Jrm. 25 - Yus Papí: Shuarja̱i̱ Yus Yamaram Chicham Najanamu

Papirúnia aentsja̱i̱ Jutanmaya̱ shuar asutiámu

¹ Kame Jutanmaya̱ úunt akupin Jusíasa uchirí̱ Juasim Jutanam úunt akupin ajas kuatru uwí pujamunam tura Papirúnianmaka Napukutunusúr úunt akupin ajas chikichik uwí pujamunam Jutanmaya̱ shuar ashí nekaawartin Yúsnan etserin Jirimíasan chícham tarimiayi.

² Nu chichaman étseruk Jutanmaya̱ṉka ashí aentsun tura Jerusaréṉnum matsatainiancha ashí ujainiak Yúsnan etserin Jirimías chichaak

³ “Warí Jutanmaya̱ úunt akupin Amuna uchirí̱ Jusías Jutanam akupin ajas pujamunam uwikia tráisetin juárkimiutak yamaiya̱ tímiaja̱i̱sha ashikia paintitráis uwí Uunt Yusa chichamen antusan pujusjai. Wisha nú chichamnak yawe̱tsuk etserkin winiajai túrasha peṉké anturtukcharme.

⁴ Núnisaṉ Uunt Yussha yawe̱tsuk ni takarniúri̱ Yúsnan etserniun atumín akupturmá pujurtamprume. Túrasha anturkarum umirkatin nakitiakrum peṉké pachischarme.

⁵ Warí Yúsnan etserin chichainiak ‘Atumí netse enentáimtairi̱sha tura yajauch túrutairi̱sha iniaisatarum. Túrakrumka Uunt Yus atumín tura atumí úuntri̱n nuṉkan amasuítrumna nui̱ iniaṉnatsuk tuke matsamsattarme.

⁶ Najankamu yus áiniana nu enentáimtakrum tikishmátrairap. Núnisaṉ atumek najankayatrum ju̱i̱ti Yus tusarum peṉké antrarum shiir awajeakrum akajtukairap. Nu túrachkurminkia Wisha yajauchikia awajsashtatjarme’ tawai Uunt Yus tiarmai.

⁷ Nuya̱sha Uunt Yus chichaak ‘Túrasha átum asutniátniuk peṉké anturtukcharme antsu átum najankarum túrarmena nuja̱i̱ yamaikia akajtukurme’ tawai.

⁸ Tuma asamtai Ashí Akupin Uunt Yus ju̱na tawai ‘Winia chichamur antukcha asakrumin

⁹ yamaikia ashí shuar arakaani̱ matsatainian tura winia takartinian Papirúnianmaya̱ úunt akupniun Napukutunusúran ashí shuar ju̱ nuṉkanam matsatainia nuna ántsanak nui̱ ayaam pujuinia nunasha káutkar mesetan najatawarti tusan útsukartatjai. Nuyá̱ emeska amukan áujmattsar wishiktai̱ tura peṉké atsá awajsattajai.

¹⁰ Nuyá̱ warakur kantamtai̱ncha, nuatnaiyamunam wéakur kantamprútai̱ncha tura kayaja̱i̱ nekeamuncha, shirikip ekemátaincha ashí emeṉkátrartatjai.

¹¹ Tura ashí ju̱ nuṉkaka peṉké tsuumai̱ mitia awajsamu juáktatui. Tura ju̱yá̱ aentssha sataintia uwí Papirúnianmaya̱ akupniu takarniúri̱ pujuartatui.

Papirúnianmaya̱ aents asutniámu

¹² Túrasha sataintia uwí jeamtai Papirúnianmaya̱ úunt akupniun tura nuna nuṉke̱ncha áitkiasnak Kartíu aentsu nuṉke̱ncha ní yajauch túrutairi̱ni̱ṉ ashí asutiáwartatjai Wi. Túran ashí emeskaran amú amuusan peṉké atsá tuke awajsartatjai.

¹³ Tura yamaikia jú̱ nuṉkanmaya̱ aentsu asutniátniuri̱n ashí Wi tímiaj nuna tura ju̱ papinium áarman Jirimías yaunchu etserkamia nu ashí nuṉkanam mash uminkiattawai.

¹⁴ Tuma asamtai nincha nútiksaraṉ untsurí nuṉkanmaya̱ aents tura úunt akupin kakaram ainia nusha íksaraṉ ni takarniúri̱ awajsártatui. Warí ní uwejé̱ja̱i̱ túrawarua nuja̱i̱ métek Wisha niṉkia yapajkiarttajai’ tawai Uunt Yus” tímiayi Jirimías.

Yusa kajetáiri̱ piniṉnum piakua núnisaiti

¹⁵ Uunt Yus Israera Yusri̱ chichartak “Winia uwejruí̱ya̱ kajetái winiu piniṉnumia̱ achikta túram uunt nuṉka mátsatkamunam akupeajmena nuyá̱ aents árarta.

¹⁶ Tura umarar wáurkartatui. Túrunawar pemperakut ajartatui. Wi mesetan najanattajna nuja̱i̱ waurka ajasártatui” turutmiai.

¹⁷ Nuya̱ṉka Uunt Yusa uweje̱ya̱ piniṉkian achikian uunt nuṉka mátsatkamu ainia nunasha Uunt Yus akuptúkua nuna ashí áararmajai.

¹⁸ Jerusaréṉ tura Jutá pépruncha úunt akupniurtiuk tura úuntri̱ntiuk ashí emeskan amuktaj tusan áararmajai. Nu arant ashammai tura yumiṉkramu yamaiya̱ ju̱i̱sha urukuit núnis atí tusan túraitjiai.

¹⁹ Núnisaṉ Ejiptunmaya̱ úunt akupin Parauṉnasha takarniúri̱ncha núnisaṉ úunt akupniu uchirí̱ncha ashí ni shuari̱miak

²⁰ tura ashí írar armia nusha ashí nuṉkanmaya̱ úunt akupin armia nusha Jiristía nuṉkanmaya̱ úunt akupin armia nu Askarún, Kaasa, Ikrun, Astutnum pepru juákaru pujuarma nusha

²¹ nuyá̱ Etum, Muap nuyá̱ Amuna aentsri̱sha

²² Tírunmaya̱ ashí úunt akupin Setunnumia̱ ashí úunt akupin armia nu tura úunt akupin nayants amain matsatáinia nu.

²³ Tura Tetan, Tema, Pus nuyá̱ misharin ashí piniu awaama armia nusha

²⁴ ashí úunt akupin Arapianmaya̱ tura ashí úunt akupin chíkich nuṉkanmaya̱ atsunum matsamin armia nusha

²⁵ nuyá̱ Sémprinmaya̱ tura Iramnumia̱ núnisan Mítianmaya̱ ashí úunt akupniuri̱ncha áararmajai.

²⁶ Tura araki̱a̱ ashí úunt akupniun tíjiu̱chiya̱sha tura yajaya̱sha chikichji̱a̱i̱ nui̱ matsamia nusha ashí nuṉka náṉkatra ímianai matsatáinia akupáinia nunasha áararmajai. Tura áararan umikmatai Sésaknumia̱ úunt akupin umartatui.

²⁷ “Israera Yusri̱ ashí akupin Uunt Yus jú̱nis tawai títiatme. ‘Umaarum nampekrum imiakrum iniantárum. Warí mesetan atumín akuptúktatjarmena nuiṉkia mesetnumia̱ṉka nantakchattarme.’

²⁸ Ame takakmena nu piniṉnumia̱n achik umartinian nakitiakuinkia chichaarkum ‘Ashí akupin Uunt Yus jú̱nis tawai “Nakittsuk umarti túramui” titiá’ tímiayi.

²⁹ Ju̱ pepru Winia ának asuttian naṉkamattajai. ¿Átumka asutiámtsuk initiamsattaji tuuk enentáimprum? Ú̱mkashtatrume ashí nuṉká matsatrumna nútirmiṉkia mesetan najatattajrume” tawai Ashí Akupin Uunt Yus.

³⁰ “Jirimíasá ame ashí ujainiakum jú̱nisam tiártatme ‘Uunt Yus yakiya̱ṉ shiniawai tura tí peṉker pujutái̱ri̱ya̱ untsumui. Tura ni je̱e̱ya̱ kajek winiawai. Ashí nuṉká matsatáinia nú aentsun uwa yumiri̱n jurustaj tusar nájainiak untsumainia núnis untsumkartatui.

³¹ Nu shiniamu nuṉka náṉkatrana ímianai ántumtikiui. Tura Uunt Yus uunt nuṉka mátsatkamu ainia nuja̱i̱ jiániawai. Ni ashí aentsun sumamtikiataj tusa untsukartatui tura Yusan umircha ainia núnaka mesetnum iktua iniaisartatui’ tawai Uunt Yus.”

³² Ashí Akupin Uunt Yus chichaak “Nekaata uunt nuṉka mátsatkamu ainia nui̱ yajauch átatui tura nuṉka náṉkatrana nui̱ṉkia uunt nase iniantrartatui.

³³ Nu tsawant Uunt Yus máwartatna nui̱ṉkia ashí nuṉkanmaya̱ ímianaisha tepetar ajartatui. Núnaka yaaksha e̱a̱rchartatui tura iwiartancha iwiarsachartatui. Tuma asa ijia nuke nuṉka náṉkatrana ímianai ajapamu ártatui.

Uunt nuṉka mátsatkamu úuntri̱n Yus sumamtikiawartatui

³⁴ Murik wáiniutiram úttiarum túrarum untsumkatarum. Waurka núnisrum nuṉká ju̱yu̱ri̱n iniantárum murikiu peṉkeri̱ mantamnatin tsawant jeartámmiatai piniṉ shíirmach nuṉká iniar tsai̱ tsai̱niá ajá núniktatrume.

³⁵ Murikiu wáinin ainia nuna ejamtairi̱ṉkia amuukartatui tura murikiu peṉkeri̱ úmkachartatui.

³⁶ Murikiu wáinin untsumma antuntiatui tura murikiu wainniu uuntri̱ utma antitiarme. Warí ni sa̱a̱kri̱n Uunt Yus emestukaruiti.

³⁷ Uunt Yus ti kajek péṉker sa̱a̱kin emesnakaruiti.

³⁸ Wáitkiarmia nuna ti kajerkar nu nuṉkan emesrar tura suir enentáimiar nu nuṉkan emesarmatai Uunt Yus úunt ya̱wa̱ tepetairi̱ya̱ jiinkí̱ wéak ikiuana núnis ni nuṉke̱ṉka aya jú̱nik ikiukniuiti” tawai Uunt Yus.