Jrm. 9 - Yus Papí: Shuarja̱i̱ Yus Yamaram Chicham Najanamu

¹ Wi shuara nawantri̱ kaji̱ṉkiáru enentáimtusar káshisha tura tsawai̱sha úttinniasha ¿yaki entsa akaana nútikruat winia muukrui̱sha tura winia nea̱jkirnasha yaki púkuni jiinia nútikruat winia ji̱rui̱sha?

² Wi shuara ikiukin wétaj tákuisha kampuntin atsunumsha wekainia ayampratniuncha ¿yaki surusat? Warí ashí tsanirma ásar niṉkia anaṉkartua yajauch awajkartin iruntraruiti.

³ Uunt Yus chichaak “Ni iniai̱ṉkia tíshimkiuja̱i̱ ekentkatniua tímiatrus iwiararuiti. Chichakmán tímiatrusaṉ umiktinniachu antsu anaṉkartuatai tusar ju̱ nuṉkanmasha kakaram ajasáruiti. Winia nekarainiachu ásar yajauchin túruiniak aya yájauchiniak e̱a̱iniawai.

⁴ Ni írutramuri̱ya̱ṉka aṉkant aṉkant aneararti. Chikichík yatsumkesha itiurchat awajtúkchamniaiti tu enentáimtusaip. Warí yátsumetkusha anaṉkramui tura írutramurmeka tsanumprutmainiawai.

⁵ Aṉkant aṉkant ni írutramuri̱nkia anaṉkainiawai tura nekasa núnaka chichainiatsui. Núnisaṉ ni iniai̱ncha aya wait chichastinian jintintiáwaruiti. Yawe̱tmam aya mui̱jmiai̱ áiniana nunak pujursaruiti.

⁶ Aya anaṉkartutnak matsamtin áiniawai tuma ásar Winia nekaratniunka nakitiáiniawai” tawai Uunt Yus.

⁷ Tuma asamtai Ashí Akupin Uunt Yus chichaak “Pai yamaikia kuri unuikiar aya kúrik awajsatniua áitkiasan nekapsartatjai. Túrachkuncha Wi shuara nawantri̱ncha ¿warí itiurkatjak?

⁸ Warí anaṉkartin ásar ni iniai̱ṉkia naṉki maṉkartinia tímianu áiniawai. Ni tsaníakmari̱ji̱a̱i̱ áujmatainiakka itiurchat awajkachma aṉkant pujustinian áujmatainiawai túrasha anaṉka aju̱a̱rtinian enentáimtuiniawai.

⁹ Nuna túruiniankek ¿pachischartataj?” tawai Uunt Yus. Nuiṉkia uunt nuṉka mátsatkamu túmaitkiuisha Winia ¿yapajtiutskek initiústatam?

¹⁰ Ashí amukma aya jú̱nik juákaru ásarmatai wétinkia yaaksha atsawai tura waaka úteamuksha ántuwatsui. Tuma asamtai naint áiniana ai̱sha tura kampuntin atsú nuṉkanmasha sa̱a̱k irunainiana nui̱sha jakamnia nekapeakur kúntuts enentáimsar úteamun ántumtikiartatjai. Warí nanamtin yakiya̱ áiniana awiimiak yajasma nuṉkaya̱ áiniana nusha pisakár yajá wéaruiti.

¹¹ Jerusaréṉnaka ashí emeskan tsái̱kian tepetar awajkattajai. Túran ku̱jancham matsamtai̱ awajsattajai. Tura Jutanan pepru irunainia nunasha ashí emeskaran aentsri̱sha atsá awajsartatjai.

¹² ¿Ya shuarak timiá nékait ju̱na nekaatniusha? Uunt Yussha ¿yanak chichasuit? ju̱na paant awajsatniuncha. ¿Urukamtai nuṉkasha emesnaksha kampuntin atsú nuṉka núniksha naṉkaamakchamniasha ajasuit?

¹³ Tura Uunt Yus chichaak “Warí wi akupkámu umiktin chichaman nisha iimiainiamunmaṉ súsarmiaj nuna iniaisaruiti. Núnisaṉ Wi chichakmiaj nuja̱i̱ métek umikiar wekasacharuiti” tímiayi.

¹⁴ Núnaka túrutsuk ni enentái̱ wakeruiniamun tura ni aparí̱ jintintiáwarma núnisaṉ túrawarmai Páaran enentáimtuiniak.

¹⁵ Tuma ásarmatai Ashí Akupin Uunt Yus Israera Yusri̱ chichaak “Pai yamaikia jú̱ aentsnaka ajeján ayurawartatjai núnisnak entsancha tséas eṉkeamun árartatjai.

¹⁶ Núnisarnak nisha tura ni aparí̱sha nekaacharma nuṉkanam tsakiṉmakartatjai. Túrawaran tui̱ matsamártata nui̱sha puya̱ja̱i̱ amú amú awajsartatjai” tawai.

¹⁷ Ashí Akupin Uunt Yus chichaak “Kúntuts enentáimmian nakumkatniun unuimiátkaru tura nuna túrin tí unuimiákaru áiniana nusha enentáimtusrum untsukrum ikiankatarum.

¹⁸ Kame wárikmasrum kaunkarum jakamnia nekapeakrum iin enentáimsarum úttiarum. Ii ji̱sha úttiarti tura ii urajkítri̱niasha entsa jíintrarti.

¹⁹ Warí Seúnnumia̱ṉka jakamnia nekapeakur kúntuts enentáimsar ju̱sha tí urutmá emeskamuitiajⁱ. Tí urutmá natsanmai̱ awajnakajⁱ. Urukamtai nuṉkasha utsaṉka ikiukiarajⁱ. Ii je̱e̱ncha urukamtai emesturmakarajⁱ tama ántuwawai.

²⁰ Maa nuwa̱tírmesha Uunt Yusa chichame̱ antuktarum. Ni wene̱ya̱ chicham jiinia nuna atumí kuishi̱sha antukarti. Atumí nawantri̱sha tura aṉkant aṉkant atumí tsaníakmari̱sha jakamnia nekapeakur kúntuts enentáimkiur tutai tura ajakmárar uttai̱ jintintiatarum.

²¹ Warí páasanmaya̱nka ashí uchin tura péprunmaya̱ncha natsa áiniana núnaka ashí amuktaj tusa ii je̱e̱ áṉkamuri̱ncha tura úunt akupniu je̱e̱ncha jákatin waya̱warai.

²² Uunt Yus jú̱nis tawai tusam ujakárta ‘Áishmaṉ kaji̱ṉkiáruka arakan péṉker neremtikin iniana núnis nuṉká kakekartatui. Árak júukar jiṉkiamu úkumur tepetar ajainia núnisar tepetar wáinkiartatui túrasha nuna takuiyartinkia peṉké atsuartatui’ tawai” tímiayi.

²³ Uunt Yus chichaak “Ti neka nusha ní nekatairi̱ji̱a̱i̱ṉ niṉki naṉkamaku enentáimtumaschati. Núnisaṉ kakarma nusha ní kakarmari̱ji̱a̱i̱ṉ kakarmaitjiai tu enentáimtumaschati. Tura kuítrinniusha kuítri̱ji̱a̱i̱ niṉki shiir awajmámsashti.

²⁴ Antsu aents shiir enentáimtumastaj tákuṉka ju̱na nekáa enentáimias Wikia Uunt Yus asan ju̱ nuṉkanmasha Winia waitnenkartutairja̱i̱ métek sumamtikniuitjiana tura nekasa nuja̱i̱ túriniaitjiana nuna péṉker anturtuk nekara warasti. Warí nuiti Winia shiir enentáimtikrana nuka” tawai Uunt Yus. 1 Kur. 1:31; 2 Kur. 10:17

^25-26 Wats antuktarum Uunt Yus chichaak “Iisiana tsawant jeatta nuiṉkia ashí tsupirnakaruncha tura tsupirnakcharuncha Ejiptunmaya̱n, Jutanmaya̱n tura Etumnumia̱ncha Amun aentsnasha nuyá̱ Muápnumia̱n núnisaṉ kampuntin atsunumaṉ matsatainia nunasha asuttiáwartatjai. Warí ju̱ nuṉkanam matsatainia ju̱ke ashí tsupirnakcha tura ashí Israernumia̱ ainia nusha Winia enentáimtursacharu ásar aya̱shnium tsupirnakcha ánis enentáiniam tsupirnakcharu áiniawai” tawai.