Jrm. 37 - Yus Papí: Shuarja̱i̱ Yus Yamaram Chicham Najanamu

Jerusaréṉ sa̱a̱naktin étserma

¹ Papirúnianmaya̱ úunt akupin Napukutunusúr Jusíasa uchirí̱ Setekíasan úunt akupniua nútikia Jutanam apujsamiayi. Tura Juasima uchirí̱ Juakin pujuya nu akintiak akuptan naṉkamamiayi.

² Tura nisha tura takarniúri̱sha nu nuṉkanmaya̱ aentsush Uunt Yusa chichame̱n Yúsnan etserin Jirimías etserkamia núnaka umikcharmiayi.

³ Seremíasa uchirí̱ Jukaran tura Masíasa uchirí̱ Yúsnan pujurin Supunías Yúsnan etserin Jirimíasan chicharainiak “Waitneas Uunt Yus ii Yusri̱n iin seatramarti túramui” tiarat tusa úunt akupin Setekías akupkarmiayi.

⁴ Jirimíaska sepunam tuke eṉkeachma asa péprunam wayá̱ jiin wémiayi.

⁵ Kartíu aents Jerusaréṉja̱i̱ mániatai tusar péprun téntak matsamtúkar Parauṉka suntari̱ Ejiptunmaya̱ jíinkiarmiayi táman antukar Jerusaréṉnumia̱ jíintrarmiayi.

⁶ Nuyá̱ Uunt Yusa chichame̱ Yúsnan etserniu Jirimíasan tarí chicharuk

⁷ “Uunt Yus Israera Yusri̱ jú̱nis túramui Jutanmaya̱ úunt akupin Winia inintrútsai tusa jeakui ju̱ titiá. ‘Nekaata Parauṉka suntari̱ ámin yaintmaktaj tusa jíinkiarmia nuka ni nuṉke̱n Ejiptunam waketrartatui.

⁸ Nuyá̱ Kartíu aentska ju̱ pépruja̱i̱ mánaiktiaj tusa waketrartatui tura utsantua ekemákartatui’ titiá.

⁹ Uunt Yus chichaak jú̱nis tawai ‘Ti nekas Kartíu aents ainia nuka tuke iniaṉka waketraruiti’ tusarum atumek anaṉmamawairap. Kame ataksha táartiniaiti.

¹⁰ Wats átum Kartíu aentsri̱ ashí nupetkarmesha tura mesetnum ni suntari̱ aya ishichik juákarua nuka nuap je̱e̱n ashí akaṉma ajasárusha aṉkant aṉkant ni je̱e̱ya̱ jíintrar jú̱ peprunka ekemákarainti” tímiayi.

Jirimías sepunam eṉkeamu

¹¹ Parauṉka suntari̱ kaunainiawai táman antukarmatai Kartíu suntari̱ Jerusaréṉnumia̱ wéarmiayi.

¹² Jirimías nuna nekáa Jerusaréṉnumia̱ jiinkí̱ Piṉjiamín nuṉkanam ni nuṉke̱n achikian pujustaj tu enentáimsamiayi.

¹³ Tura Piṉjiamín Wáitiniam jeá waiti wáinin awajsámuya nuna uuntri̱ nui̱ wajas Irijas náartin nui̱ pujumiayi. Ananíasa uchirí̱ Seremíasauyi. Tura nuna uchirí̱ Irijas Yúsnan etserniun Jirimíasan achik jukí̱ Jirimíasan chicharuk “Kartíu aentsnum wétatme.”

¹⁴ Tutai Jirimías chichaak “Atsá, Kartíu aentsun wéatsjai” tutai Irijas anturtsuk Jirimíasan achik uuntri̱ matsatmanum jukimiayi.

¹⁵ Uuntri̱ armia nu Jirimíasan ti kajerkar asutrarmiayi. Nuya̱ṉka sepunam eṉkeá Junatán papin áakmauya nuna je̱e̱ aents eṉketai̱ ajasu asamtai nu je̱a̱nmaṉka apujsarmiayi.

¹⁶ Tura nui̱ṉkia sepunam nuṉká init tá̱i̱miunam apujsar Jirimíasan eṉkeawarmatai núkap tsawant pujusmiayi.

Setekías Jirimíasan inintramu

¹⁷ Nuyá̱ úunt akupin Setekías Jirimíasan sepunmaya̱ ji̱i̱ktiarum tusa akupkámiayi. Túramtai ni je̱e̱n Jirimíasan itiamtai u̱u̱k inintrak chicharuk “¿Uunt Yusa chichame̱ áwak?” tutai Jirimías aya̱k “Ee awai” tímiayi. Tura tuke chichaki̱ weak “Papirúnianmaya̱ úunt akupniu uwejé̱e̱n íktuan iniaisattajme” tímiayi.

¹⁸ Nuyá̱ Jirimías úunt akupniun Setekíasan chicharuk “¿Wikia ámiji̱a̱i̱sha ame takarniúrmiji̱a̱i̱sha tura jú̱ aentsja̱i̱sha warí yajauchinia túraitiaj winia sepunam eṉketátniusha?

¹⁹ Yúsnan etserin atumíin étseruk chichartamainiak ‘Papirúnianmaya̱ úunt akupniuka atumniaka tura jú̱ nuṉkaja̱i̱ mánaiktinian káunkachartatui’ tiarmia nusha ¿tui̱ṉ pujuinia? tímiayi.

²⁰ Uunt akupin winia uuntru yamaikia antukta. Ámin seajmena nu jeatí. Waitneasam papí ain Junatána je̱e̱n awaṉtukip nui̱ pujusan jáka̱i̱j tusan seajme” tímiayi.

²¹ Nuiṉkia úunt akupin Setekías chichaak “Je̱á̱ iinia á̱a̱ri̱n Jirimíasnaka wáinkiarat tusar tuke tsawant chikichik páṉkak Páṉkan Najanin jintiá súruinia nuyá̱ péprunam írunna nú paṉ ashí amuumam sunasti” tímiayi. Nuiṉkia Jirimíaska je̱á̱ iinia á̱a̱ri̱n pujumiayi.