Jrm. 30 - Yus Papí: Shuarja̱i̱ Yus Yamaram Chicham Najanamu

Israer shuar ukunam waketratin ujaamu

¹ Uunt Yusa chichame̱ Jirimíasa tarí chicharuk

² “Uunt Yus Israera Yusri̱ jú̱nis chichaak ‘Wi ámin tájamna ju̱ka papinium ashí aartá’ tímiayi.

³ ‘Nekaata tsawant tsawa̱rtatui Wí shuarnaka kame Israer shuarsha núnisaṉ Jutá shuarsha achira yajá yaruakarman awakearartatjai. Túran ni úuntri̱n nuṉkan súsarmiaj nui̱ṉ ataksha awakearan matsasártatjai túran nui̱ṉ matsamsartatui’” tawai Uunt Yus.

⁴ Uunt Yus Israernan tura Jutanun tiarmia nuka ju̱i̱ti.

⁵ Uunt Yus chichaak “Ashamakur untsumma antukuitji. Sapijmiaktin tsawant asamtai warasar matsamsatin atsawai.

⁶ Yamái inintrústaj tusarum íimsatarum. ¿Áishmaṉ uchin takawak. Nuiṉkia urukamtai nuwa̱ uchin takustaj tawa núniskesh ashí áishmaṉ káajke̱n achikiar wajainia? ¿Urukamtai ni yapi̱sha putsú putsú ajasáru ainia?

⁷ Maa, nú tsawantka imiá uunt tsawant átatui tura nuja̱i̱ métekka atsuttawai. Jakup shuarnaka mayái̱ ashinkiamnia nú tsawantka arittiawai túrasha niṉkia aṉkant awajsamu átatui.

⁸ Ashí Akupin Uunt Yus tuke tawai. Nu tsawant átatna nuiṉkia Wi kuntujmíya̱ṉ kijin awantkámua nuna kupirattajme. Tura jiṉkiamurmincha tsurintrattajme. Tura atakka chíkich nuṉkanmaya̱ ainia nuna iniatairi̱ áchattarme.

⁹ Antsu ni Yusri̱ Uunt Yusan tura ni úunt akupniuri̱ Tawitniasha umirkartatui. Kame Wi níniak ataksha nui̱ṉ apujtustatjai.

¹⁰ Tura ámeka winia takartin Jakupá ashamkaip tura Israerá mayaim ishinkiaip tawai Uunt Yus. Nekaata áme shuarumin chíkich nuṉkanam achira yaruakman uwemtikniunka Witjiai. Jakupka aṉkant pujustaj tusa waketkittiawai tura niṉkia shiir enentáimias yáakesh itit awajsachma pujustatui.

¹¹ Warí Wi uwemtikrattaj tusan ámiji̱a̱i̱ pujustatjai tawai Uunt Yus. Uunt nuṉka mátsatkamu ainia nuja̱i̱ tura yajá tsakiṉmakarmaj nuja̱i̱ ashí amukártatjai. Antsu áminkia emesrashtatjame tura nekasa nuja̱i̱ métek asutiáttajme. Túrasha asuttsuk peṉké ikiukchattajme.

¹² Uunt Yus jú̱nis tawai. Ame akaṉmármeka tsuárchamniaiti núnisaṉ ame kuímiarmeka tí najamniuiti.

¹³ Atsaash yaki amincha pachitmasat. Núnisaṉ akaṉmárumnia̱sha tsuámartin tsuakri̱ atsakui tsuártinkia atsawai.

¹⁴ Ame yajauchirmeka tí nukap kawentramkarai tura tunaarmesha tí nukap tu̱á̱karai túrunamtai aents nemasri̱n awati numpamaa wáitkiana nútikiamajme. Tuma asamtai ame anetairam arma nuka áminkia ashí kajinmáttramkiar pachitmainiatsui.

¹⁵ ¿Urukamtai ame akaṉmármiji̱a̱i̱sha najaimiakum charáa charáa ajam? Ame najaimiamurmeka tsuatash tsuárchamniaiti núnisaṉ ame yajauchirmeka tura ame tunaarumesh ti uunt ásarmatai jú̱naka jú̱tikiaitjiame.

¹⁶ Tura ámin yamái yuramainia nuka yuamu ártatui tura ame nemasrum ainia nuka ashí mash achira yaruakma ártatui. Atumín atantramainia nunasha núnisaṉ nincha atantrartatui. Ántsaṉ atumín kasartamainia nunasha nútiksaṉ kasararat tusan iniaisartatjai.

¹⁷ Kame Seúnnaka yaaksha e̱a̱tsui tusar Yussha ajapaiti turamainia ásarmatai Wikia péṉker awajsattajrume túran ame akaṉmármincha tsuarattajme” tawai Uunt Yus.

¹⁸ Uunt Yus chichaak “Nekaata achira yaruakma ainia nuna Jakupa shuari̱n ikiankartatjai ní shuari̱nkia waitnentrartatjai. Pépruka emeskarma ainia nui̱ṉ ataksha je̱a̱mkartatui tura úunt akupniu je̱e̱sha je̱a̱mkamu amia nui̱ṉ ataksha je̱a̱mnaktatui.

¹⁹ Nú aentsnumia̱ ame túramuja̱i̱ yumiṉsajme tusar waras pujuinia nuna chichame̱ jiinkiattawai. Tí nukap pampaṉtatrume túrunarum emeṉkáchmin ajastatrume. Antsu naṉkamantu awajsattajrume túrasha náakmachuka áchattarme.

²⁰ Ni uchirí̱sha yaunchu uruku armia núnis ataksha péṉker ártatui núnisaṉ ashí Israer shuar wi íimmianum tuke pujusártatui. Antsu nin wáitkiainia núnaka asutiáwartatjai.

²¹ Ni akupniúri̱ṉkia ni aentsri̱ matsatainia nuyá̱ úunt akupin anaikiamu átatui tura ni aentsri̱ya̱ asa nin péṉker akupkartatui. Wi nin weaktatjai túram ni Winin taruttiatui. Warí, yamaikia ¿yaki ashamtsuk Winí̱ weankatniun tarutit?” tawai Uunt Yus.

²² “Átumka wi shuar átatrume tura wikia atumí Yusri̱ átatjai” tawai.

²³ Nekaata. Uunt Yusa ni naseri̱ya núnis suira kaje̱nak winittiawai. Yusan enentáimtichu ainia nuna muuke̱nka aneachma iniantar yajauch awajsártatui.

²⁴ Uunt Yus ni enentái̱n túratniun tuke umitsuk ni tí kaje̱ntkamuri̱ atsaṉnarchattawai. Tura nuka tsawant amúamunam nekaattarme.