Juir 3 - Yus Papí: Shuarja̱i̱ Yus Yamaram Chicham Najanamu

Uunt Yus ashí nuṉkanam sumamtikiawartin

¹ Nu túrunamtai tura nu tsawantinkia Jerusaréṉ pépruncha tura Jutá nuṉkancha aṉkant awajsattajna nui̱

² ashí uunt nuṉka mátsatkamu iruran Jusapáta nuṉké̱ pakarí̱n yaruakan wi shuar wáitkiasarmanum tura Winia Israer shuarun tsakiṉmakar nuyá̱ nuṉkarun akintrutkar sunaisaru ásarmatai nincha sumamtikiawartatjai.

³ Warí Wi shuarun yaki ju̱na jukit tusa nekapkamtai̱ji̱a̱i̱ nekapsar iisarmatai awakmaku yaruakarmiayi. Túrawar tsanirmatai nuwa̱ja̱i̱ tsaniniak akiktinia nuja̱i̱ métek uchi áishmaṉchinkia súmainiak akikmakarmiayi. Nuyá̱ nuwa̱chinkia wíniun umartaj tusar surukarmiayi.

⁴ Tura Tírunmaya̱ Setunnumia̱ nuyá̱ ashí Jiristíu nuṉkanmaya̱tirmesha winiasha ¿warí itiurtukarat tusarmea wakerutarum? ¿Winiasha yapajtiúkat túruttrumek? Antsu nu arant awajtakrumni̱ṉkia atumniasha nútiksanak wárik yapajkiattajrume.

⁵ Átumka winia kuítrusha kurirsha yaruakrum wariṉkish tí shiirmach ainia nu atumí najankamu yusri̱ je̱e̱n ikiusmarme.

⁶ Ántsaṉ Jutanmaya̱ tura Jerusaréṉnumia̱ shuarsha ni nuṉke̱ya̱ Kriaku aents yajá yaruakarat tusarum surukmiarme.

⁷ Tura átum tui̱ surukmiarum tímianianak ataksha awakearan ikiankartatjai. Túran atumniasha nútiksanak yapajkiattajrume.

⁸ Kame atumí uchirí̱ncha tura nawantri̱ncha Jutá shuarnum surutkattajrume. Nisha nútiksaraṉ yajá nuṉkanam Sapíu aentsnum surukarat tusan túrattajai. Wi Uunt Yus asan tajai.

⁹ Tura ashí uunt nuṉka mátsatka kakaram aents ainia nu mesetan iwiarnatkar iruntrarti tama antuukati.

¹⁰ Kame átum pukuí arakmatairi̱ṉ puyá̱ najankatarum núnisaṉ átum trikiu juurmatairi̱ṉ naṉki najankatarum tura kakarmachua nusha ‘Wisha kakarmaitjiai’ tití.

¹¹ Ashí uunt nuṉka mátsatkamunam yantam pujarmena nútirmesha tí warik wáurtusrum nui̱ iruntratarum tawai Uunt Yus. Takui̱ ‘Uunt Yusá, áminiu kakaram ainia nu akuptúkarta, nui̱ akattúrarti’ tímiayi Juir.

¹² Núnisaṉ ashí uunt nuṉka mátsatka ainia nu shintiarar iwiarnakar Jusapáta pakarí̱n iruntrarti. Kame nui̱ṉkia ashí ayaam pujuinia núnaka nui̱ pujusan sumamtikiawartatjai.

¹³ Tura ni yajauch túramun árak júuktinia áintsaṉ chichaak ‘Árak júuktin tsawant jeayi’ tíniuiti. Tuma asamtai winirum tsupitiairmiji̱a̱i̱ trikiu neré̱ tsupirum juuktarum. Núnisaṉ uwa júukar najatai̱ṉkia piákuiti túrasha yumiri̱ yaratai̱ áimnar piákar metsainia áintsaṉ nú aentsu yajauch túrutairi̱ṉkia tí nukap ásar metsainiawai.

¹⁴ Uunt Yusa tsawantri̱ jeatéma asamtai Ni sumamtikiatta nu nuṉka pakari̱nkia nekapmarchamnia peṉké nekapmarchamnia aents iruntrar nú pakanmaṉka Ni sumamtikiawartatna nui̱ matsatainiawai.

¹⁵ Etsa̱sha tura kashí nantusha kajintrar núnisaṉ yaasha mushatmakartatui.

¹⁶ Kame Uunt Yussha Seúnnum pujus úunt ya̱wa̱ núnis júrur ajattawai. Tura ni chichame̱sha Jerusaréṉnumia̱ṉ antuittiawai. Túmakui̱ nayaimpisha nuṉkasha muchitrattawai. Núnisaṉ Uunt Yuska ni shuari̱ Israer shuar ejamkar kakatainti.

Jutá shuar ukunam ti shiir pujusártin

¹⁷ Winia akantúkma náintiur Seunka nui̱ṉkia atumí Yusri̱ Wi Uunt Yusan pujamu nekarattarme. Nui̱ṉkia Jerusaréṉka ti shiir akantúkma pepru átatui. Túrunamtaiṉkia atakka wáinchatai aentska nuní̱ wayá̱ yajauch awajtámas naṉkaamakchartatui.

¹⁸ Tura nu tsawantinkia nú nuṉka náintri̱sha pakari̱sha tí peṉker asamtai araksha tí peṉker tsapainiakui yurumkanka peṉké atsumachartatui. Tura Jutanmaṉka ashí entsa núkap wártatui. Núnisaṉ Uunt Yusa Je̱e̱ya̱ púkuni entsa jíntiatna nuka Setim nuṉka pakari̱n ukattiatui.

¹⁹ Tura Ejiptu nuṉkaka ashí emeskamu átatui núnisaṉ Etumka aya kampuntin atsú juáktatui. Nuka ni nuṉke̱n pujuinian Jutá shuaran peṉké ántar máwar numpé̱ uputúraru ásar túrunawartatui.

²⁰ Antsu Jutanmasha tuke matsamtai̱ átatui tura Jerusaréṉnumsha ni tiraṉki̱ nuyá̱ tiraṉki̱sha nui̱ tuke matsamiartatui.

²¹ Numpa upuramu yapajmiátkachmaitkiuisha Wi núnaka yapajmiátkartatjai. ¡Uunt Yuska Seúnnum tuke pujuwiti!” tíniuiti Uunt Yus.