Jrm. 36 - Yus Papí: Shuarja̱i̱ Yus Yamaram Chicham Najanamu

Jirimías ni papiri̱ya̱n Parukan áamtikramu

¹ Jusíasa uchirí̱ Juasim Jutanmaya̱ úunt akupin kuatru uwí ajas pujamunam Uunt Yusa chichame̱ Jirimíasa tarí chicharuk

² “Israernancha tura Jutanuncha tura ashí uunt nuṉka mátsatkamua núnancha Jusías pujumia nu tsawant ámiji̱a̱i̱ chichastinian naṉkamamiaj ímianiaṉ tura yamaiya̱ ímiaja̱i̱sha chichasuitjiame. Tuma asamtai papí pénuimiu achikta túram nui̱ ashí Wi ámin tímiajmena nu aartá.

³ Jutá shuarnaka ashí Wi yajauch awajsartaj nuna antuk nekaawar ni yajauch wekatai̱ ikiukchartimpiash. Núja̱i̱ṉkia ni yajauch túrutairi̱n tura ni tunaari̱n tsaṉkuraraintjiai.”

⁴ Nuiṉkia Jirimías Neríasa uchirí̱n Parukan untsukmiayi tura Uunt Yus ashí chichakmia núnaka Jirimías áamtikiui papí pénuimiunam Paruk áarmiayi.

Yusa Je̱e̱n papí pénuimiu áujsamu

⁵ Nuyá̱ Jirimías Parukan akupeak ju̱na tímiayi. “Wikia Uunt Yusa Je̱e̱nkia waya̱chminiaitjiai antsu ju̱i̱ṉ juáktatjai.

⁶ Antsu ijiarmátin tsawantai̱ Uunt Yusa Je̱e̱n waya̱m wi Uunt Yusa chichame̱n áamtikramajmena nu ashí shuar ántuiniamunam tura ashí Jutanmaya̱ shuar ni pépruri̱ya̱ taarmia nu ántuiniamunam áujsata.

⁷ Uunt Yus íimmianum aentsu seamuri̱ jeawainti tura aṉkant aṉkant ni yajauchiri̱ya̱ ataksha waketkiarainti. Warí Uunt Yusa kajetáiri̱ṉkia núnisaṉ Ni suíri̱ṉkia úuntaiti tusa jú̱ aentsun ujakáruiti” tímiayi.

⁸ Neríasa uchirí̱ Parukan Yúsnan etserin Jirimías timia nuja̱i̱ métek papí pénuimiun Uunt Yusa chichame̱n Uunt Yusa Je̱e̱n áujsamiayi.

⁹ Jusíasa uchirí̱ Juasim Jutanmaya̱ úunt akupin ajasma seṉku uwí ámanum nantusha nuiwi ai̱ nuka túrunamiayi. Uunt Yus pujamunam ijiarmáwar iruntratniun etserkarmatai ashí Jerusaréṉnumia̱ shuar tura ashí Jutanmaya̱ aentssha Jerusaréṉnum iruntrarmiayi.

¹⁰ Nuyá̱ Parukka Uunt Yusa Je̱e̱n Yamaram waiti wá̱i̱ti̱a̱i̱ri̱n yakini̱ papí ain Sapana uchirí̱ Jemarías pujutai̱ tesamu ana nui̱ wakamiayi. Tura Parukka nui̱ wajasaṉ ashí shuar ántuiniamunam Jirimías aarma papí pénuimiu aan achik áujsamiayi.

Uunt akupniu je̱e̱n papí áujsamu

¹¹ Nuyá̱ Sapana uchirí̱ Jemaríasauyi. Nuna uchirí̱sha Mikías ashí Uunt Yusa chichame̱n papí pénuimiun áujman antukarmiayi.

¹² Nuyá̱ Mikiayáska úunt akupniu je̱e̱n papí ain tesarmari̱n akaikímiayi. Tura nekaata ashí pepru páantniuri̱ tu̱a̱tai̱ pujuarmiayi. Nui̱ṉkia papí ain Irisáma nuyá̱ Semayása uchirí̱ Teraya núnisar Ákpura uchirí̱ Irnatáncha tura Sapana uchirí̱ Jemaríassha tura Ananíasa uchirí̱ Setekías nuyá̱ chíkich páantin armia nusha pujuarmiayi.

¹³ Ashí shuar ántuiniamunam Paruka papirí̱n áujsamia nuna Mikías antukma nuna páantin armia nuna ujakármiayi.

¹⁴ Kusi uchirí̱ Seremíasauyi tura ni uchirí̱ Netaníasauyi. Nuna uchirí̱ Jeutin Parukai̱ akatmamar akupkarmiayi. Tura chicharainiak “Aents iruntramunam papí áujsamamna nu takukim winitiá tu ujakta” tiármiayi. Nuyá̱ Neríasa uchirí̱ Paruk papin achik páantin pujuarmia nui̱ ujakártaj tusa wémiayi.

¹⁵ Nuyá̱ chicharainiak “Pujusta túram ii ántamunam áujsata.” Tutai Paruk aents ántuiniamunam áujtusmiayi.

¹⁶ Kame ashí nu chichaman antukar sapijmiakar nuamtak mái̱ iiniai ajarmiayi. Tura Parukan chicharainiak “Nekas ashí jú̱ chicham úunt akupin ujaktai” tiármiayi.

¹⁷ Nuyá̱ Parukan chicharainiak “Ni chichame̱sha ju̱sha itiura áarmam ujakratkata” tiármiayi.

¹⁸ Tutai Paruk chichaak “Ashí ju̱ chichamnaka ni tukar awajtakui nuyá̱ wi tintiaja̱i̱ papinium áakar awajmiajai” tímiayi.

¹⁹ Nuiṉkia pepru páantniuri̱ armia nu Parukan chicharainiak “Ame Jirimíasja̱i̱ werum ú̱mkatarum. Átum pujamunka yáakesh nekashti” tímiayi.

Jirimíasa papiri̱n Juasim áesamtai atak aarma

²⁰ Papí ain Irisáma pujutái̱ri̱n nú papin ikiukí̱ úunt akupin pujutai̱ á̱a̱ri̱n wéarmiayi. Tura antukarmia nuna úunt akupniun ashí paant ujakármiayi.

²¹ Nuiṉkia úunt akupin Juasim papí utitiá tusa Jeutin akupkámiayi. Papí ain Irisáma pujumia nuya̱n achik itiamiayi. Tura úunt akupin pujamunam pepru páantniuri̱ armia nusha ashí ántuiniamunam Jeutí áujsamiayi.

²² Nuka nantu nuiwi ámanum ámiayi. Tura tsetsek nantu asamtai úunt akupin jinia ikiapár je̱á̱ pujumiayi.

²³ Jeutí menaintiú nuíchuka kuatru tesarma áujsamtai úunt akupin aakma aarmia nuna tsupitiai̱ji̱a̱i̱ tsupik jinia kaí̱ri̱ kapa̱a̱munam esáa amukat tusa ajapamiayi.

²⁴ Túmaitkiuisha úunt akupniusha ni takarniúri̱sha ashí ju̱ chichaman antukarmia nuka ashamkacharmiayi. Túrawar ni pushiri̱nkesha já̱a̱kcharmiayi.

²⁵ Tura Irnatánka Terayasha nuyá̱ Jemarías úunt akupniun papí pénuimiun ekemákara̱i̱ṉ tusar seawarmiayi. Támaitiat anturkacharmiayi.

²⁶ Nuyá̱ úunt akupniu uchirí̱ Jeraméeran tura Asriára uchirí̱ Serayásan núnisaṉ Apteera uchirí̱ Seremíasan akupénak papí ain Paruk tura Yúsnan etserin Jirimíassha achiktarum tusa akupkarmiayi. Túrasha Uunt Yus mai̱ ú̱karmiayi.

²⁷ Jirimías Parukan áamtikramia nu papí pénuimiun úunt akupin ekemákmia nuyá̱ ukunam Uunt Yusa chichame̱ Jirimíasan tarí chicharuk

²⁸ “Papí pénuimiu achikta tura nú chichamak papinium emka áarmam nuna Jutanmaya̱ úunt akupin Juasim áesamia nuja̱i̱ métek ashí aartá.

²⁹ Tura Jutanmaya̱ úunt akupin chicharkum Uunt Yus jú̱nis túramui titiá ‘Ame ju̱ papí pénuimiu aesam chicharkum “Nekasaṉ Papirúnianmaya̱ úunt akupin taa ju̱ nuṉkan tura aentsnasha tura yajasmancha ashí emeskartatui tusam ¿urukamtai ju̱ papí pénuimiu áarmam? tíniuitme.”

³⁰ Uunt Yus Juasiman Jutanmaya̱ úunt akupniun chicharuk “Ame shuaruminia̱ṉka Tawit pujutai̱nmaṉka pujuschattawai. Antsu ni aya̱shí̱nkia a̱a̱ etsa̱nam ajapamu átatui tura kashi micha amuam tepettawai.

³¹ Ni yajauchiri̱ni̱ṉ ni takarniúri̱ncha ni shuari̱ncha tura nincha asutiáttajai. Nincha tura Jerusaréṉnum matsatainia nunasha núnisaṉ Jutanmaya̱ aentsnasha wáitsatniun akuptúkartatjai. Kame timiaj núnaka anturtukcharu ásarmatai nuka túrunattawai”’” Uunt Yus tímiayi.

³² Nuyá̱ Jirimías chíkich papí pénuimiun achik Neríasa uchirí̱ papí ain Parukan susamiayi. Tura Jutanmaya̱ úunt akupin Juasim papin jinium áesamia nuna Jirimías atak ashí áamtikramiayi. Tura nu arantcha chíkich chichamnasha untsurín íikiak nuja̱i̱ métekrak áarmiayi.