Juaṉ 20 - Yus Papí: Shuarja̱i̱ Yus Yamaram Chicham Najanamu

Jesus nantakmia

¹ Tumiṉtincha káshik kirit ai̱ṉ Máktaranmaya̱ Marí Jesus iwiarsamunam íistajtsa wémiayi. Jesusan iwiarsar kaya uuntja̱i̱ wa̱a̱n atutkarmiayi. Tura Marí nui̱ jeá nu kaya uraimiun wainkiamiayi.

² Nuna wainiak Semuṉ Pítiur pujamunam tsékeṉki̱ wémiayi. Chíkich unuiniamuri̱ Jesus ti anemia nusha pujumiayi. Tura Marí chichaak “Iwiarsamunmaya̱ ii Úuntri̱n júkiarai. Tura ¿tuíntsuk ikiusara?” tímiayi.

³ Pítrusha chíkich unuiniamuri̱ji̱a̱i̱ jíinkiar iwiarsamunam iyuwarmiayi.

⁴ Mái̱ metek tsékeṉkiar Pítiur jeatsa̱i̱ṉ chíkich unuiniamuri̱ iwiarsamunam emka jeamiayi.

⁵ Nisha waya̱tsuk tsuntsumá iis penuarmari̱ṉkia nui̱ tepan wainkiamiayi.

⁶ Nuyá̱ Semuṉ Pítiur ukunam jeá iwiarsamunam wayá̱ penuarmari̱ nui̱ tepan wainkiamiayi.

⁷ Chíkich tarach Jesusa muuke̱n penuarma nusha nanerma niisháa tepan wainkiamiayi.

⁸ Nuyá̱ chíkich unuiniamuri̱ emka tamia nusha iwiarsamunam waya̱miayi. Nisha túruna wainiak “Jesus nekas nantakní̱” tu enentáimpramiayi.

⁹ Nuna wáintsuk Yus Chichamnum “Jesus jakamunmaya̱ nantaktiniaiti” áarman áujsariat nekaacharmiayi.

¹⁰ Nuyá̱ mai̱ ni je̱e̱n waketkiarmiayi.

Máktaranmaya̱ Marin Jesus wantintiukma

¹¹ Tura Marikia iwiarsamunam juak uutu pujumiayi. Nisha útiataṉ tsuntsumá iwiarsamunam iimsamiayi.

¹² Tura Jesusa aya̱shí̱ nuik aepsamunam nayaimpinmaya̱ suntar jímiar puju entsaru muuknumaani̱ tura chíkichka nawe̱nmaani̱ wajainian wáinkiarmiayi.

¹³ Nayaimpinmaya̱ suntarsha “¿Urukamtai útam?” tiármiayi. Marisha “Winia Úuntrun jurutkiarai tura ¿tuíntsuk ikiusara?”

¹⁴ Tinia ayantáraj tukamá Jesusan wainiak Nin nekaachmiayi.

¹⁵ Jesus aníak “¿Urukamtai útam. Ya e̱a̱m?” tutai Marisha ajan wáinniua nuiti tusa “Uuntá, ame ni aya̱shi̱ jukimkia, tui̱ ikiusmam ujatkata jurumkitiaj” tímiayi.

¹⁶ Nuyá̱ Jesus “Mariyá” tutai nisha ayanmar “Rapuni” tímiayi. Nusha Israer chichamja̱i̱ṉkia “Uuntá” tawai.

¹⁷ Jesussha tutai “Achirkaip. Winia Aparuí̱ tuke waatsjai. Antsu weme Wí shuar ujakárta. Winia Aparuí̱ wéajai. Nisha atumí Aparí̱nti. Winia Yúsruiti tura atumí Yúsri̱nti tawai titiá” timiayi.

¹⁸ Nuyá̱ Máktaranmaya̱ Marisha Jesusa unuiniamuri̱n wainiak “Wi Úuntan wainkiajai. Nisha ju̱na mash túrutui” tu ujakármiayi.

Jesus ni unuiniamuri̱n wantintiukma

¹⁹ Nu tsawantai̱ tumiṉtin ni unuiniamuri̱ Israer shuara úuntri̱n ashamainiak kashi iruntrar waiti epeni pujuarmiayi. Túrasha Jesus aya waya̱miayi. Tura ajapén wajas “Aṉkant shiir pujustarum” tímiayi.

²⁰ Nuna ti nuyá̱ ni uwejé̱n ajintruamuncha páenum ijiumuncha iniakmasmiayi. Ni unuiniamuri̱sha Úuntri̱n wáinkiar shiir warasarmiayi.

²¹ Ataksha Jesus “Aṉkant shiir pujustarum. Winia Apar akatar akuptúkma núnisnak Wisha akatran akupeajrume” tímiayi.

²² Nuyá̱ ni matsatmanumaani̱ umpuí chichaak “Yusa Shiir Wakaní̱ atumí enentái̱n waya̱ti.

²³ Shuara tunaari̱ṉkia átum ‘Tsaṉkurnarti’ tákurminkia tsaṉkurnartatui. Tura nu shuar ‘sumamati’ tákurminkia sumamati” tímiayi Jesus.

Tumas Jesus nantakmián wainkiamu

²⁴ Tura chikichik unuiniamu, Jímiampramu Tumas, Jesus tamia nui̱ pujuchmiayi.

²⁵ Tura ukunam chíkich unuiniamuri̱ ujainiak “Ii Uuntri̱ wainkiaji” tiármiayi. Tura Tumas chichaak “Ajintruamuri̱ wainkian uwejrun awa̱intiuatniuitjiai. Tura paenumsha awa̱intiuatniuitjiai. Peṉké jaka asamtai aya nuja̱i̱ iniantkímiun enentáimtustatjai” tímiayi.

²⁶ Chíkich tumiṉtin ataksha Jesusa unuiniamuri̱ iruntrarmiayi. Nuiṉkia Tumassha niji̱a̱i̱ pujuarmiayi. Tura waiti epenmianumaṉ Jesus wayá̱ ajapén wajas “Shiir pujustarum” tímiayi.

²⁷ Nuyá̱ Tumasan chicharuk “Winia uwejur iisam ame uwejém awa̱intiuata. Núnismek winia paerui̱ uwejém awa̱intiuam iistá. Tura arantutsuk nekas enentáimtursata” tímiayi.

²⁸ Nuyá̱ Tumas “Winia Uuntruá, nekas winia Yúsruitme” tímiayi.

²⁹ Jesussha chichaak “Winia wáitkiam nuiṉ enentáimtursame. Antsu Winia wáittsuk enentáimturaru nekas shiir áiniawai” tímiayi.

Yusa Uchirí̱n enentáimtusarat tusa papí aarma

³⁰ Aentsti tujintiamuncha Jesus túramu ti untsurí ju̱ papinium áarchamu áiniawai. Tura ni unuiniamuri̱ mash wáinkiarmai.

³¹ Antsu Jesuska Kristu asa Yusa Uchirí̱nti tu enentáimtustarum tusan jú̱naka áarmajai. Tura enentáimtakmin Jesus ni iwiaakmari̱n yamarma nuna amastatui.