Jrm. 50 - Yus Papí: Shuarja̱i̱ Yus Yamaram Chicham Najanamu

Papirúnianam túranatta nu etserkamu

¹ Uunt Yusa chichame̱n Yúsnan etserin Jirimías Papirúnianam Kartíu aents asutniátniun etserkamiayi.

² “Ashí nuṉkanmaya̱ aents matsatainia nu ishichiksha ú̱tsuk ju̱ chicham ashí túrunatta nu etserkatarum. Tura etserkuram ‘Papirúniaka emesnartatui. Túrunamtai najankamu yus Piir tura Martuksha natsanmai̱ juákartatui tura ántar yus najankamusha mash tsai̱niarartatui.’

³ Kame chíkich nuṉkanmaya̱ araki̱a̱ aents nin mesetja̱i̱ amuk kampuntin atsú nuṉka aitkia ikiuktinian winitiáiniawai. Nuna túrawarmataiṉkia yaaksha nuiṉkia pujuschartatui. Antsu nuyá̱ aentska tura yajasmasha pisarar yajá shiáktatui” tawai Uunt Yus.

Israer shuar ataksha Yusai̱ wáketma

⁴ Nuyá̱ Uunt Yus chichaak “Ukunam átatna nuiṉkia Israer shuar tura Jutá shuara tiraṉki̱sha káunkartatui. Túrunawar ni Yusri̱ Uunt Yusan útkamaikia e̱a̱kartatui.

⁵ Seúnnum wetái tusar jintiá anintrúsar jeawar chícham peṉké kajinmatkichmin najanamunam Uunt Yusai̱ weankártatui.

⁶ Kame wáinin yajauchinmaani̱ jintintiámu ásar murikiu wáinin péṉker wáinkiachma jíintrar kampunniunam náintiaani̱ náṉkamas wéar meṉkarar ni wenuimiuri̱n waya̱tniun kajinmatkiarua núnis Wi shuarka áiniawai.

⁷ Tuma asamtai ni wáiniarmia núnaka mash maa amuarmiayi. Tura ni nemasri̱sha chichainiak ‘Warí ni we̱a̱trí̱ Uunt Yus péṉker wainma nuna iniaisar tunáa túrawaru ásarmatai máiniakri̱sha sumamashtatji.’

⁸ Nu asamtai Papirúnianmaya̱ Kartíu aentsu nuṉke̱ya̱ṉka jiinkirum pisartarum. Tura murik untsurí ashiniainiamunam áishmaṉkri̱nkia eem wena áinkiatarum.

⁹ Nuyá̱ túrunawakrumin nu chichamaik untsurí nuṉkanmaya̱ arakaani̱ matsatainia nu aentsun ti kakaram ainia nuja̱i̱ Papirúnianmaya̱ aentsnaka mámtikiawartatjai. Kame nisha mesetan ti unuimiátka, naṉkin eketáiniaksha peṉké awajichu ásar jú̱nikkia waketkichartatui.

¹⁰ Nuní̱ túrawar ti wárik Kartíu aentsu nuṉke̱n utsanawar nérentin ajasár tuke núṉkentin ajasártatui” tawai Uunt Yus.

Papirúnia amukma

¹¹ “Túrasha átum Kartíu aentstiram wi shuar amukrum ti warasuitkiurmesha. Tura waaka sa̱a̱kin yurumá jaerua tímianikiuitkiurmesha tura kawái chicháa ajakuitkiurmesha

¹² átum matsatma nuṉkanka tura atumí pépruri̱ncha kampuntin atsú nuṉká awajsan ju̱ju̱ptin kúntuts natsanmai̱ atakka matsamkachmin awajsattajai.

¹³ Uunt Yus kajerkámu asa ashí amukma pujuschamnia ajastatui. Tuma asamtai aents Papirúnianmaani̱ naṉkaamainian aents nuna wáinkiar ‘¡Ju̱sha yajauchin túracharaṉ jú̱ninia!’ tusar wishikiartatui.

¹⁴ Tura yamaikia naṉkiji̱a̱i̱ mánintiram iwiarnarum Papirúnia aents téntakrum eṉkeatarum. Kame Uunt Yusai̱ tunáa túrawaru ásarmatai naṉki eketeakrumsha yawe̱trairap.

¹⁵ Tura téntakrum kaka̱rum chicharkuram Papirúnianmaya̱ṉka jeainiachu ajasárai. Túrunawarmatai pepru tanishri̱sha yumpuntrarai. Warí ju̱ka Uunt Yus yapajtiamui, kame atumín warí itiurtámkamarum núnisrumek atumsha túratarum.

¹⁶ Tura Papirúnianmaya̱ arakmausha tura juu áiniasha amuktárum. Tura yajaya̱tirmesh ni nemasri̱ winitiáiniamuja̱i̱ métek atumí pépruri̱ni̱ṉ tura nuṉkemín waketkitiarum.

Israer shuar waketramu

¹⁷ Kame Israer shuarka úunt ya̱wa̱ apapéam murik pisakárua núnis armai. Tura émkaka Asiria nuṉka akupniúri̱ yúawarmai. Nuyá̱ amúamunmaṉka Papirúnia aentsu akupniúri̱ Napukutunusúr ukunchí̱nkia napú napurtúsmai.

¹⁸ Ashí Akupin Uunt Yus Israera Yusri̱ chichaak ‘Wi Asiria akupniúri̱n asutiámajna nútiksanak Papirúnia akupniúri̱ncha núṉke̱ntuk asutiáttajai.

¹⁹ Tura Israer shuarnaka ataksha awaiṉkiaran tí peṉker nuṉkanam Karmiriunam tura Pasannum matsastatjai. Nuyá̱ Eprainia naintri̱ tura Karaatnumsha peṉké atsumkachu warasar matsamsartatui.

²⁰ Tura nu tsawant jeatta nuiṉkia Israera tunaarí̱sha tura Jutá tunaarí̱ iirmasarash peṉké waitniakchartatui. Warí ishichik ujukaruitjiana nuna tunaari̱nkia wikia tsaṉkuraruitjiai’ tíniuiti Uunt Yus.

²¹ Kame Miratáim nuṉka warukam Pikiutnumia̱ aentska jatékárta. Tura emeskaram aya jú̱nik awajsarta” tawai Uunt Yus. “Tuma asamtai Wi akupeajna nuka tímiatrusmek ashí umikta.

²² Mesetnum mániamu téter ajá nuṉká ántuwawai túruna emesnakai.

²³ ¡Ausha itiur kupikiara tura itiurá emesrara ashí nuṉkanmaya̱ ajintrutia núninniasha! ¡Warí ashí nuṉkanam iismasha Papirúniaka tsuumai̱ ajak aushaa tíminiu ajakai!

²⁴ Maa jintian Papirúnia akirtukjame. Tenta eṉkekar achikmaitiatmek ámeka nekaamachume. Kame Uunt Yus kajerka asam wainniakam achintkiame.”

²⁵ Kame Uunt Yusak mesetnum mánitiai tí peṉker ikiusmancha uratramní̱ tura ame suir kaje̱ntka mánitiairmincha yarurtamkayi. Warí jú̱naka Kartíu aentsu nuṉke̱e̱n Ashí Akupin Uunt Yus túraiti.

²⁶ Nuṉka náṉkata tímianiatirmesha káutkatarum. Túrarum yurumak ikiurmatari̱sha uratrarum irumkarum ashí emestuktarum. Tura iwiaakuka chikichkisha peṉké juákchati.

²⁷ Ni waakari̱ áishmaṉ ainia nusha ashí emestuktarum. Waaká mátai̱niam yaruaktarum. Warí yamaikia asutniáwartin tsawant jeariármasha nisha warí urukawartintsuk.

²⁸ Kame Seúnnum Uunt Yus ii Yusri̱ yapajmiakui Papirúnianmaya̱ atamakiar pisainia chichame̱ ántuwawai. Núnaka Yusa Uunt Je̱e̱n ayamprak yapajmiawai.

²⁹ “Tíshimkiun té nenakar ekenin ainiana nu untsuktarum Papirúnian irunturarat tura matsamtúkrum téntaktarum. Ní túrawarua nuja̱i̱ métek atumsha yapajkiatarum túrasha nuya̱ṉka yaaksha pisarchati. Ní warinia túrawaruit nuja̱i̱ métek atumsha túratarum. Warí Israernumia̱ Tunaarincha Úunt Yusnasha arantukchaiti.”

³⁰ Kame Uunt Yus chichaak “Nu tsawantinkia natsa ainia nuka pepru á̱a̱ri̱n mantamnawartatui antsu aents mesetan unuimiátka ainia nuka nu tsawantka mash ajasártatui.

³¹ Maa naṉkamantu enentáimtuma jú̱ nekaata yamaikia Wi ámin kajerkajme” tawai Ashí Akupin Uunt Yus. “Warí yamaikia ame asutniátin tsawantrum jeayi.

³² Naṉkamantu enentáimtumakka tukumak iniartatui túrasha túrunamtai iniantkitniuka yaaksha atsuttawai. Ni pépruri̱nkia ekemátrartatjai túramtaikia nui̱ ayamach pujuinia nusha ashí amuukartatui.”

³³ Ashí Akupin Uunt Yus chichaak “Israer shuarka tura Jutá shuarsha wáitkiatai pujuiniawai. Achirar yajá yaruakarua nuke akupratniun nakitiáiniak ashí emetawaruiti.

³⁴ Túrasha ámin Uwemtikramniuka tí kakarmaiti. Tura ni náari̱ṉkia Ashí Akupin Úunt Yusaiti. Kame wáitiainia ásarmatai nekas chichampruktatui. Nuna tura nuṉkanka ayamtikiar Jerusaréṉnum matsatainianka páchim enentáimtikrartatui.”

³⁵ Uunt Yus chichaak “Kartíu aents Papirúnianam matsatainian ní uuntri̱ji̱a̱i̱ tura ashí nekamin ainia nunasha mesetka winitiáiniawai.

³⁶ Nekamin ainia nuna mesetka winitiui túruna nékachu ajasártatui. Núnisaṉ mesetka kakaram ainia nuna winitiui túrasha ashí emesnakartatui.

³⁷ Núnisaṉ mesetka ní kawairi̱n tura ni káruri̱n ántsaṉ ashí aents nui̱ matsatáinia nuna mesetka winittiawai tuma ásar nuwa̱ núnis sapijmiakartatui. Áitkiasaṉ ní kuitri̱ ashí írunna nuna mesetka winitiui túrasha atantrartatui.

³⁸ Yamaikia ni entsari̱sha ku̱yu̱kí̱ wininiawai túrunawar kuchach wáinkiartatui. Warí nú nuṉkaka najankamu yus tikishmáttai̱ asa ni yusri̱ mui̱jmiai̱ ainia nuna enentáimtusar waurka ajainiawai.

³⁹ Nu túramu asamtai nuiṉkia ashí kampunniunmaya̱ yajasma kajen yukartin ainia nuke matsamtai̱ átatui. Tura nu nuṉkanmaṉka ukunmasha nuyá̱ nú ukunmasha peṉké pujushtai̱ átatui.

⁴⁰ Kame Yus Sutuman tura Kumuran núnisaṉ chíkich pepru nui̱ ayaam pujuiniancha amukmia nútikiattawai. Tura nui̱ṉkia chikichík áentskesha pujuschamu átatui. Jú̱naka Wi Uunt Yus asan jú̱nisan tajai” tímiayi.