Jrm. 41 - Yus Papí: Shuarja̱i̱ Yus Yamaram Chicham Najanamu

¹ Kame nántuka siátitin Irisáma uchirí̱ Netaníasa uchirí̱ Ismaer úunt akupniu shuari̱ tura úunt akupniu suntari̱ uuntri̱ tias áishmaṉkan jukí̱ Ajikma uchirí̱ Jetaríasan Míspanam werimiayi. Tura Míspanam irunar yurumáwarmiayi.

² Túmainiai̱ Netaníasa uchirí̱ Ismaer tias áishmaṉ niji̱a̱i̱ pujuarmia nui̱m wajararmiayi. Túrunawar Sapana uchirí̱ Ajikma uchirí̱ Jetaríasan puya̱ja̱i̱ íjiuarmiayi. Túrawar ju̱ nuṉkanam akupkata tusa Papirúnianmaya̱ úunt akupin anaik apujsamia núnaka máwarmiayi.

Jutanam Ismaer amukratkamu

³ Núnisaṉ ashí Jutanmaya̱ shuar Míspanam Jetaríasja̱i̱ pujuarmia nunasha Ismaerka kajeṉkármiayi. Núnisaṉ Kartíu aents mesetan unuimiátkaru nui̱ pujuarmia nunasha Ismaerka amukmiayi.

⁴ Kame Jetarías mámuka chikichik tsawantak naṉkaamasu ai̱ mámunka yaaksha nékachmanumaṉ

⁵ uchaintia áishmaṉ Sekimnumia̱ Sírunmaya̱ tura Samarianmaya̱ susuri̱n awaráru tura pushirísha já̱a̱rarma entsaru núnisaṉ aya̱shniumsha kesamákaru káunkarmiayi. Tura ántar súsatniun araka nere̱n tura kuṉkuin Uunt Yusa Je̱e̱n júkitniuncha ikiankarmiayi.

⁶ Nuya̱ṉka Netaníasa uchirí̱ Ismaerka iṉkiumkattsa Míspanmaya̱ jiinkí̱ wesa utki̱ wémiayi. Tura wáinkiar chicharainiak “Ajikma uchirí̱ Jetarías winittiarum” tímiayi.

⁷ Péprunam waya̱war ajapén ajasármatai Netaníasa uchirí̱ Ismaerka áishmaṉ niji̱a̱i̱ irunar yujarmia nuja̱i̱ sue̱n tsupirarmiayi túrawar entsa pajamtai ámanum utsawarmiayi.

⁸ Tura máwarmia nuyá̱ tias áishmaṉ Ismaeran chicharainiak “Antsu iiṉkia máwairap. Warí, iikia nuṉká u̱kma trikiu sewata asuiti tura míshik takakji” tiármiayi. Tuíniakui ni írutramuri̱n itiurtukarma nútikiacharmai antsu máatsuk iniaisarmiayi.

⁹ Kame Ismaer máwarman aya̱shí̱n entsa pajamtainiam utsawarmia núnaka Israer shuara úunt akupniuri̱ Páasai̱ya̱ ayamprumaktaj tusa úunt akupin Asa najanamiayi. Nui̱ Netaníasa uchirí̱ Ismaer jákarun chumpía áimkiamiayi.

¹⁰ Nuna tura Ismaerka aents Míspanam juákarunka achir ashí yaruakarmiayi. Kame úunt akupniu nawantri̱ armia nuí̱miak tura ashí shuar Míspanam juákarun suntara uuntri̱ Napusaratán ame ju̱ aentska wáinkiarta tusa Ajikma uchirí̱ Jetaríasan ikiurkiarmia nunasha yaruakmiayi. Kame Netaníasa uchirí̱ Ismaerka achir yaruak Amun aentsu uchirí̱i̱n pachiniattsa wémiayi.

Jujanán Jutá shuar juákarun irurma

¹¹ Nuya̱ṉka Karea uchirí̱ Jujanánka tura ashí suntara uuntri̱ niji̱a̱i̱ pujuarmia nusha ashí yajauchin Netaníasa uchirí̱ Ismaer túrukmia nuna antukarmiayi.

¹² Tura ashí áishmaṉkan irur Netaníasa uchirí̱ Ismaerja̱i̱ mesetnum mániattsa wéarmiayi. Tura Kapaunnum entsa pajamtai ti uunt ana nui̱ ápatnik pujan wáinkiarmiayi.

¹³ Kame ashí shuar Ismaerja̱i̱ matsamármia nuka Karea uchirí̱ Jujanánja̱i̱ ashí suntara uuntri̱ niji̱a̱i̱ wininian wáinkiar warasarmiayi.

¹⁴ Nuya̱ṉka ashí shuar Míspanmaya̱n achir Ismaer ikiankarmia nuka ataksha awaketrar Karea uchirí̱ Jujanánai̱ naṉkaamararmiayi.

¹⁵ Antsu Netaníasa uchirí̱ Ismaerka Jujanánnai̱ya̱ṉka uchu áishmaṉja̱i̱ṉ pisarar Amun aentsu uchirí̱i̱n naṉkaamararmiayi.

¹⁶ Tura Netaníasa uchirí̱ Ismaerka Ajikma uchirí̱ Jetaríasan maa aents juákarun achir ashí yaruakmiayi. Túrawar Karea uchirí̱ Jujanánka tura aents meseta unuimiátkaru kapitiántri̱ Jujanánja̱i̱ pujuarmia nuka aents achirar Ismaer yarumman ata̱i̱niar Míspanmaya̱ṉka yaruakarmiayi. Kame Jujanán Kapaunnumia̱n ikiankarmia nú aents kakaram mesetan unuimiátkaru tura nuwa̱sha uchisha núnisaṉ úunt akupniu yaintri̱ ármiayi.

¹⁷ Nuya̱ṉka wéar Jirutkímiamnum pujusármiayi. Nuka Piriṉnum tíjiu̱chiti. Kame núnaka Ejiptunam pisarar waya̱mi tusar túrunawarmiayi.

¹⁸ Kame ju̱ aents wáinkiarta tusa Papirúnianmaya̱ úunt akupin Ajikma uchirí̱ Jetaríasan anaik ikiukmia nuna Netaníasa uchirí̱ Ismaer maa asamtai Kartíu aentsun ashamiarmiayi.