Jrm. 26 - Yus Papí: Shuarja̱i̱ Yus Yamaram Chicham Najanamu

Jirimías jákatniuiti tama

¹ Jutanmaya̱ úunt akupin Jusíasa uchirí̱ Juasim Jutanam akupkatniun yama juarai̱ Uunt Yusa chichame̱ Jirimíasan tarimiayi.

² “Uunt Yus jú̱nis tawai ‘Ámeka Uunt Yusa Je̱e̱n wá̱i̱ti̱a̱i̱ri̱n ajapén wajasam ashí shuar Jutanmaya̱ Yusan enentáimtustai tusar Yusa je̱e̱n táartatna nu Wi titiá tájamna nu ashí ujakárta. Wi tájamna nuka chikichík chichamkesha kajinmattsuk tímiatrusmek ashí etserkata.

³ Maa anturtamkar aṉkant aṉkant ni yajauch túrutairi̱n iniaisarka maak árainti. Túrawarmataiṉkia ni yajauch túrawarmanum nin asutiáwartinian Wi iwiarturaruitiaj núnaka Wisha iniaisaintjiai.’

⁴ Tuma asa ‘Uunt Yus jú̱nis tawai titiá. “Winia anturtukrum akupkámu umiktin chichaman Wi atumín amasmiajrumna nuja̱i̱ métek wekaachkurminkia

⁵ ántsarmek Winia takarniur Yúsnan etserniun Wi yawe̱tsuk akuptúkmajrumna nuna chichame̱sha anturkatin nakitiakrumni̱ṉkia

⁶ antsu nui̱ṉkia Uunt Yusa Je̱e̱nka Sírun itiurkamaj nútikiattajai. Tura ashí nuṉkanam iismasha ju̱ pépruka yajauchiji̱a̱i̱ yumiṉkramu átatui” tawai Uunt Yus’” tímiayi Jirimías.

⁷ Tura Yúsnan pujurniusha nuyá̱ Yúsnan etserin armia nusha núnisaraṉ ashí shuar nui̱ pujuarmia nusha Uunt Yusa Je̱e̱n nu chicham Jirimías étserman antukarmiayi.

⁸ Kame Winia chichamur ashí shuar ujakárta. Uunt Yus timia nuna etserak umikmatai Yúsnan pujurniusha núnisaṉ Yúsnan etserniusha tura ashí shuar nui̱ pujuarmia nu Jirimíasan achikiar chicharainiak “Ámeka nekas jakattame” tiármiayi.

⁹ Nuya̱ṉka chicharainiak “¿Urukamtai Uunt Yusa náari̱i̱n étsereakmesha ju̱ je̱a̱nka Uunt Yusa je̱e̱nka Sírun itiurkamaj nútikiattajai tura ju̱ pépruncha amú amuusan shuari̱ncha awajsattajai tawai Uunt Yus tame?” tiármiayi. Nuna tiar ashí shuar nui̱ pujuarmia nuka Jirimíasan kajeráiniak Uunt Yusa je̱e̱ni̱ṉ irunturarmiayi.

¹⁰ Tura Jutanam peṉkeri̱ armia nusha túruiniamun nekaawar akupniu jé̱e̱ya̱ṉka jíinkiar Uunt Yusa Je̱e̱n jeawar yamaram wá̱i̱ti̱a̱i̱ri̱n pujusármiayi.

¹¹ Nuyá̱ Yúsnan pujurin tura Yusna etserin armia nusha ashí uuntri̱ ántsaṉ ashí shuar nui̱ pujuarmia nuna chicharainiak “Warí ju̱ pépruka amukáttawai tu étserna nu atumsha ¿atumí kuishiji̱a̱i̱ṉ antukcharmek? Tuma asa ju̱ áishmaṉka mantamnatniuiti” tiármiayi.

¹² Tura nuna tuíniakui ashí úuntri̱n núnisaṉ ashí shuar nui̱ pujuarmia nuna Jirimías chicharainiak “Ju̱ je̱a̱ Uunt Yusa Je̱e̱ tura ju̱ péprusha amuukattawai tusan wi étserma antukurmena núnaka tu etserkata Uunt Yus nekas turutin asamtai tajai.

¹³ Tuma asamtai yamaikia yajauch túratniuka tura atumí túrutairi̱sha iniaisarum atumí Uunt Yusri̱ chichame̱ anturkatarum. Nu túrakrumni̱ṉkia Uunt Yus asutiáwartatjai túramprumna núnaka asutiámashtatrume.

¹⁴ Antsu wíniaka ¿achirkachurmek? Tura asarum yamaikia wíji̱a̱i̱ṉkia péṉker tura nekas túratniua nu túrutatarum.

¹⁵ Túrasha ju̱ péṉker nekaatarum. Winia mántakrumka atumíin tura ju̱ péprunmasha núnisaṉ aents ju̱i̱ matsatainia nui̱sha umitmákcha numpé peṉké antra ukartatrume. Warí wi étserma atumsha ¿atumí kuishiji̱a̱i̱ṉ antukcharmek? Núnaka tu etserkata tusa Uunt Yus nekas akuptúkuiti” Jirimías tímiayi.

¹⁶ Takui̱ ashí uuntri̱ tura ashí aents nui̱ pujuarmia nu Yúsnan takarniun tura Yúsnan etserniun chicharainiak “Ju̱ áishmaṉka peṉké mantamnachminiaiti. Warí ii Yusri̱ Uunt Yusa chichame̱nak ujatmákji” tiármiayi.

¹⁷ Nuya̱ṉka nu nuṉkanmaya̱ uuntri̱ pujuarmia nu wárumchik wajakiar ashí aents nui̱ irunar pujuarmia nuna chicharainiak

¹⁸ “Uunt akupin Esekías akupin ajas Jutanam pujumia nu tsawantincha Muresétnumia̱ Mikías Yúsnan etsermiayi. Tura Jutanam ashí aentsnum étsereak jú̱nis tímiayi. ‘Ashí Akupin Uunt Yus chichaak “Seúnnaka kampunniua nútiksar amú amú awajsártatui tura Jerusaréṉka tsai̱ tsai̱ awajnástatui núnisaṉ naint Uunt Yusa Je̱e̱ pujana nu naintia pakarí̱nkia kaya kusha wái̱ṉtatui”’ tu etserkamiayi. Mik. 3:12

¹⁹ Nu arantcha Jutanmaya̱ úunt akupin Esekíassha ashí shuarja̱i̱ irunturar Mikíasan ¿máwarmakia? Antsu íksaṉ úunt akupniusha Uunt Yusan ashamak waitnenkarturta tusa Uunt Yusan ¿seachmakia? Nuna túramtaichuk Uunt Yussha nu aentsun waitnentrar asuttsuk ¿iniaisarmia? Warí, iikia imia iik yajauch awajmamainiaji” tiármiayi.

Yúsnan etserin Urías maamu

²⁰ Túrasha Kiriat Jearímnumia̱ áishmaṉ Semayása uchirí̱ Urías Uunt Yusa náari̱n pachis etsermiayi. Tura ju̱ nuṉka tura ju̱ pepru ukunam túrunattana nuna Jirimíasja̱i̱ métek etsermiayi.

²¹ Úunt akupin Juasim ashí suntara úuntrimiak tura uunt armia nuímiak ni chichame̱n anturkarmiayi. Tura úunt akupin mátaj tutai Urías nuna nekaama ashamak Ejiptunam pisarmiayi.

²² Úunt akupin Juasim áishmaṉkan Irnatán Ákpura uchirí̱n tura chíkich áishmaṉ armia nunasha niji̱a̱i̱ Ejiptunam akupkarmiayi.

²³ Urías Ejiptunam pujan úunt akupin Juasimiai̱ júkiarmiayi. Túram puya̱ja̱i̱ máwar ni aya̱shí̱nkia náṉkamas aents iwiartai̱niam ajapawarmiayi.

²⁴ Túrasha achikiar máwarat tusar péprunam surukara̱i̱ṉ tusa Sapana uchirí̱ Ajikiam Jirimíasja̱i̱ṉkia pujumiayi.