Jrm. 47 - Yus Papí: Shuarja̱i̱ Yus Yamaram Chicham Najanamu

Jiristíanam túrunatin etserkamu

¹ Kame Parauṉ Káasan émeseatsa̱i̱ṉ Yúsnan etserin Jirimíasai̱ Jiristíanmaya̱ aentsna Uunt Yusa chichame̱ tarimiayi.

² Uunt Yus chichaak “Nekaatarum, entsa araki̱a̱ metsar tamparintin ajas nuṉkan tura nuna páantniuri̱ncha núnisaṉ pépruncha nuyá̱ ashí aents nui̱ matsatainianka enetak winiawai. Túmakui̱ áishmaṉka charaatum ajainiakui ashí aents nui̱ matsatáiniaka najaimiainiak aratum ajartatui.

³ Kawairi̱ tsékenak tútur ajainiakui tura káruri̱sha ántuchat ajainiakui núnisaṉ karu nawe̱sha téter ajainiakui nuna antukar apasha sapijmiainiak ni uchirí̱ncha apajá̱skesha íitsuk utsaṉkar ikiuiniawai.

⁴ Jiristíanmaya̱ aents emesnaktin tsawant jea asamtai Setunnumia̱sha tura Tírunmaya̱sha núnisaṉ ashí aents niji̱a̱i̱ chichas pujuiniamu iwiaaku juákarua nuka amú amú awajnásartatui. Warí, nayantsanam nuṉka pújakmanum Kapturnum Jiristíanmaya̱ aents iwiaaku juákarunka Uunt Yus ashí emeskattawai.

⁵ Kame Káasanmaṉka intiash tsupirar muuka kesá kesá awajsatin jeayi antsu Askarúnka mitia juákuiti. Maa ti uunt aents iwiaaku juákutirmesha ¿urutáik atumí aya̱shí̱ tsupiatniusha iniaisatarum?

⁶ Maa Uunt Yusa puya̱ri̱yá̱ ¿Amesha urutáik muchitmarmesha iniaisattam? Ame eṉkemtairmin waketkim eṉkemám tee ajasam eṉkemsam ayamprata.

⁷ Maa ¿itiurtsuk tee ajassha eṉkemsat? Warí, Askarúncha tura nayantsa kaanmatkari̱sha weriarta tusa Uunt Yúskechuk akuptúkuit” tímiayi Uunt Yus.