Jrm. 28 - Yus Papí: Shuarja̱i̱ Yus Yamaram Chicham Najanamu

Ananías ukunam túrunatniun waitruá étserma

¹ Setekías yama naṉkammanum Jutanmaya̱ úunt akupin ajas kuatru uwí tura nántuka seṉku ámanum pujái̱ Kapaunnumia̱ Asura uchirí̱ etserin Ananías winí̱ tarutmiai. Tura Yusa Je̱e̱n Yúsnan pujurniusha tura ashí aents iimiainiamunam chichartuiniak

² “Israera Yusri̱ Ashí Akupin Uunt Yus chichartak ‘Papirúnianmaya̱ úunt akupniu kakarmari̱nkia jurukín kakarmachu awajsaitjiai. Kame kuntujnum numi awantkámua nútikia pujurin ¿ácharmakia?

³ Uunt Yusa Je̱e̱ya̱n Papirúnianmaya̱ úunt akupin Napukutunusúr ju̱ya̱n yaruak Papirúnianam jukimia nuna jimiará uwí ámanum Yusna takarkur takakmatai ainia nuna ashí ju̱i̱ṉ awakearan ikiankattajai.

⁴ Núnisnak Jutanmaya̱ úunt akupniun Juasimia uchirí̱ Juakinkian tura ashí Jutanmaya̱ achira Papirúnianam yaruakma armia núnaka awakeartatjai tura Papirúnianmaya̱ úunt akupniu kakarmari̱nkia jurukín kakarmachu awajsattajai’ tawai Uunt Yus” Ananías tímiayi.

⁵ Nuyá̱ chíkich Yúsnan etserniusha matsatmanumaṉ tura ashí aents Uunt Yusa Je̱e̱n wajainiamunmaṉ Yúsnan etserin Jirimías etserniun Ananías ái̱kmiayi.

⁶ Tura Yúsnan etserin Jirimías chicharuk “Maa nekas Uunt Yus nuní̱ túrati. Ame etserkamna nuna Uunt Yus umik Uunt Yusa Je̱e̱ya̱n Yus takarkur takakmatai ainia nuna Papirúnianmaya̱ṉka irur núnisaṉ ashí achira yaruakma ainia nunasha ju̱i̱ ikiankarti.

⁷ Túmaitkiuisha ame kuishmin tura ashí aentsu kuishi̱n wi tiártatjana nú chicham antukta.

⁸ Yúsnan etserin ámeka táatsmini̱ṉ tura wisha táatsa̱i̱ṉ tí yaunchu taarmia nu etserainiak uunt nuṉka mátsatkamua nui̱sha núnisaṉ úunt akupin akupáinia ímianaisha mesetcha tsukasha suṉkursha ártatui.

⁹ Kame Yúsnan etserniuka warasar matsamsatniun étserkuiṉkia tura ni chichame̱ uminkiamtaiṉkia Uunt Yus nú etserniun ti nekas akupkana nu nekamniaiti” Jirimías tímiayi.

¹⁰ Nuyá̱ etserin Ananías Jirimíasa kuntujéya̱ṉ waaka kuntujé̱n awantain numiji̱a̱i̱ najanamun jurus kupikmiayi.

¹¹ Tura ashí aents matsatmanum Ananías chicharuk “Uunt Yus jú̱nis tawai ‘Napukutunusúr Papirúnianmaya̱ úunt akupin uunt nuṉkan mátsatkamunam matsatáinia nuna kuntujén kijin awantkatniua nútikia pujurna nuya̱ṉka jimiará uwí átatna nuiṉkia kuntujé̱ya̱ jurusáram aṉkant matsamsartatui’ tawai” tímiayi. Tura Jirimíaska ni wéamunmaṉ wémiayi.

Etserin Ananías asutiámu

¹² Nuyá̱ etserin Ananías Jirimías Yúsnan etserniun kuntujé̱ya̱n kijin awantkatniua nútikia pujurmanumia̱ aṉkant awajsámiayi, tura Uunt Yusa chichame̱ Jirimíasan chicharuk,

¹³ “Ananías werí chicharkum jú̱nisam titiá Uunt Yus chichartamuk ‘Ámeka numiji̱a̱i̱ najanamu kuntujnum ikiurtai kupikiume antsu yamaikia kuntujnum ikiurtai jiruja̱i̱ najankarta’ jú̱nis túramui.

¹⁴ Israera Yusri̱ Ashí Akupin Uunt Yus jú̱nis tawai. Yamaikia ashí uunt nuṉka mátsatka ainia jú̱naka jiruja̱i̱ kuntujnum ikiurtai najanamun Papirúnianmaya̱ úunt akupniun Napukutunusúran umirkarat tusan ikiursajai, kame yamaikia umirkartatui. Núnisnak kampunniunmaya̱ yajasma ainia nunasha nin umirkartatui” tímiayi.

¹⁵ Nuyá̱ Yúsnan etserin Jirimías etserniun Ananías chicharuk “Ananíasá antukta. Uunt Yuska akuptámkachuiti tura ame ju̱ aents waitruá ujakum nu chichamja̱i̱ nekas tawai tusam anaṉkainiame.

¹⁶ Tuma asamtai Uunt Yus jú̱nis túramui ‘Nekaata, Uunt Yus timia nuna umikchara̱i̱ṉ tusam ju̱ uwinmaṉ jakattame’ tawai” tímiayi.

¹⁷ Kame nú uwitini̱ṉ tura nantu siati ámanum Ananías jakamiayi.