Jrm. 33 - Yus Papí: Shuarja̱i̱ Yus Yamaram Chicham Najanamu

Ataksha nekas awakearma átatui

¹ Tura sepú wáinin matsamtai̱ á̱a̱ri̱n Jirimías achikma pujái̱ Uunt Yus ataksha chicharuk

² “Uunt Yus nuṉkan najana muchitkiachmin awajsámia nu ni náari̱ṉkia Uunt Yusa nú chichartak

³ ‘Untsurkata, túrawakminkia ái̱ktatjame. Tura ame nekaachma nuna jintintiáttajme. Nuyá̱ u̱kma tura enentáimprachmin ainia nunasha paant awajtústatjame’ tíniuiti.

⁴ Israera Yusri̱ Uunt Yus jú̱nis tíniuiti Jutanmaya̱ úunt akupniu je̱e̱ncha tura péprunam je̱a̱ írunna nuka puya̱numia̱ ayamprumatai sa̱a̱kmia áiniawai.

⁵ ‘Warí, Kartíu aentska mániktaj tusa wininiawai tura aentsu aya̱shí̱n utuami ikiukiártatui. Winia kajetáirja̱i̱ tura suíruja̱i̱ akaṉkáram kajinkiarmiayi. Kame ju̱ péprunmaya̱ṉka imiá yajauch túrin armia nuja̱i̱ Winia yapirnaka ú̱rkarmajai.

⁶ Nekaata Wi tsuámatai tsuákan itiarin tsuárartatjai. Túran Wi shiir matsamsartinian tura nékaskea nuna tí nukap iniaktusartatjai.

⁷ Israernasha tura Jutancha achira yaruakma ainia nuna ataksha awakeartatjai. Túrawaran yama naṉkamtaik tura yaunchu matsamin armia nútiksaran matsasártatjai.

⁸ Winin yajauch enentáimprar tunaan túrawarmia núnaka japirartatjai. Túran ashí yajauch enentáiji̱a̱i̱ Wi timian peṉké nakitrarmia nunasha núnisnak tsaṉkurartatjai.

⁹ Jú̱ pepruka Winia náarun pachisar warainiak tura winia wincharun wararainiakᵘ shiir awajtin ártatui. Túrasha ashí péṉkeran Wi jú̱ peprun túraitjiana nuna ashí nuṉka uunt mátsatkamunam antuk nekaawar ashamainiak tákeer ajartatui.’

¹⁰ Uunt Yus jú̱nis chichaak ‘Ju̱ nuṉka ju̱ka átum chichaakrum “kampuntin atsú aentsush tura yajasmash atsawai” tura Jutá pépruri̱nkia tura Jerusaréṉka jínti̱nkia mashiaruiti. Nuiṉkia aentsush tura yajasmash matsamsachmin ajasuíti tárume.

¹¹ Túmaitiat atak ántuakka shiir enentáimkiur untsummasha tura warakur untsumainiamusha áishmaṉ nuatuk untsummasha tura nuwa̱ nuatnayak untsummasha untsumainiak “Ashí Akupin Uunt Yus shiir awajsatarum. Warí Uunt Yuska péṉker asamtai Niṉkia tuke waitnenkartiniaiti” tuinia nu ártatui. Yumiṉsajme tusar Uunt Yusa Je̱e̱n Yusan suinia chichame̱sha antuntiatui. Kame achira yaruakma ainia núnaka Wi ataksha awakeara ikiankartatjai, yaunchu matsamin armia núnis matsamsartatui’ tawai Uunt Yus.

¹² Ashí Akupin Uunt Yus jú̱nis tawai ‘Ju̱ nuṉka emesnak áentsri̱ncha tura yajasmash atsú ajasártatui. Tura ashí pepru ainia nui̱ṉkia ataksha sa̱a̱k iruntiatui. Núnisaṉ murikiu wáinin ainia nusha ni murikrí̱n ayamtikrartatui.

¹³ Pepru naintiar naintiar írunmanumsha tura pakanam pepru írunmanumsha Nekepnumsha tura Piṉjiamínkia nuṉke̱ncha núnisaṉ Jerusaréṉka téntakmari̱ncha tura Jutá pépruri̱ncha ímianaisha murikiun wáinin ni murikrí̱n nekapmar matsasártatui’ tíniuiti Uunt Yus.

Yus Tawitji̱a̱i̱ chícham najanamu nekas uminkiatniuiti

¹⁴ Kame Wi chichaakun ‘Israernumsha tura Jutanmasha péṉkeran páchitsuk túrattajai tímiajna nu umiktin tsawant jeatémayi’ tawai Uunt Yus.

¹⁵ ‘Tura nu tsawant jeattana nui̱ṉkia Wi Tawitiai̱ya̱ numí Kanawe̱ tsupikma je̱e̱r ataksha tsakana áitkiattajai. Nisha nekasa nuja̱i̱ súmamtikiuk ju̱ nuṉkanam esetar akupkáttawai.

¹⁶ Nu tsawantinkia Jutá shuarka uwemtikramu ártatui núnisaṉ Jerusaréṉnumia̱ shuarsha aṉkant sapijmiatsuk matsamsartatui. Tuma asamtai “Iin nekasa nuja̱i̱ ayamprutmaka Úunt Yusaiti” tu anaikiamu átatui.’

¹⁷ Warí Uunt Yus chichaak ‘Tawitia tiraṉki̱ Israer shuara akupin pujutái̱ri̱n pujustinniaka peṉké táaschattawai.

¹⁸ Núnisaṉ Yúsnan pujurniu tiraṉki̱sha núnisaṉ Yúsnan takarniu tiraṉki̱sha winia shiir enentáimturuk takamtsuk áesturatniuncha tura araka neré emka juukman áesturatniuncha tura ashí tsawant takamtsuk tuke áesturatniunka tiraṉki̱ṉkia peṉké táaschartatui’” tímiayi.

¹⁹ Nuyá̱ Uunt Yus Jirimíasan chicharuk

^20-21 “Uunt Yus chichaak ‘Tsawant nekapmamuja̱i̱ métek tsawantcha tura káshisha a̱i̱ṉ tusarum tsawai̱ji̱a̱i̱ núnisaṉ káshiji̱a̱i̱ Wi chichaman najanamiaj nu ántar awajsatin jeakrumka antsu nuikia Tawitia uchirí̱ ni akupkur pujutái̱ri̱n akinkiarat tusan Winia takartin Tawitji̱a̱i̱ chichaman najanamiaj nusha ántar awajsaintrume. Núnisrumek Yúsnan pujurin Riwí shuar Winia takartuiniana núja̱i̱sha chichaman najanamiaj nusha ántar awajsaintrume.

²² Kame yaasha nekapmarminkiait. Núnisaṉ nayantsa náikmiri̱ nekapmamniakait. Tura Winia takartin Tawitia shuari̱nkia tura Riwí shuarnaka imianú núkap awajsartatjai’” tímiayi Uunt Yus.

²³ Tura Uunt Yus Jirimíasan ataksha chicharuk

²⁴ “Ámeka ju̱ shuar chichainiak ‘Uunt Yus jimiará matsatka aentsun Israer Jutaja̱i̱ Wí shuaraiti tusa achikiárat ajapawaruiti’ tiarma nuka ¿antukchamkum? Warí niṉkia Wí shuaran imiancha enentáimtuiniak uunt nuṉka mátsatka ímianu enentáimtuiniatsui.

²⁵ Uunt Yus tuke chichaak ‘Káshincha tura tsawai̱ncha chicharkun jú̱nisam túrunata tura nayaimpiniam irunainia nusha núnisaṉ nuṉká irunainia nunasha Wiki jú̱nisrum túrunatarum tímiaj nuna umirtuiniachkuiṉkia

²⁶ nuiṉkia Wikia Jakupa tiraṉki̱ncha tura Winia takartin Tawitia tiraṉki̱ncha nakitrartatjai. Tura Tawitia uchirí̱nkia Aprajáma uchirí̱n, Isaknasha núnisan Jakupnasha, nin úunt akupin ajasarti tusan apujsashtatjai. Antsu nekas Wikia nin péṉkernum apujsattajai túran waitnentrartatjai’ tawai” tímiayi.