Jrm. 43 - Yus Papí: Shuarja̱i̱ Yus Yamaram Chicham Najanamu

Israer shuar Ejiptunam pisarma

¹ Uunt Yus nu aentsu Yusri̱ ashí aentsun tu ujakta takui̱ Jirimíaska núnaka mash ujak umikmatai

² Usayása uchirí̱ Asarías nuyá̱ Karea uchirí̱ Jujanán tura ashí áishmaṉ naṉkamantu enentáimtuma armia nu Jirimíasan chicharainiak “¡Wáitrame! Íi Yusri̱ṉkia Uunt Yus ‘Ejiptunam tuke pujustin wérap’ tu titiá tusa akuptámkachuitme.

³ Antsu Neríasa uchirí̱ Paruk ámin anaṉkrama Kartíu aentsu uwejé̱n íkturmas iniaitiámsartinian wakerutmaji. Nisha iin mántamchaksha nuíchuka achirmárar Papirúnianam juramkiartatji” tiármiayi.

⁴ Karea uchirí̱ Jujanán tura suntara uuntri̱ armia nusha nuyá̱ ashí shuar Jutá nuṉkanam juaktai tusar Uunt Yusa chichame̱n umirkacharmiayi.

⁵ Antsu Karea uchirí̱ Jujanánka tura ashí suntara uuntri̱ armia nuka ashí nuṉkanam utsaṉkarma matsatáinia Jutanam pujusártaj tusar waketrar káunkarmia nunasha

⁶ áishmaṉnasha nuwa̱ncha uchincha úunt akupniu nawantri̱ncha tura ashí aentsun suntara uuntri̱ Napusaratán ame wáinkiarta tusa Sapanka uchirí̱ Ajikma uchirí̱ Jetaríasan ikiurkiarmia nuna núnisaṉ Yúsnan etserin Jirimíasnasha nuyá̱ Neríasa uchirí̱ Paruknasha júkiar

⁷ Ejiptunam waya̱warmiayi. Uunt Yusa chichame̱nka ántutsuk Tápnisa tímianai jeawarmiayi.

⁸ Nuya̱ṉka Tápnisnum pujan Uunt Yusa chichame̱ Jirimíasan tarí chicharuk

⁹ “Jutanmaya̱ shuarsha iimiainiamunmaṉ kaya uunt áiniana nu achikiáram Tápnisnum Parauṉka je̱e̱ wá̱i̱ti̱a̱i̱ri̱ṉ naka nuwe̱ pachimpramuja̱i̱ nu kaya ipiuknawarta.

¹⁰ Túram chicharainiakum ‘Ashí Akupin Uunt Yus Israera Yusri̱ chichaak “Ju̱ nekaata, Winia takartin Papirúnianmaya̱ úunt akupniun Napukutunusúr utitiarum tusan akuptúktatjai. Túran kayan ukarmajna nui̱ ni akupkur pujutái̱ri̱n apujtustatjai tura jutai̱ je̱e̱ncha tí uuntan nui̱ ayapá̱rtatui.

¹¹ Ejiptunmaya̱ aentsnasha asutiáwartui. Mantamnaaka mantamnawartatui tura achikiá júamunka achik junakiartatui núnisaṉ puya̱ja̱i̱ mantamnatniuka puya̱ja̱i̱ mantamnawartatui.

¹² Núnisaṉ najankamu yusa je̱e̱ Ejiptunam írunna núnaka ekemár áeskartatui túrawar najanamu yusri̱nkia yarurkartatui. Murikiu wáinin ni pushiri̱n japíana tímiatrus Ejiptunka itiarak awajtúsartatui túrawar nuya̱ṉka aṉkant shiir jiinkittiawai.

¹³ Nútiksaṉ Ejiptu nuṉkanam Pitsimísnum nakumkar najankamu írunna nunasha emeskattawai. Túrak najankamu yusa je̱e̱ írunna núnaka áeskattawai” tawai’ ujakárta” tímiayi.