Jrm. 46 - Yus Papí: Shuarja̱i̱ Yus Yamaram Chicham Najanamu

Ejiptunam ukunam túrunatin

²⁵ Ashí Akupin Uunt Yus Israera Yusri̱ chichaak “Nekaata, Tépesa ántar yusri̱ Amunnasha tura Parauṉnasha núnisnak Ejiptunka ni yusri̱miak núnisaṉ úunt akupniuri̱ntiuk asutiáwartatjai. Nu arant Parauṉnaka yaintkiattawai tu shiir enentáimtuinia nuímiak asutiáwartatjai.

²⁶ Túrawaran ni iwiaakmari̱n e̱a̱tainiana nui̱ Papirúnianmaya̱ úunt akupin Napukutunusúra tura ni yaintri̱ áiniana nuna uwejé̱e̱n íktusaran iniaisartatjai. Túrasha ukunmaṉka yaunchu urukuya núnisaṉ Ejiptunmaṉka aents matsamsartatui” tíniuiti Uunt Yus.

²⁷ “Túrasha ámeka winia takartin Jakupá ashamkaip kame Israerá mayaim ishimkiaip tawai Uunt Yus. Nekaata, ame shuarumin chíkich nuṉkanam achira yaruakman uwemtikniunka Witjiai. Jakupka aṉkant pujustaj tusa waketkittiawai tura niṉkia shiir enentáimias yáakesh itit awajsachma pujustatui.

²⁸ Ámeka winia takartin Jakupá ashamkaip. Warí Wi ámiji̱a̱i̱ṉkia pujajai tawai Uunt Yus. Kame ashí uunt nuṉka mátsatkamunam tsakiṉmakuitjiamna nu nuṉkanmaya̱ṉka nekasan amukártatjai. Túrasha áminkia amukchattajme antsu nekasa nuja̱i̱ métek asutiáttajme. Tura asan tunamkachua núnisnaka peṉké asuttsuka iniaisashtatjame” tawai Uunt Yus.