Juaṉ 21 - Yus Papí: Shuarja̱i̱ Yus Yamaram Chicham Najanamu

Jesus ni unuiniamuri̱n wantintiukma

¹ Tipirias antumiaṉka kaanmatkari̱i̱n Jesus ni unuiniamuri̱n wantintiukmiayi. Jú̱nisaṉ ámiayi.

² Semuṉ Pítrusha Jímiampramu Tumassha Kariréanmaya̱ Natanaérsha Sepetéu uchirí̱sha tura chíkich jímiar unuiniamuri̱sha métek iruntrar pujuarmiayi.

³ Semuṉ Pítrusha “Namakan nekaja̱i̱ naṉkíattsan wéajai” tímiayi. Chíkich mash “Iisha winittiaji” tiármiayi. Wéar uunt kanunam eṉkemprar nu kashi achitsuk tsawa̱rarmiayi.

⁴ Káshik ai̱ṉ Jesus entsá kaanmatkari̱i̱n wantinkiamiayi tura ni unuiniamuri̱sha Jesusan nekaacharmiayi.

⁵ Jesussha chichaak “Uchiru, ¿namak achikiurmek?” Tutai nisha “Atsá” tiármiayi.

⁶ Takui̱ Jesus chichaak “Neka untsuurnumaani̱ aju̱ntkatarum. Nui̱ achiktatrume” tiármiayi. Ni timia núnisaṉ túrawar namakan ti achikiar neka júsatniun tujintkiarmiayi.

⁷ Núja̱i̱ṉkia Jesusa unuiniamuri̱ Jesus ti aneemia nu Pítrun chicharuk “Ii Úuntri̱nti.” Takui̱ Pítrusha áimiaku asa ni pushiri̱n entsar entsá iniaṉmiayi yukuak jeataj tusa.

⁸ Chíkich unuiniamuri̱sha jeachat pujuiniachuk nekan japiki̱ kanuja̱i̱ kaanmatkanam jeawarmiayi.

⁹ Kaanmatkanam jeawar ji kaí̱r ámanum namakan jiámun wáinkiarmiayi. Páṉnasha wáinkiarmiayi.

¹⁰ Jesussha “Átum achikiurmena nuyá̱ jiátin itiatárum” tímiayi.

¹¹ Tutai Semuṉ Pítiur kanunam we nekan nekartiuk kaanmatak japiki̱ itiamiayi. Itiar namaknasha siantu seṉkuintitráis nekapmararmiayi. Ti untsurí áyat nekassha jáankachmiayi.

¹² Nuyá̱ Jesussha “Yurumáitiarum” tímiayi. Ni unuiniamuri̱sha “aya ii Uuntri̱ áminiaiti” tusar inintrústinian natsantiarmiayi.

¹³ Nuyá̱ Jesus wajaki̱ páṉkan achik susar tura namaknasha súsarmiayi.

¹⁴ Jesus jakamunmaya̱ nantaki̱ ju̱ja̱i̱ menaintiú ni unuiniamuri̱n wantintiukarmiayi.

Jesus Semuṉ Pítruja̱i̱ chichamu

¹⁵ Nuyá̱ yurumáwar Jesus Semuṉ Pítrun aníak “Junasa uchirí̱ Semuṉká ¿ju̱ja̱i̱ naṉkaamas anentamek?” tútaisha Pítiur “Ee, Uuntá, wi wakerajme nu Ame nékame.” Jesussha “Nuiṉkia winia murikiur yamatskamchia nu ayurata” tímiayi.

¹⁶ Ataksha aníak “Junasa uchirí̱ Semuṉká ¿Winia anentamek?” tutai Pítrusha “Ee, Uuntá, wi wakerajme nu Ame nékame” tímiayi. Jesussha “Winia murikiur wáinkiata” tímiayi.

¹⁷ Nuyá̱ ataksha aníak “Junasa uchirí̱ Semuṉká ¿Winia wakerutamek?” Pítrusha menaintiú iníam kúntuts enentáimiar “Uuntá, ashí nékame. Wi wakerajme nu Ame nékame.” Jesussha “Winia murikiur ayurata.

¹⁸ Maa, nekas tájame. Natsa asamka iwiarmampram ame wakeramunam wéuyame. Tura úuntach ajasmeka ame kunturam ayapá̱rakmin chíkich áentstamprattawai tura ame wétin nakitiam nui̱ juramkiartatui” tímiayi.

¹⁹ Jesus núja̱i̱ṉkia Pítiur itiur jákatniuit nuna ujakmiayi. Tura núnisaṉ jakamtai Yusan shiir awajsattana nuna ujakmiayi. Nuyá̱ Pítrun “Nemartusta” tímiayi.

Juaṉ túrunatniun Pítiur Jesusan aniasma

²⁰ Pítrusha ayanmar chíkich unuiniamuri̱n Jesus ti anea nuna némarun wainkiamiayi. Kame nu unuiniamuka nuik Jesus jáatsa̱i̱ṉ yurumáiniakui “Uuntá, ¿ya surutmaktata?” timia núiti.

²¹ Nincha Pítiur wainiak Jesusan aniasmiayi “Uuntá, ¿ju̱sha warí urukatniuit?”

²² Jesussha aya̱k “Wi wakeraknaka iwiaaku pujai̱ṉ tátatjai tákuisha ¿warí itiurtama? Ámeka nemartusta” tímiayi.

²³ Núja̱i̱ṉkia nu unuiniamuri̱ jákashtatui tusa Yus shuarnum áujmatiarmiayi. Túrasha Jesus jákashtatui tíchamiayi antsu áyatik “Wi wakeraknaka iwiaaku pujai̱ṉ tátatjai tákuisha ¿warí itiurtama?” tímiayi.

²⁴ Wikia nú unuiniamuri̱ntjiai. Ju̱ papincha aaru asan mash nekasaiti tajai. Ashí shuarsha núnisaraṉ tuíniawai.

²⁵ Nu arantcha ju̱i̱ áarchamusha ti awai. Kame ashí aamka ti untsurí papí asa ashí nuṉkanam ikiuschamnia ainti. Nuke atí.