Jrm. 38 - Yus Papí: Shuarja̱i̱ Yus Yamaram Chicham Najanamu

Jirimías entsa táutramu wá̱a̱nam eṉkeamu

¹ Nuyá̱ Matanka uchirí̱ Sejatías tura Páshura uchirí̱ Jetarías nuyá̱ Seramíasa uchirí̱ Jukar núnisaṉ Markíasa uchirí̱ Páshur Jirimías ashí aentsun ujamun anturkarmiayi. Kame Uunt Yusa chichame̱n ujak jú̱nis tímiayi.

² “Uunt Yus ujak chicharuk ‘Ju̱i̱ṉ péprunmaṉ juákuka mesetja̱i̱sha tsukaja̱i̱sha, suṉkurja̱i̱sha jákartatui. Antsu ju̱yá̱ jiinkí̱ Kartíu aentsnum surumakaruka iwiaaku juákartatui.

³ Imiá nekas ju̱ péprunka Papirúnianmaya̱ akupniu suntari̱n íktustatjai túram akintkiartatui’ Uunt Yus tu tíniuiti” tímiayi.

⁴ Nuya̱ṉka nuna takui̱ pepru uuntri̱ armia nu úunt akupniun chicharainiak “Ju̱ áishmaṉka mantamnati. Warí ni chichame̱n antukar ii suntari̱ núnisaṉ ashí shuar juákaru ainia nuna sapijmiamtikiainiatsuk. Tura ju̱ áishmaṉka péṉker matsamsatniunka étsertsui antsu jú̱ peprun yajauch awajeawai” tiármiayi.

⁵ Nu tutai akupin Setekías chichaak “Antsu yamaikia wisha warí itiurkatjak atumín pujatsuk. Átum túrataj tárumna nuna wikia suritkiachminiaitjiarme” tímiayi.

⁶ Nu tutai Jirimíasan achik akupniu uchirí̱ Markíasa yumirmatri̱n suntar matsamtai̱niam wa̱a̱ táurmanum aju̱i̱niak chapikji̱a̱i̱ awaṉtukar akakiármiayi. Kame nu wá̱a̱nam entsa ku̱yu̱á tsakus juákmanum Jirimías tarimiá waya̱miayi.

Jirimías wa̱a̱ tá̱i̱miunmaya̱ jusamu

⁷ Tura akupin pujutai̱niam akupniu yaintri̱ pujuarmia nui̱ Itiupía nuṉkanmaya̱ suntar Ewitmirík náartin Jirimías wa̱a̱nam aju̱a̱muiti táman nekaamiayi. Tura akupniúka Piṉjiamín wáitiniam pujái̱

⁸ Ewitmiríkkia akupniu je̱e̱ya̱ jiinkí̱ werí akupniun chicharuk

⁹ “Maa winia úunt akupniuu, Yúsnan etserniun Jirimíasan wá̱a̱nam aju̱a̱wara au áishmaṉkan yajauch túrawaru áiniawai. Warí péprunam yurumak atsá asamtai nisha tsukái jákashtatuak” tímiayi.

¹⁰ Nu tutai akupniúsha imia níniak Itiupíanmaya̱ suntar Ewitmiríkian chicharuk “Traintia áishmaṉ yaruakam Yúsnan etserin Jirimías wá̱a̱nam jáatsa̱i̱ṉ jusatarum” tusa akuptúkarmiayi.

¹¹ Tura Ewitmiríksha traintia áishmaṉkan yaruak akupniu je̱e̱ wayá̱ kuit ikiutai̱ wakenmari̱ni̱ mámush já̱a̱narun chapikji̱a̱i̱ jukí̱ Jirimíasan init wá̱a̱nam pujan aju̱ntamiayi.

¹² Tura Itiupíanmaya̱ aents Ewitmirík Jirimíasan chicharuk “Chapiknum mámush atamprutkiakam tsukapmin awaṉkemsata” tutai Jirimíassha tímiatrusaṉ túramiayi.

¹³ Nuní̱ túrawar Jirimíasan wá̱a̱nmaya̱n chapikji̱a̱i̱ júsarmiayi. Tura jí̱i̱kim Jirimíassha suntar matsamtainma á̱a̱ri̱n pujumiayi.

Uunt akupin ataksha Jirimíasan inintramu

¹⁴ Chíkich tsawantin úunt akupin Setekías Uunt Yusa Je̱e̱ menaintiú tesamu wá̱i̱ti̱a̱i̱ri̱n pujus Yúsnan etserin Jirimías untsurtuktarum tusa akupkámiayi. Tura nui̱ támatai akupin Jirimíasan chicharuk “Wi inintrústatjamna nu ishichkisha ú̱rtukaip” tímiayi.

¹⁵ Tutai Jirimías Setekíasan aya̱k “Ujamash ¿mantuashtameash? Tura jintinmash peṉké anturtukchattame” tímiayi.

¹⁶ Nu tutai akupin Setekías Jirimíasan ú̱saṉ chicharuk “Iwiaaku Uunt Yus ii wakaní̱n amasua nuna náari̱nji̱a̱i̱ nekasan tájame máshtatjame núnisaṉ aents mantamatai turamainia nui̱sha tsaṉkamkashtatjame” tímiayi.

¹⁷ Nuiṉkia Jirimías Setekíasan chicharuk “Ashí Akupin Uunt Yus Israer shuara Yusri̱ya nu chichaak ‘Papirúnianmaya̱ akupniu suntari̱n yamaichik surumakmeka iwiaaku átatme tura péprusha áesnashtatui. Nuiṉkia amesha tura ame shuarumsha iwiaaku pujustatrume.

¹⁸ Antsu Papirúnianmaya̱ akupniu suntari̱n surumachkumni̱ṉkia ju̱ pépruka Kartíu aentsri̱n surukma átatui. Tura ekemákartatui. Nuyá̱ amesha níya̱ṉka peṉké uwemprashtatme’” tímiayi.

¹⁹ Tutai akupin Setekías Jirimíasan chicharuk “Jutá shuar Kartíu aentsri̱n pachintraru ainia nu ti wáitkiarsachartatuak tusan sapijmiajai” tímiayi.

²⁰ Takui̱ Jirimías chicharuk “Wi Uunt Yusa chichame̱n ujajmena ju̱ waitneasam anturkata. Túramka surunkashtatme antsu péṉker pujusam iwiaaku átatme.

²¹ Tura ame surumaktin nakitiakmiṉkia Uunt Yus winia iniaktursama nuna paant ujajme.

²² ‘Jutanmaya̱ akupniu je̱e̱n ashí nuwa̱ juákartatna núnaka Papirúnianmaya̱ akupniu suntari̱ úuntri̱n surunkartatui. Túram niṉkia chichainiak “Akupniú, ame péṉker amikrum armia nuke nupetmakar tura anaṉkramawar tsakusnum wajawakmin niṉkia uku waketkiarai” turamartatui.

²³ Tura ashí ame nuwemsha uchirmesha Kartíu aentsnum surunkartatui. Amesha Papirúnianmaya̱ akupniúri̱ya̱ṉka pisarchattame antsu achikma átatme. Núnisaṉ jú̱ pepruka áesamu átatui’ tawai Yus” Jirimías tímiayi.

²⁴ Nuní̱ ujakam akupin Setekías Jirimíasan chicharuk “Ju̱ chichamnaka yaaksha nekashti. Nuja̱i̱ ámeka jákashtatme.

²⁵ Tura suntara uuntri̱ ainia nu ámiji̱a̱i̱ chichasman nekaawar tarutrámiarmatai ‘Akupniúsh ¿warí áujsam tura nisha warintramua? nu iincha waitneasam ú̱tsuk ujakratkata. Kame máshtatji’ turamainiakuisha

²⁶ chicharainiakum ‘Junatána je̱e̱n nui̱ṉ jakati tusam awaṉtukip. Akupniun tu seajai tiartá’” tímiayi.

²⁷ Timia núnisaṉ ashí uuntri̱ armia nusha Jirimíasan tariar inintrúsarmiayi. Túram nisha akupin jintintramia ímiatrusaṉ ái̱kiarmiayi. Tura nu chicham antunkachu asamtai ánik ikiukiarmiayi.

²⁸ Nuyá̱ Papirúnianmaya̱ suntar Jerusaréṉ peprun akintrúmam Jirimíaska suntar matsamtai̱ á̱a̱ri̱n pujumiayi. Warí Jerusaréṉ akintrúmam Jirimíaska nui̱ tuke pujuyayi.