Jrm. 24 - Yus Papí: Shuarja̱i̱ Yus Yamaram Chicham Najanamu

Ikiu jimiará chaṉkinnium chumpíamu

¹ Papirúnianmaya̱ úunt akupin Napukutunusúr Jutanmaya̱ úunt akupin Juasimia uchirí̱n Jikiuníasan tura Jutanmaya̱ uuntri̱ armia nunasha je̱a̱ je̱a̱mniuncha, jiruja̱i̱ takakmauncha, Jerusaréṉnumia̱ Papirúnianam achir yaruakaru ai̱ ikiu jimiará chaṉkinnium chumpíamu Uunt Yusa Uunt Je̱e̱n eem apujsamun Uunt Yus iniaktursamai.

² Tura emka chaṉkinniumia̱ṉka ikiu tí peṉker eem nerekma tsamana ímiatrus armai tura chíkich chaṉkinniumia̱ṉka ikiu tí yajauch peṉké yúachmin kaushmaku armai.

³ Nuyá̱ Uunt Yus chichartak “¿Jirimíasá, warí wáiniam?” túrutkui wi chicharkun “Íkiun, ikiu péṉkerka tí peṉkeran tura yajauchikia ti yajauch kaushmakuru yúachminian” tímiajai.

⁴ Nuya̱ṉka Uunt Yus chichartak

⁵ “Uunt Yus Israera Yusri̱ chichaak Jutá suaran achirar yaruakarti tusaran ju̱ nuṉkanmaya̱ ji̱i̱raran Kartíu aentsu nuṉke̱e̱n akuprarmaj núnaka péṉker árat tusan ju̱ péṉker ikiu ainiana tímiatrusaraṉ íisartatjai.

⁶ Kame péṉker árat tusan péṉker wáinkiartatjai túran jú̱ nuṉkanmaṉ ataksha awakearan ikiankartatjai. Tura péṉker matsasárnaka emeskachartatjai. Árakchaitkiuisha arakárnaka atakka uwerchartatjai.

⁷ Winia nekarawarat tusan nekatai̱n súsartatjai. Warí Wikia Úunt Yuschakaitiaj. Nekas enentáiji̱a̱i̱ Winia enentáimturainia ásar niṉkia Wi shuar ártatui tura Wikia ni Yusri̱ átatjai.

⁸ Uunt Yus chichaak Jutanmaya̱ úunt akupin Setekíasnaka núnisaṉ úuntri̱ncha tura Jerusaréṉnumia̱ juákaru ju̱ nuṉkanam ikiukiarma áiniana ántsaṉ Ejiptu nuṉkanam pujuinia nunasha ikiu yajauch tí yajauch yúachmin ásarmatai muí̱jkiartatjana nútiksaran yajauch awajsartatjai.

⁹ Tura ashí nuṉkanam akupniu nuṉké̱ áiniamunam Wi akuprartatjana nuiṉkia Israer shuar túrunawarma enentáimsar sapijmiatai tura natsan awajtai̱ núnisaṉ métektaku chichamja̱i̱ chichartai̱ áitkiasrik wishiktai̱ nuyá̱ yumiṉtai awajsartatjai.

¹⁰ Nuna túrakun nin tura ni úuntri̱ncha nuṉkan súsarmiaj nuya̱ṉka mesetja̱i̱ tsukaja̱i̱ núnisnak suṉkurja̱i̱ amú amú awajsartatjai” tawai Uunt Yus.