Juaṉ 13 - Yus Papí: Shuarja̱i̱ Yus Yamaram Chicham Najanamu

Jesus ni unuiniamuri̱ nawe̱n nijiatramu

¹ Paskua namper jeatin chikichík tsawant ajasmatai Jesusa tsawantri̱ jeatémayi. Túramtai ju̱ nuṉkan ikiukí̱ ni Aparí̱i̱n wétiniuyi. Jesussha nuna nekaamiayi. Ashí Níniun ju̱ nuṉkanam pujuinian tuke anea asa amúamunmasha yapají̱tsuk tuke aneemiayi.

² Nu tsawantai̱sha murikiun yúatin ármiayi. Tura yurumátin jeatsa̱i̱ṉ iwianchi uuntri̱ Semuṉka uchirí̱ Jútas Iskariúti enentái̱n Jesusan surukat tu enentáimtikramiayi.

³ Tura Jesus Yusai̱ya̱ tau asa waketkitniuyi. Tura Yus Apa ashí mash susamiayi akupin atí tusa. Jesussha nuna nekáa

⁴ chíkich yurumuk pujuiniai̱ wajakmiayi. Tura pushiri̱n áimiak awaṉkéman emenmamamiayi.

⁵ Nuyá̱ nijiaamatainium entsan yará ni unuiniamuri̱ nawe̱n nijiatramiayi. Tura awaṉkémja̱i̱ japirmiayi.

⁶ Semuṉ Pítiur jearin Pítiur chichaak “Uuntá, ¿winia nawer nijiartaj tamek?”

⁷ Takui̱ Jesussha chichaak “Wi túrajna nu yamái nékatsme tura ukunam nekaattame.”

⁸ Tutai Pítiur chichaak “Peṉké winia nawerka nijiarchattame” takui̱. Jesussha chichaak “Wi nijiaachkuiṉkia Wiji̱a̱i̱ tsaniṉkia pujuschamniaitme.”

⁹ Tutai Semuṉ Pítiur chicharuk “Nuiṉkia Uuntá, aya nawerkechu antsu uwejrusha tura muukarsha nijiatrurta” tímiayi.

¹⁰ Tura Jesus chichaak “Yamái mainkia aya̱shí̱ shiir asamtai aya nawe̱ni̱ṉ nijiamártiniaiti. Atumí enentái̱n ashí péṉkeraitrume. Túrasha ashí shuarcha” tímiayi.

¹¹ Kame Jútas Nin suruktinian nekáa “ashí shuarchan” tímiayi.

¹² Jesussha nijiar umik ni pushiri̱n entsarmiayi. Tura atak pujus chichaak “¿Atumsha Wi túrajna nu nekaarmek?

¹³ Wi atumí Uuntri̱ asamtai nekas ‘Uuntá’ túrutrume. Nusha péṉkeraiti.

¹⁴ Tura Jintinniuitiatan tura Úuntaitiatan atumí nawe̱n nijiarchajak. Atumsha núnisrumek nuamtak náwem nijiatnairatarum.

¹⁵ Atumín nekapruatsan túramjai. Atumsha núnisrumek túratarum.

¹⁶ Ti nekasan tajai. Takarniuka ni uuntri̱ naṉkaamaschaiti. Akupkámusha akupea nuna naṉkaamaschaiti.

¹⁷ Nu nekaarum túrakrumka shiir átatrume.

¹⁸ Tura tájana nuna ashí tátsujrume. Anaikiaitiaj núnaka Wi nékajai. Tura Yus Chicham uminkiatniuiti, nékajai. Ju̱ áarmaiti ‘Wiji̱a̱i̱ yurumna nu winia nemasur ajasái.’ YKan. 41:9

¹⁹ Nuka túmatsa̱i̱ṉ ujajrume. Nuyá̱ túrunamtai Yusa Uchirí̱ntiaj nusha paant nekaattarme.

²⁰ Wi tájana nu nekasaiti. Shuar Wi akupeaj nuna shiir itiaakka Winiasha shiir itiaarui. Tura Winia shiir itiaarna nusha Winia Akuptúkuncha itiaawai” tímiayi.

Jesus Jútas Nin suruktinian étserui

²¹ Nuna ti Jesus ni enentái̱n ti itiurchat enentáimpramiayi. Tura chichaak “Ti nekas tajai chikichik ju̱i̱ atumji̱a̱i̱ pujana nu Winia surutkattawai” tímiayi.

²² Tutai ni unuiniamuri̱ nuamtak íiniaisar “¿Yanak taa?” tiármiayi.

²³ Chikichík unuiniamuri̱ Jesus ti aneamu Niji̱a̱i̱ tsaniṉ yurumuk pujumiayi.

²⁴ Tuma asamtai Semuṉ Pítiur ni uwejé̱ja̱i̱ iniakmas “Aniasta, ¿yanak áujmata?”

²⁵ Tutai Jesusan áyanmatsan aniasmiayi. “¿Yait Uuntá?” tímiayi.

²⁶ Jesussha aya̱k “Páṉkan túumnium aju̱ṉkan susattaj nuiti” tímiayi. Tura nuya̱i̱k páṉkan túumnium aju̱ṉ Semuṉka uchirí̱n Jútas Iskariútin susamiayi.

²⁷ Tura wárik Jútas páṉkan achikmatai iwianchi uuntri̱ Satanás ni enentái̱n waya̱miayi. Nuyá̱ Jesus chicharuk “Túrattamna nu wárik túrata” tímiayi.

²⁸ Tura ashí nui̱ yurumáiniak pujuarmia nusha wariniak taa tusa nekaacharmiayi.

²⁹ “Kuítrincha kuit súsarta” tátsuash tu enentáimprarmiayi. Tura chikitcha “nampernum yurumátin atsumajnia nu sumakta” tátsuash tu enentáimprarmiayi. Jútas kuítian wáinin asamtai tu enentáimprarmiayi.

³⁰ Jútas páṉkan yua kashi ajasmanum jiinkimiayi.

Yamaram akupkámu

³¹ Jútas jiinkimtai Jesus chichaak “Wi Aents Ajasu asamtai winia kakarmar yamaikia paant átatui. Tura wi túramuja̱i̱ Yusa kakarmari̱sha ti paant átatui.

³² Wi Yusa kakarmari̱n paant awajeakui Wisha ni Uchirí̱ asamtai winia kakarmarnasha Yuska wárik paant awajsattawai.

³³ Uchichiru, atumji̱a̱i̱ tí untsurí tsawant pujuschattajai yamaikia. Wi Israer shuaran tímiaj nútiksanak atumín tájarme. Atumsha Winia e̱a̱tkáttarme tura wi wéamunam winishtatrume.

³⁴ Ju̱ yamaram akupeamun amaajai nuamtak mái̱ anenai ajatarum tusan. Wi atumín aneajrumna núnisrumek atumsha nuamtak mái̱ anenai ajatniuitrume.

³⁵ Anenaiyakrumni̱ṉkia nuja̱i̱ ashí shuar ‘Kristu unuiniamuri̱ áiniawai’ turamartatui.”

Pítiur Nin natsantratniun Jesus ujakma

³⁶ Semuṉ Pítiur Jesusan aníak “Uuntá, ¿túa wéam?” tutai Jesussha “Wi wéajna nui̱ yamaikia winichminiaitrume. Tura ukunam winittiarme” tímiayi.

³⁷ Nuyá̱ Pítiur chichaak “Uuntá, ¿urukamtai yamaikia winichminiaitiaj? Ámin yáiṉtajtsan jakataj tajai” takui̱

³⁸ Jesussha chichaak “¿Nekasmek tame? Ti nekas tájame, atash shiniatsa̱i̱ṉ Winia menaintiú natsantrurtatme” tímiayi.