Juaṉ 16 - Yus Papí: Shuarja̱i̱ Yus Yamaram Chicham Najanamu

¹ “Átum kanartuka̱i̱rum tusan jú̱naka tájarme.

² Israer shuar iruntai̱nmaya̱ ji̱i̱ki̱ akuptámkattarme. Nu arantcha mantamainiaksha ‘Yusan shiir awajsattsan túrajai’ tiártatui.

³ Nu shuar Winiasha tura winia Aparnasha nékachu ásar túrutmawartatui.

⁴ Núnaka yamái tájame. Tura túrunamtai ‘núnisaṉ átiniaiti’ tímiaj nu nekaarum itiurchat enentáimprairap. Atumji̱a̱i̱ tuke pujá asan núnaka yaunchu ujakchamjarme.

Yusa Wakaní̱ túratniun

⁵ Antsu yamaikia wáketjai winia Akuptúkmia nuja̱i̱ pujustaj tusan. Tuma ai̱ṉ wéajna nu inintratsrume.

⁶ Antsu nuna takui̱ tí kuntuts enentáimprarme.

⁷ Tura Wi wématai atumji̱a̱i̱ṉkia nuna naṉkaamas péṉker átatui. Iis, Wi wéaknaka atumín yaintmaktinia nuna akupkáttajai tura wéachkuiṉkia táchattawai. Nuka ti nekasaiti.

⁸ Yusa Wakaní̱ taa ashí jú̱ nuṉkanmaya̱ aentsun ju̱ menaintiun nekamtikiattawai. Ni yajauch túrutairi̱n aan nekamtikiattawai. Péṉker wekasamniana nunasha nekamtikiattawai. Tura Yus súmamtikiamniana nunasha nekamtikiattawai.

⁹ Winia enentáimturainiachu yajauchi túrin áiniawai.

¹⁰ Winia Aparuí̱ wáketkui wáitkiashtatrume. Tuma asamtai ashí shuar wi péṉker yajauchiji̱a̱i̱nchu wekaamun nekaawartatui.

¹¹ Tura ju̱ nuṉkanam akupniúnka Yus súmamtikia asa shuarnasha súmamtikiamniaiti. Nuna paant nekaawartatui.

¹² Nu arantcha núkap tíintjiarme túrasha átumka nekaachaintrume.

¹³ Yusa Wakaní̱ ashí nekas tiniu asa ashí nekasa nuna unuitiamprattarme. Ni enentáimmiaja̱i̱ tíchattawai antsu winia Aparuí̱ antukma nuna ujatmáktatui. Ukunam átatna nunasha ujatmáktatui.

¹⁴ Ashí Wínian ujatmak Winia shiir awajtústatui.

¹⁵ Ashí winia Apar takakna nusha Wíniaiti. Nu asamtai ‘ashí Wínian ujatmáktatui’ tajai.

Kúntuts pujuiniayat ukunam warasartatui

¹⁶ Ishichik pujusrum Winia wáitkiashtatrume. Nuyá̱ ataksha ishichik pujusrum ataksha waitkiattarme. Wisha winia Aparuí̱ wéajai.”

¹⁷ Nuyá̱ ni unuiniamuri̱ nuamtak áujmatainiak “¿Jú̱ chichamsha warimpiait? ‘Ishichik pujusrum wáitkiashtatrume tura ataksha ishichik pujusrum waitkiattarme tura Aparuí̱ wéajai’ tátsuk.

¹⁸ ‘Ishichik pujusrum’ tana nusha ¿warimpiait? Ni tana nu ántatsji” tiármiayi.

¹⁹ Jesussha nin aniastai táman nekáa chichaak “‘Ishichik pujusrum wáitkiashtatrume nuyá̱ ataksha ishichik pujusrum waitkiattarme’ tímiajai. ¿Núchakait átum inintrústin wakerarmena nua?

²⁰ Ti nekas tájarme. Átumka kúntuts pujusrum úttiatrume tura Yus shuarcha warasartatui. Tuma ai̱ṉᵏⁱ átum kúntuts pujayatrumek ukunam warastatrume.

²¹ Iis, nuwa̱sha takustin tsawant jeamtai najaimiak wáitiatsuk. Tura uchin takus ti warak wáitsamunka enentáimtsui.

²² Atumsha núnisrumek yamaik kúntuts pujarme. Tura atak íitjiarum tusan winiakui ti shiir atumí enentái̱n warastatrume. Nu warastinian jurutrámkichmin áiniawai.

²³ Nu tsawantinkia peṉké ininsashtatrume. Ti nekas tájarme Winia enentáimtursarum winia Apar searum nuna ashí amastatui.

²⁴ Yamaisha Winia enentáimtursarum winia Apar seachurme. Túrasha seakrumni̱ṉkia ti shiir warasuk tusa amastatui.

Jesus jú̱ nuṉkanmaya̱n nupetkaiti

²⁵ Métektaku chichamja̱i̱ nakumkan nuna tímiajai. Tura ukunmaṉka nuja̱i̱ chichatsuk winia Aparnan paant ujaktatjarme.

^26-27 Nu tsawantai̱ átumka Winia enentáimtursarum winia Apar seattarme. Winia Aparsha atumín anea asamtai Wi Nin áujsatin atsumashtatrume. Winia anentu asarum tura winia Aparuí̱ya̱ táman enentáimtakrumin Nisha anenmawai.

²⁸ Winia Aparuí̱ya̱ jíinkin jú̱ nuṉkanam táwitjiai. Yamaikia jú̱ nuṉkanmaya̱ jíinkin ataksha Aparuí̱ wáketjai” tímiayi.

²⁹ Nuyá̱ ni unuiniamuri̱ chicharainiak “Yamaikia métektaku chichamja̱i̱nchu chichaame.

³⁰ Mash nékaitme. Shuar Ámin ininmatsa̱i̱ṉ péṉker áimkiatin nékame. Nu nekaar Ame nekas Yusai̱ya̱itme tu enentáimtaji” tiármiayi.

³¹ Tura Jesus chichaak “¿Nekasash enentáimtarum?

³² Tí warik átumka ashamkarum tsakiṉmakattarme tura Winiak ikiurkittiarme. Antsu winia Apar pujakui Wiki pujatsjai.

³³ Winia enentáimturkuram aṉkant shiir pujusuk tusan tájarme. Jú̱ nuṉkanam ti wáitsattarme. Tura Wi jú̱ nuṉkanmaya̱n nupetka asamtai warastarum” tímiayi Jesus.