Juir 2 - Yus Papí: Shuarja̱i̱ Yus Yamaram Chicham Najanamu

Uunt Yusa Tsawantrí̱ ujakma

¹ Tura Seúnnumka kachu umpuarum Winia akantúkma naintrua nui̱ kakantra untsumkatarum. Kame Uunt Yusa Tsawantrí̱ jeatéma asamtai ashí nuṉkanmaya̱ aentska sapijmiainiak kuraṉkarti.

² Nu tsawantinkia yuraṉkim utsantra núnis kirit tee ajastatui. Tura tsawa̱a̱kui náintiaani̱ṉkia tsáapnikiar tsáapnikiar wéana núnisar tí kakaram tura tí untsurí suntar winiartatui. Kame yáunchusha tímiatmaaka peṉké wáinchatai̱n núnisaṉ uwir uwir naṉkaamarmataisha tí ukunam aents matsamártatna nusha tímiatmaanka peṉké wainkiachartinian nú tsawantin wáinkiartatui.

³ Tuma asamtai emka ji keeki̱ wéakui úkumpruka kapa̱a̱k ashí amukí̱ winiatsuk tímiatrusar túrawartatui. Warí nu naṉkamatsa̱i̱ṉkia nú nuṉkaka Eten aja tímianuyi túmaitiat nu túrunamtaikia kampuntin atsú nuṉka núni̱ṉ aya núṉkak ajastatui. Nu tímiatruna asamtai wariṉsha juákchattawai.

⁴ Kawaiya nuní̱ iira áiniawai tura tsékenaksha aents kawainium eketka tsékenak urukainia tímiatmartatui.

⁵ Tura naintia pakarí̱n nanten ajainiak mánitiai̱ karu untsurí ashiniak urukainiawa tímiatrusar téter ajainiawai. Núnisaṉ nukasha kaaku ekemam urukawa tímiatmainiak untsurí aents mesetan iwiarnatkar áya ajasár urukainiawa tímiatrusar uu ajartatui.

⁶ Nuyá̱ ashí aents nuna wáinkiar sapijmiakar kurainiak putsú putsú ajasártatui.

⁷ Tura aents kakarma tímiatrus tsékenak mesetan unuimiátkarua tímiatrusar wenuknasha warukártatui. Nuya̱ṉka aṉkant aṉkant ní jinti̱ni̱ṉ wénak chikichkisha jinti̱nkia ikiukchartatui.

⁸ Kame ní jinti̱ni̱ṉ wena ásar ni ái̱ji̱a̱i̱ṉkia chikichkisha tukumnáirachartatui. Núnisaṉ ni ai̱ puya̱ja̱i̱ mantamnakuisha pekamkamuri̱ṉkia tímiatrusaṉ wénawai.

⁹ Tura péprunka weantúrar wenuknum wákaar tsékeṉkiar je̱a̱sha wákaar kasaja̱i̱ métek je̱á̱ áṉkamuri̱ni̱ waya̱wartatui.

¹⁰ Nu túmakui̱ núṉkaka ú̱u̱rkattawai tura nayaimpikia muchitrattawai. Núnisaṉ etsa̱sha tura nantusha mushatmarartatui. Áintsaṉ yaa keamuri̱sha meṉkarattawai.

¹¹ Kame nu suntara matsamkamuri̱ṉkia tí uuntaiti. Tuma asamtai Uunt Yuska ni suntari̱n eem wajatas akupeawai. Tura Nisha ti kakaram asamtai Ni suntarí̱sha Ni chichame̱nka umirainiawai. Warí Uunt Yusa tsawantri̱sha ti ashammainti. Nu tímianuncha ¿yaki katsuntrat?

Yusai̱ waketkit tusar untsuamu

¹² Tuma asamtai Uunt Yus chichaak “Yamaikia atumí nekas kúntuts enentái̱ji̱a̱i̱ ijiarma útrum Winí̱ waketkitiarum” tawai.

¹³ Tuma asamtai atumí pushiri̱ṉkia já̱a̱tsuk antsu kúntuts enentáimtumasrum atumí Úunt Yusri̱ni̱ṉ waketkitiarum. Warí Uunt Yuska ti waitnentkartin asa wárik kajechuiti antsu tí aneṉkratniuiti. Tuma asa waitnenkarturka wárik asutkiartichuiti.

¹⁴ Nisha atumniaka asuttiamtsuk antsu péṉker pujutnum yumiṉkramainiak Uunt Yus atumí Yusri̱ súsatniuncha tríkiun tura wíniuncha suramsashtarpash.

¹⁵ Kame Seun nainniumka kachu umpuartarum aents iruntrar ijiarmáwarat tusarum ujaktarum.

¹⁶ Núnisaṉ ashí aents iruram imiatkincha awajsarta. Tura uuntcha uchichisha áintsaṉ muntsúaku ainia nusha ashí irurarta. Tura yama nuatnaikiaru ainia nusha ni je̱e̱ya̱ṉ aṉkant aṉkant jíinkiar iruntrarti.

¹⁷ Yúsnan pujurniutirmesha Uunt Yusna pujurin asarum Yusa Je̱e̱n wá̱i̱ti̱a̱i̱ri̱n Yus áestutai̱ pujana nui̱ ajapén wajasrum útkamaikia seakrum “Uunt Yusa ame shuarum tsaṉkurarta. Antsu natsanmai̱ ajaktinnium tsaṉkamkartukaip. Warí chíkich nuṉkanmaya̱ aents Yusan enentáimtichu ainia nu nupettamkar wishikiarturarai tsaṉkamkartukaip. ¿Urukamtai chíkich chíkich péprunmaya̱sha chichainiak ‘Ni Yusri̱sha ¿tuíntsuk pujá?’ tiártata?” titiarum.

Ukunmaka ímiatrusaṉ awajsam núkap takustin

¹⁸ Nuya̱ṉka Uunt Yus Ni nuṉke̱n akasmatak Ni shuari̱n waitnentrattawai.

¹⁹ Nui̱ṉkia Uunt Yus ni shuari̱n chicharainiak “Yamaikia Wi tríkiuncha winiuncha asuitincha amastatjarme. Túramtai yuárum nútsurtatrume. Nuyá̱ chíkich nuṉkanmaya̱ aents áujmatsar wishikchatai awajsattajrume. Tura atakka natsanmai̱ awajtai̱ṉkia áchattarme.

²⁰ Yamaikia ti tsuumainian yajauchin túrawaru ásarmatai araki̱a̱ kautramkarunka kampuntin atsú nuṉkanmaani̱ akuprattajai. Tura émtintri̱nkia etsa̱ jintiainmaani̱ nayantsanam utsan uku wininianka nayantsanam etsa̱ akatainmaani̱ utsawartatjai. Túram káukar ti meje̱niartatui.

²¹ Maa nuṉkáa sapijmiatsuk warasta. Warí Uunt Yus nekaachminian ti péṉkera nuna túrattawai.

²² Kampunniunmaya̱ yajasmatirmesha sapijmiakairap. Atumí yurumke̱ ataksha tsapartámkattarme. Núnisaṉ numisha úwasha íkiusha tí nukap nerekartatui.

²³ Yamaikia atumí Uunt Yusri̱ yaunchu yútumtikniuya núnis emka yutuktinniasha núnisaṉ ukunam yutuktinniasha atsumamuja̱i̱ métek yútumtikiattawai. Tuma asamtai Seuna uchirí̱tirmesha atumí Uunt Yusri̱i̱ṉᵏⁱ wararsatarum.

²⁴ Nuya̱ṉka trikiu irumtai̱nmaṉka piákartatui. Núnisaṉ uwa ijiurtai̱nmasha winiu yamaram nuyá̱ asuitisha áimnarar metsaamam ajartatui.

²⁵ Wi urutmá uwiya atumí arakri̱n emestukarat tusan Winia tí nukap suntarun manchin maan shuken titikriátsan akuptúkmajrumna nuna naṉkaamas ataksha atumí yurumke̱n amastatjarme.

²⁶ Tuma asamtai atumí Uunt Yusri̱ ti shiir yaintmaku asakrumin átum wakeramu yurumá ejemara nútsurum Ni naari̱ shiir awajsattarme. Nu túrakrum Wi shuartirmeka atakka peṉké natsanmai̱ juákchattarme.

²⁷ Nui̱ṉkia átum Israer shuartiram Wi Úunt Yusaitjiana nu atumji̱a̱i̱ pujamu tí paant nekarattarme. Warí Wíkitjiai atumí Uunt Yusri̱ṉkia, chíkichkia peṉké atsawai. Tuma asamtai Wi shuartirmeka atakka peṉké natsanmai̱ juákchattarme.

Yusa Wakaní̱ entsa ukanua núnis akuptúkma

²⁸ Tuma asamtai ju̱na ukunam Winia Wakantrun ashí aentsun akuptúkartatjai. Nuja̱i̱ atumí uchirí̱sha núnisaṉ atumí nawantri̱sha Yúsnan etseriartatui tura úuntach ainia nuka mesekramiartatui. Núnisaṉ nátsaka ímiaja̱i̱k paant wainiartatui.

²⁹ Nu tsawantinkia áishmaṉnasha nuwa̱ncha takarin ainia núnaka wakantrun akuptúkartatjai.

³⁰ Nútiksanak nayaimpinmasha tura nuṉkasha Winia kakarmarun iniakmakun aents ashamak ii wajamnian numpancha jiniasha yuraṉkim mukuintiui̱niancha iniakmastatjai.

³¹ Kame Uunt Yusa uunt tsawantri̱ tí tsuumai̱ átatna nu jeatsa̱i̱ṉ etsa̱sha kaji̱niak tee ajastatui tura kashi nántuka numpa ajastatui.

³² Kame Uunt Yus timia tímiatrusaṉ Jerusaréṉnum Seun nainniumka uwempratin átatui. Tuma asamtai yaaksha Uunt Yusa naari̱ pachis enentáimtuinia nuka uwemprartatui. Nuyá̱ Uunt Yus untsukma ainia nuka tuke iwiaaku juákaru ainia nuja̱i̱ pujusártatui. Tur. 2:17-21