusuí nantaki̱ tura Yúsnan pujurin armia nusha Uunt Yusna Eṉketáin jukitiai tusar iwiarnararmiayi.

¹³ Tura Uunt Yusna Eṉketáin ajapén inimiainiai̱ meseta nekanturtinkia eem wéarmiayi. Nuna úkuri̱n siati Yúsnan pujurniuka kachun miji̱atrutsuk umpuukiar wenai̱ nuna úkuri̱ wininiasha ármiayi.

¹⁴ Nuyá̱ kashin ataksha péprun téntakar ikiuiniak ni matsamkamuri̱n waketrarmiayi. Nuna túrutaik sais tsawant ejeniarmiayi.

¹⁵ Antsu siati tsawant tsawa̱a̱munam nantarar nu tsawantini̱ṉ péprun tenta téntakua siati ejeniarmiayi.

¹⁶ Nuyá̱ Yúsnan pujurin armia nusha kachun siati awena umpuararmatai Jusuí chicharainiak “Pai, yamaikia Uunt Yus ju̱ nuṉkanka iin suramsa asakrin kakarmaja̱i̱ charáa ajaktarum.

¹⁷ Tura Uunt Yus jú̱ peprunka wariri̱ntiuk yajauchiniam yumiṉkra asamtai túrunattawai. Antsu tsanirmatai nuwa̱ Raapka mamikmau ii akupkármiaj nuna u̱ku asa ni je̱e̱n pujuinia nuja̱i̱ ashí uwemprattawai.

¹⁸ Tura atumsha ju̱ péprunam írunna nu jukiirap, wakerukrum antiṉkiairap. Warí nu túrakrumni̱ṉkia Israer shuarti yajauchiji̱a̱i̱ yumiṉkramu juáktatji.

¹⁹ Antsu kurisha, kuitcha, tura namincha jiruja̱i̱ núnisaṉ yaṉkú jiruja̱i̱ najankamu ainia nusha Uunt Yusna akantúkma nui̱ írunui tura nuka Niniu atí tusarum yaruaktarum” tímiayi Jusuí.

²⁰ Nuyá̱ Israer shuar untsumainiakui Yúsnan pujurin kachun umpuararmiayi. Tura umpuiniamun antukar nuna naṉkaamas ti kakaram untsumainiakui pepru wenuke̱sha yumpuntramiayi. Túrunamtai péprunka utsantuawar nérentin ajasármiayi.

²¹ Nuní̱ túrawar áishmaṉnasha nuwa̱ncha natsancha úuntchincha tura umpuruncha muriknasha waakancha puya̱ja̱i̱ máwar mash amukármiayi.

²² Nuyá̱ Jusuisha jimiará aishmaṉ nuṉká nekauwarmia nuna chicharainiak “Tsanirmatai nuwa̱ átum nekas umiktatji tiniu asarum tímiatrusrumek je̱e̱n werirum wariri̱ntiuk ji̱i̱ktiarum” tiármiayi.

²³ Nuya̱ṉka mamikmausha je̱a̱ waya̱war Ráapnasha ni aparí̱ncha nukurí̱ncha umai̱ncha tura ashí ní shuari̱ncha wariri̱ntiuk yaruakar Israer shuar matsamkamunmaya̱sha arant matsauwarmiayi.

²⁴ Nuyá̱ Israer aentska ashí irunmia núurtiuk péprunka ekemákarmiayi. Antsu áyatik kuítian tura kurincha namincha jiru tura yaṉkú jiru najankamuncha Uunt Yusa Je̱e̱n kuit ikiutai̱niam ikiusármiayi.

²⁵ Tura Jusuisha tsanirmatai nuwa̱ Ráapnaka ashí ni aentsri̱ntiuk uwemtikramiayi. Jusuí jimiará mamikmau Jirikiú péprunam akupkarmia nuna u̱ku asamtai túramiayi. Tura Raapa aentsri̱sha Israer aentsja̱i̱ irunar yamaiya̱ ju̱i̱sha tuke matsatainiawai.

²⁶ Nu tsawantai̱ Jusuí nekas tajai tusa chichaak “Jirikiú péprun ataksha iwiarak je̱a̱mkataj tákuṉka Uunt Yus íimmianum yumiṉkramu átatui. Núnisaṉ uchirí̱ iwia̱i̱ri̱n iwiaakmari̱n akikmak pepru tépakmari̱nkia aeprurtatui. Tura iniaṉnamu uchirí̱ iwiaakmari̱n akikmak wáitiri̱nkia ikiursartatui” tímiayi.

²⁷ Uunt Yus Jusuiji̱a̱i̱ pujumiayi. Tuma asamtai Jusuí túramun ashí nuṉkanam antukarmiayi.