Jrm. 49 - Yus Papí: Shuarja̱i̱ Yus Yamaram Chicham Najanamu

Amun ukunam túrunatin ujamu

^1-6 Uunt Yus Amuna uchirí̱n jú̱nis tawai “Nekaata, ámin téntatmak pujurtamainia nuna ámin ashampramkarat tusan itiartiatjame. Aṉkant aṉkant ámin shitiatma útsutmakartatui tura nuiṉkia wekarama nuna achirtámkatniuka atsuttawai. Nuya̱ṉka Amuna uchirí̱ achira yaruakma ainia nuna ataksha awakeartatjai” tawai Uunt Yus.

Etum ukunam túrunatin ujamu

^7-22 Etumnaka Ashí Akupin Uunt Yus jú̱nis tawai “Wi Esaunka atantraitjiai túran ni ú̱mtairi̱ncha paant awajtúsuitjiai túramu asa ú̱mkashtatui. Warí nekaata uunt nuṉka mátsatkamunmasha uchia nútikiattajme túrunawakmin aents nakitrámprartatui. Ashamamna nuke tura naṉkamantu enentái ámin anaṉkramaiti. Kaya tsentsaimiunam pujamna nuna tura naintia esantí̱ya̱ ímian awajtámsaiti. Ame pasunkem churuwia núnisam yakí̱ takakkumnisha nuyá̱ akaktiatjame. Etumka emeskamu átatui nuní̱ naṉkaamainia nuka ashamkartatui tura asutiámun nekaawar ujujmiásartatui” tawai Uunt Yus.

Tamaskunam ukunam túrunatin ujamu

^23-27 Tamaskun jú̱nis tawai “Tamaskuka kakarmachu ajasmai pisartaj tusa waketkimiai tura sapij eṉkemtuamai. Jakamnia nekapeak tura nuwa̱ uchin takak najaimiatain najaimiamai. ¿Itiur asamtai ti shiir péprusha ajapa ikiukchamuiti Wi ú̱mkan shíirmachitkiui waratáirsha? Tamasku tanishri̱nkia jiji̱a̱i̱ ekemáktatjai Piniatáta je̱e̱ ainia nuka amukártatui” tawai Uunt Yus.

Ketar Ásurja̱i̱ ukunam túrunatin ujamu

^28-33 Ketarna tura Ásurnumia̱ akupeamu armia nuna Papirúnianmaya̱ úunt akupin Napukutunusúr nupetkamai. Uunt Yus jú̱nis tíniuiti “Iwiarnatrarum. Ketarja̱i̱ mániktaj tusarum warurtarum túrarum nantu tatainmaani̱ uchirí̱ matsatainia nuka emestuktarum ni je̱e̱sha tura ni murikrí̱sha juruktiarum.” Uunt Yus chichaak “Wetarum, uunt nuṉka mátsatka enentáimtuma ainia nu ti péṉker matsatainia nu warurtarum mániktaj tusarum niṉkia wáitincha takakainiatsui tura jiruja̱i̱sha asakachmaiti niṉki matsamin áiniawai. Ásurka kajen yajasma matsamtai̱ átatui tuke emeskamu átatui. Yáakesh pujuschatui nuiṉkia aentsush pujutnash pujuschartatui” tímiayi.

Iram ukunam túrunatin ujamu

^34-39 Jutanmaya̱ úunt akupin Setekías akuptan náṉkamuk Yúsnan etserin Jirimíasai̱ni̱ Uunt Yus Iramnan chichaak “Ashí Akupin Uunt Yus jú̱nis tíniuiti nekaata. Wi Irama tíshimkiuri̱n ni kakarmari̱ yama juárman kupirjai. Iramnumia̱ ji̱i̱ra akupran ashí nuṉkanam jú̱ weawa jú̱ weawa ajarkartatui. Tura tsawant amúamunmaṉka Iramnaka achir yaruakarmia nuyá̱ awakeartatjai” tawai Uunt Yus.