Jrm. 35 - Yus Papí: Shuarja̱i̱ Yus Yamaram Chicham Najanamu

Rekap shuar armia nu umikma

¹ Jusíasa uchirí̱ Juasim Jutanmaya̱ úunt akupin pujumia nu tsawantai̱ Uunt Yusa chichame̱ Jirimíasan tarí chicharuk

² “Rekap shuar matsatmanum wetá túram niji̱a̱i̱ chichasta tura Uunt Yusa Je̱e̱n tesarma ainia nui̱ itiata túram wíniun umarat súsarta.”

³ Jasaníasa aparí̱ Jirimías nuyá̱ Jirimíasa aparí̱sha Awasenías ármiayi. Nú Jasaníasnaka ni yachi̱ncha tura ashí ni uchirí̱ armia nuna nuyá̱ ashí Rekapa uchirí̱ armia nunasha júkiarmajai.

⁴ Túran Uunt Yusa Je̱e̱n á̱a̱ri̱n tesarma armia nui̱ Anana uchirí̱ tesarmari̱n jukimjiai. Kame Iktariása uchirí̱ Anan Yusan esetas enentáimtin áishmaṉkauyayi. Kame Anana uchirí̱ tesarmari̱ṉ ápatnik Saruma uchirí̱ Masías waiti wáinin pujumiayi. Tura nuna yakiṉkia pepru páantniuri̱ irunin ármiayi.

⁵ Nuiṉkia Rekapa shuari̱ wíniun ukatin eem apujtakun chicharainiakun “Winiu umartarum” tiármajai.

⁶ Tutai ni chichartuiniak “Wíniuka úmichuitji” turutiarmai. “Warí ii aparí̱ Junatáp Rekapa uchirí̱ chichartamuk ‘Átumka tura atumí uchirí̱sha wíniuka peṉké umarairap’ tu ti akuptámkamji.

⁷ ‘Nuya̱sha je̱a̱ je̱a̱mairap tura arakmawairap nuyá̱ uwa araawairap, núṉkentin ajasáirap tura átum iwiaakrumna ímianaiṉkia nuap je̱a̱nam tuke pujustatrume. Átum pujuttarmena ímianaiṉkia tarimiat tsawant pujusmintrum’ tímiayi.

⁸ Tura iikia ii aparí̱ Junatáp Rekapa uchirí̱ chichame̱ tuke umirniuitji. Átum iwiaaku pujuttarmena nuiṉkia atumsha tura atumí nuwe̱sha núnisaṉ atumí uchirí̱sha tura nawantri̱sha winiu umarairap tu chichartamak akuptámkamji.

⁹ Je̱a̱ pujustincha je̱a̱mairap tura uwa ajasha núnisaṉ chíkich ajasha nuyá̱ jiṉkiái aratniusha takusairap.

¹⁰ Nuap je̱a̱nam matsamsar umikiu asar ii aparí̱ Junatáp ashí túramiaj nuja̱i̱ métek umikiaruitji.

¹¹ Tura Napukutunusúr Papirúnianmaya̱ úunt akupin ii nuṉke̱n káunkarmania nui̱ chichaakur ‘Siria suntari̱ tura Kartíu suntarí̱sha ii nuṉke̱n káunkarmania nui̱ chichaakur Jerusaréṉnum ú̱mkartai’ tiármaji” tiármiayi.

¹² Nuiṉkia Uunt Yusa chichame̱ Jirimíasa tarí chicharuk

¹³ “Ashí akupin Uunt Yus Israera Yusri̱ jú̱nis túramui, Jutanmaya̱ shuar tura Jerusaréṉnum matsatainia nui̱ wetá tura chicharainiakum jú̱nisam tiartá. ‘¿Winia chichamur umikiuk tusan jintintiajrumna nuka unuimiárchamniakaitrum?’ tawai Uunt Yus.

¹⁴ Junatáp Rekapa uchirí̱ ni uchirí̱n chicharainiak ‘Winiu umarairap’ tu ti akupkarmiayi tura nuka uminkiamiayi. Tuma asa yamaiya̱ ímiaja̱i̱sha wíniun úmichu áiniawai. Aparí̱ akupkámuri̱n umikiarmiayi. Túmaitkiuisha wi atumín yámankamtaikniumia̱ iniaitsuk chicharkamajrume túrasha ántutsuk tuke umirtichu ajasurme.

¹⁵ Ashí Yúsnan etserin Winia takartin armia nuna iiṉkiá akuptúkmiajrume atumí iniaitsuk ujatmákarat tusan. ‘Yamaikia aṉkant aṉkant atumí wakeramuri̱ya̱ kanaktiarum. Tura atumí túrutairi̱ eseeratarum túrarum chíkich yus írunna nu umirkairap tura nemarsairap. Atumí we̱a̱trí̱n nuṉká súsarmiaj tura atumín nuṉká amasmiaj nui̱ matsamsamniuram’ tiármajai. Túramaitiatrum atumí kuishi̱ji̱a̱i̱ anturtutsuk tuke umirtatsrume.

¹⁶ Antsu ti nekas Rekapa uchirí̱ Junatápka ni uchirí̱ji̱a̱i̱ aparí̱ akupkámun umikiarmiayi. Túrasha jú̱ aentska umirtuiniatsui.

¹⁷ Tuma asamtai Ashí Akupin Uunt Yus Israera Yusri̱ jú̱nis tawai. Jutancha tura Jerusaréṉnum matsatainia nú aentsnaka ashí ni yajauchiri̱n wáitkiasartatjai tusan ujakáruitjiai. Núja̱i̱sha anturtukcharmai. Untsukarmajai túramaitiat ái̱rkacharmai” tímiayi.

¹⁸ Nuiṉkia Jirimías Rekapa shuari̱ni̱ chicharuk “Ashí Akupin Uunt Yus Israera Yusri̱ jú̱nis tawai, Atumí aparí̱ Junatápa akupkámuri̱ umikiu asarum ashí túratniun ni timia nuja̱i̱ métek túramarme.

¹⁹ Tuma asamtai Junatáp Rekapa uchirí̱nkia chikichík áishmaṉkesha tuke tsawant Wi pujamunam wajastinniaka peṉké táaschattawai tawai Israera Yusri̱ Ashí Akupin Uunt Yus” tímiayi.