Jrm. 32 - Yus Papí: Shuarja̱i̱ Yus Yamaram Chicham Najanamu

Jirimías nuṉka sumakma

¹ Kame úunt akupin Setekías tias uwí akupin ajas Jutanam pujái̱ Uunt Yus Jirimíasja̱i̱ chichasmiayi. Antsu úunt akupin Napukutunusúrka tiasiúchu uwí akupin ajas pujamunam nuka túrunamiayi.

² Nu tsawantincha Papirúnianmaya̱ akupniu suntari̱ Jerusaréṉkan matsamtuk téntakar pujuriarmiayi. Kame Yusa chichame̱n etserin Jirimíaska úunt akupniu je̱e̱ á̱a̱ri̱n sepú wáinin matsamtai̱niam achikma pujumiayi.

³ Warí, Jutanmaya̱ úunt akupin Setekías Jirimíasnaka achik chichaak “¿Urukamtai chichaakum ‘Uunt Yus tawai yamaikia nekaata, jú̱ peprunka Papirúnianmaya̱ úunt akupniu uwejé̱n íktusan iniaiyajai. Túram ata̱i̱ttiawai.

⁴ Núnisaṉ Jutanmaya̱ úunt akupin Setekíaska Kartíu aentsai̱ya̱ṉka peṉké uwemprashtatui antsu tí nekas achikiar Papirúnianmaya̱ úunt akupniui̱ surukartatui. Túram niji̱a̱i̱ métek iniaisar chichasártatui.

⁵ Tura Setekíaska achikiar jukimiu Winia chichamur umiimiam wáitkiasma Papirúnianam pujustatui. Wi Uunt Yus asan núnaka tájame. Tura Kartíu aentsja̱i̱ mániakrumsha péṉker jintiurmakchattarme’ tuusha etseram?” tímiayi.

⁶ Tura Jirimías chichaak “Uunt Yusa chichame̱ taruti chichartak

⁷ ‘Nekaata, Janamír ame íichrum Saruma uchirí̱ ámin winitramui. Tura ni chichartamuk “Winia nuṉkar Anatútnum sumakta. Warí ame wi shuar asam sumaktinmeka nérenniuitme” túrutui.’

⁸ Uunt Yus timia ímiatrusaṉ sepú á̱a̱ri̱n winia iichru uchirí̱ Janamír winia tarutmiayi. Tura chichartak ‘Anatútnum tura Piṉjiamínkia winia nuṉkar ana nu waitneasam sumakta. Pujustinkia ame nérenniuitme tura sumaktinkia áminiuiti. Áminiu sumarmakta.’ Nuiṉkia Uunt Yus timia nuna nekamjai.

⁹ Tura nuiṉkia winia iichru uchirí̱ Janamír Anatútnum pujan tura winia nuṉkarun sumakmajai. Nuyá̱ kuítian nekapmamjai túran tiasisiáti kuit jeá amai.

¹⁰ Nuyá̱ papin najanamjai túran asakamjai. Nuya̱ṉka aentsun akikmajai túran kijin nekapmatai̱niam nekapmamjai.

¹¹ Nuya̱ṉka nuṉka sumakma papin urutmá kuitji̱a̱i̱ sumakmait tura itiurak takastiniait mash ujakma nuna, chikichik init eṉkeamu urakchamun jukimjiai. Núnisan chikichnasha nú weanak eṉkeachmancha jukimjiai. Mái̱ papinium métekrak aarma amai.

¹² Nuṉka sumakma papin Neríasa uchirí̱ Parukan susamjai. Neríassha Masíasa uchirí̱yayi. Kame winia iichru uchirí̱ Janamír pujamunmaṉ nu papin susamjai. Núnisaṉ nuṉka sumakma papin kuesmararma nusha matsatainiai̱ṉ tura ashí Israer aentssha sepú á̱a̱ri̱n irunmia nusha ashí iimiainiamunam Parukan susamjai.

¹³ Nu aents tuke pujuiniai̱ṉ Parukan chicharkun

¹⁴ ‘Ashí Akupin Uunt Yus Israera Yusri̱ jú̱nis túramui “ju̱ papí achikiárta. Nuṉka súramu papí asakata tura chíkichkia nu papí aarma núkap tsawant pujusat tusam ichiṉnanam eṉkea ikiusta.”

¹⁵ Warí Ashí Akupin Uunt Yus Israera Yusri̱ jú̱nis tíniuiti “Je̱a̱ncha nuṉkancha tura ajancha ju̱ nuṉkanmaya̱nak tuke sumaki̱ wéartatui”’ tímiayi.

Jirimías nemasri̱ téntakam pujus Yusan seawai

¹⁶ Sumakma papin Neríasa uchirí̱ Parukan susan Uunt Yusan seakun jú̱nisan tímiajai

¹⁷ ‘¡Ii Yusri̱ Uunt Yusá! Ámeka ashí tujintkiachu asam kunturam takuim nayaimpisha tura nuṉkasha najankamiame. Ame tujintkiamniaka ishichkisha peṉké atsawai.

¹⁸ Ámeka tí untsurí aents waitnenniuitme. Túrasha ni uuntri̱ yajauchiri̱ni̱ṉ ni uchirí̱sha asutniuitme ni kajinkiarmataisha. Maa, tí uunt tura Ashí Tujintkiachu Yusá áme náarmeka Ashí Akupin Uunt Yusaiti.

¹⁹ Tí nekasaiti Ame chicharkartutairmeka nekas antuktiniaiti tura Ame túrutairmesha nekas enentáimpramnia áiniawai. Kame ashí aents túruiniamun Ame jí̱mikia wainiui. Tuma asam ni wekasamuri̱ji̱a̱i̱ tura ni túrawarmasha Ame iisam péṉker túramuri̱ji̱a̱i̱ métek aṉkant aṉkant akikiártatme.

²⁰ Kame Ejiptunmasha tura yamaiya̱ ju̱i̱sha Israernumka nuyá̱ ashí aentsnumsha nekanat tusam ántsamek aentsti túrachmin naṉkamantu áiniana nu iniakmasuitme. Nu túrakum yamái urukamea núnisam naat ajasuitme.

²¹ Ejiptu nuṉkanmaya̱ ame kunturam takurim aents túrachminia tí tsuumai̱ túram sapijmiamtikiaram tujintkiachu uwejmi̱ji̱a̱i̱ Israer shuar ji̱i̱rarmiame.

²² Tura nekas tajai tusam chicharainiakum ni uuntri̱ tí peṉker nuṉka ashí árak tsapáu asamtai muntsu míshkiji̱a̱i̱ entsa núnis akamunmasha súsartiniaitjiai tusam anajmatra asam súsarmiamna nú nuṉkaka ju̱i̱ti.

²³ Nuyá̱ nu nuṉkanam waya̱war nérentin ajasármai. Túrasha ame chichamuncha antukcharai. Akupkámurmiji̱a̱i̱ métekka wekasacharai. Túmainiak umiktarum tímiam nunasha umikcharai. Tuma ásarmatai ju̱ yajauchikia tsaṉkatkaruitme.

²⁴ Wats iistá, wénuk yumputaiji̱a̱i̱ yumpuṉki̱ waya̱war akintrutmaktai tusar ii pépruri̱n tíjiu̱ch ajasárai. Tura Papirúnianmaya̱ aentsja̱i̱ mániawarat tusa íktusmaiti. Núnisaṉ puya̱ja̱i̱ mantamnatniun tura tsukaja̱i̱sha nuyá̱ ijiaja̱i̱sha wáitsartatui. Ame chichakmiamna nuka ímiatrusaṉ jeariarai. Wats, ámeka iyaame.

²⁵ Túmaitkiusha Uunt Yusá, Papirúnianmaya̱ aents íktustatiatmek chichartakum “Nekas sumakuiti tiarmi” tusam aents untsukarta. Tura ju̱ nuṉkaka ame kuitji̱a̱i̱ sumakta túrutme’” tímiayi.

Uunt Yus Israer shuaran uwemtikrartatjai timia

²⁶ Nuya̱ṉka Uunt Yus Jirimíasan chicharuk

²⁷ “Iistá. Witjiai Uunt Yus ashí iwiaakma néreniuri̱ntjiai. ¿Wiji̱a̱i̱ tujintkiamnia áminkiait?”

²⁸ Tuma asa Uunt Yus chichaak “Yamaikia ju̱ nuṉkanka Papirúnianmaya̱ akupin Napukutunusúr Kartíu aents mesetja̱i̱ amukarti tusan tsaṉkatkattajai. Túram nérentin ajasártatui” tíniuiti.

²⁹ “Tura Papirúnianmaya̱ aents Jerusaréṉkan mesetan juruinia nuka nui̱ utsantuawar je̱a̱ taṉkiri̱n Páaran tura chíkich najankamu yusan wíniuja̱i̱ ukatrar núnisaṉ kuṉkuinian áestuiniak Winia kajetáirun e̱a̱karma núurtiuk jiji̱a̱i̱ áeskartatui.

³⁰ Warí Israer shuar tura Jutá shuarsha yajauchin túrawaru áiniawai. Kame Israera uchirí̱ṉkia natsa armia nuyá̱ juárkiar aya yajauch túratniunak Winia itit awajtústinian iniaisacharuiti. Antsu niṉki ni yusri̱n najanawar winia kajetáirun e̱a̱karu áiniawai” tawai Uunt Yus.

³¹ “Tura ju̱ pépruka naṉkamawarmia nuyá̱ juárkimiutaik yamaiya̱ tímiaja̱i̱sha Winia suir awajtuiniak akajtuktinian iniaisacharuiti. Tuma asamtai yamaikia Wi íimmianumia̱ ji̱i̱raran shiákartatjai.

³² Kame Israer shuar tura Jutá shuar aya yajauchiniak túruiniak núnisaṉ úunt akupin tura páantniuri̱ armia nusha tura Yúsnan etserniusha Yúsnan takarniusha nuyá̱ ashí Jutanmaya̱ shuarsha Jerusaréṉnumia̱ shuarsha ti yajauch túrawaru ásar aya akajtukaruiti.

³³ Antsu anturtukar umirtutsuk tuntupea iniaitiusarmai. Túrutainianak Wikia nin jintintiátniunka iniaisacharmajai. Túrasha peṉké pachittsacharmai núnisaṉ chicharmasha anturtuktinian peṉké nakitruraruiti.

³⁴ Antsu nu túrakrum winia naar shiir Awajtai̱ Je̱a̱rui̱ najankamu yus awayá̱rum tikishmáteakrum mui̱jmiainia nu túrakrum peṉké yajauch awajsaitrume.

³⁵ Nu arantcha Wi akupkachmaj tura ishichkisha enentáimsachmaj nú mui̱jmiai̱ túrakrum Piṉjiniúm nuṉka pakari̱n najankamu yus Paar áestakur enentáimtutai̱ najankarum atumí uchirí̱ tura nawantri̱sha ántar yus Muruk náartin áestimiarme. Nu túrakrum Jutá shuar tunáa ti túrumamtikiamarme” tímiayi Uunt Yus.

³⁶ “Tura Jerusaréṉ péprun pachis Israer shuara Uunt Yusri̱ jú̱nis tíniuiti. Túmaitiat átum ju̱ pepru áujmatsarum ‘Papirúnianmaya̱ úunt akupniu uwejé̱n surukartatui. Túramtai mesetja̱i̱sha tsukaja̱i̱sha tura suṉkurja̱i̱sha amukma ártatui’ táyatrum

³⁷ Wikia tí kajekmajai. Yajá nuṉkanam tsakiṉmakan ashí nuṉkanam akuprámaj nuna ataksha awakearan ju̱i̱ ikiankan shiir matsasártatjai.

³⁸ Tura nisha Wi shuar ártatui, Wisha núnisnak ni Yusri̱ átatjai.

³⁹ Nuyá̱ nu aentsun chikichik enentái̱ji̱a̱i̱ métekrak takasarat tusan tsaṉkatkartatjai tura tuke iniaitsuk Winia arantúrkar nisha nuyá̱ ni uchirí̱sha ti shiir pujusártatui.

⁴⁰ Nuyá̱ wisha niji̱a̱i̱ amukashtin chichaman najanattajai. Núnisnak niin péṉker túratniun peṉké iniaisachartatjai. Áintsaṉ Wini̱ya̱ kanakiára̱i̱ṉ tusan ni enentái̱n sapijian eṉketáwartatjai.

⁴¹ Tura Wisha niin peṉker túruiniakun ti wararnaisartatjai. Núnisnak nekas enentái̱rja̱i̱ ashí wakantruja̱i̱ ataksha nekasa nuja̱i̱ ju̱ nuṉkanam matsasártatjai.

⁴² Uunt Yus chichaak jú̱nis tíniuiti ‘Ju̱ aentsun itiurchatan itiarin itiurkarmaj nútiksanak ashí péṉkeran níniun itiariártatjai.

⁴³ Tura átum chichaakrum “Emeskar aentsush tura yajasmasha atsú awajsamuiti tárumna nú nuṉkan sumakartatui. Túrasha Kartíu aentsu uwejé̱n íktusar iniaisámuiti” tárume.

⁴⁴ Antsu nuṉkan kuitji̱a̱i̱ súmainiak papin najanawar asaktai̱n apujtuawar tura jimiará aentsun achikiar Piṉjiamínkia nuṉke̱nka Jerusaréṉkan téntakartatui. Jutá pépruri̱n tura pepru naintiar naintranmasha tura Sejeranmasha núnisaṉ Nekepnumsha pepru iruniartatna nui̱ Wikia yajá yaruakma ainia nuyá̱ awakearartatjai’” tawai Uunt Yus.